Seken Buk Blong Kronikel 9:1-31
9 Nao kwin blong Seba+ i harem nius blong Solomon, ale hem i kam long Jerusalem blong askem ol strong kwestin* long hem blong traem hem. Hem i kamtru wetem bigfala grup blong ol man blong wok blong hem, mo ol kamel we oli karem balsam oel, mo plante plante gol+ mo sas ston. Hem i go insaed blong luk Solomon mo i tokbaot evri samting we i stap long hat blong hem.+
2 Mo Solomon i ansa long evri kwestin we hem i askem, i no gat wan we i had tumas* blong Solomon i eksplenem long hem.
3 Taem kwin blong Seba i luk waes blong Solomon,+ mo haos we hem i wokem,+
4 ol kakae long tebol blong hem,+ ples we ol man blong wok blong hem oli sidaon long hem, wok we olgeta we oli stap kasem kakae oli mekem mo klos blong olgeta, ol man blong karem dring blong hem mo klos blong olgeta, mo ol sakrefaes we hem i stap mekem oltaem long haos blong Jehova, hemia sakrefaes we i bon fulwan,+ kwin ya i sapraes tumas nao i no moa save toktok.
5 Nao hem i talem long king se: “Nius blong waes blong yu mo blong ol samting we yu mekem,* we mi bin harem taem mi stap long kantri blong mi, i tru nomo.
6 Be mi mi no bilivim ol tok ya go kasem we mi kam long ples ya mo mi luk long prapa ae blong mi.+ !Yu luk! Samting we mi harem i smol nomo long saed blong bigfala waes blong yu.+ Yu yu waes moa i bitim wanem we mi harem.+
7 !Ol man blong yu oli glad tumas! !Mo ol man blong wok blong yu we oli stap stanap oltaem long fored blong yu mo oli stap lesin long ol waestok blong yu, oli glad tumas!
8 I gud yumi presem Jehova we i God blong yu, hem i glad tumas long yu nao i mekem yu yu kam king blong Jehova we i God blong yu, mo i putum yu long tron blong hem. God blong yu i lavem tumas ol man Isrel,+ mo blong lav ya i stap olwe, hem i putumap yu yu king blong yu jajem ol man long jastis mo blong yu rul long stret fasin.”
9 Biaen kwin i givim 120 talen* blong gol+ mo plante plante balsam oel mo ol sas ston. King Solomon i neva kasem bakegen balsam oel we i plante we i plante olsem we kwin blong Seba i givim.+
10 Mo tu, ol man blong wok blong Hiram mo ol man blong wok blong Solomon we oli karem ol gol blong Ofiri i kam,+ oli karem ol timba tu blong tri ya Algam wetem ol sas ston.+
11 King i yusum timba blong tri ya algam blong mekem ol step blong haos blong Jehova+ mo long haos* blong king,+ mo hem i yusum tu blong wokem ol hap mo ol instramen we oli gat string, blong olgeta we oli stap singsing oli save yusum.+ Ol man oli neva luk ol samting olsem bifo long Juda.
12 Nao King Solomon i givim eni samting we kwin blong Seba i wantem mo i askem, i bitim wanem* we hem i bin tekem i kam long king. Biaen kwin ya wetem ol man blong wok blong hem oli aot, mo oli gobak long ples blong olgeta.+
13 Wet blong ol gol we Solomon i stap kasem evri yia, hem i 666 talen blong gol,+
14 mo tu ol bisnesman, ol tredaman, olgeta king blong Arebia, mo ol hed gavman long kantri ya, olgeta tu oli stap tekem ol gol mo silva i go long Solomon.+
15 King Solomon i wokem 200 bigfala sil long gol we oli miksim wetem wan narafala aean+ (long wan sil, hem i yusum 600 sekel* blong gol we oli miksim wetem wan narafala aean),+
16 mo 300 smol sil* we hem i wokem long gol we oli miksim wetem wan narafala aean (long wan sil hem i yusum tri mina* blong gol). Biaen hem i putum ol samting ya insaed long Haos Blong Ol Tri Blong Lebanon.+
17 Biaen king i wokem wan bigfala jea blong king long tut blong elefen mo i blokem long gol we i klin gud.+
18 I gat sikis step blong go antap long jea ya, mo i gat wan stul blong leg we oli wokem long gol we i joen wetem jea ya, mo long tufala saed blong jea ya i gat ples blong putum han long hem, mo i gat tu laeon+ i stanap long tufala saed ya blong putum han.
19 Mo i gat 12 laeon+ long ol sikis step ya, wanwan long olgeta oli stanap long tufala en blong ol step ya. I no gat wan narafala kingdom we i mekem wan samting olsem.
20 Olgeta kap blong dring blong King Solomon, oli wokem long gol, mo evri samting we i stap insaed long Haos Blong Ol Tri Blong Lebanon, oli wokem long gol we i klin gud. I no gat wan samting we oli wokem long silva from we long taem blong Solomon, ol man oli luk silva olsem wan samting we i nating nomo.+
21 From we king i gat ol sip we oli stap go long Tasis+ wetem ol man blong wok blong Hiram.+ Mo wan taem long evri tri yia, ol sip blong Tasis oli kambak we oli fulap gud long gol, silva, tut blong elefen,+ mangki, mo pijin ya pikok.
22 King Solomon i rij moa i winim ol narafala king long wol mo i waes moa long olgeta.+
23 Mo ol king long olgeta ples long wol oli askem blong toktok wetem* Solomon, blong harem waes blong hem we tru God i putum long hat blong hem.+
24 Mo wanwan long olgeta oli kam wetem wan presen blong givim long hem, olsem ol samting we oli wokem long silva, ol samting we oli wokem long gol, ol klos,+ klos blong faet, balsam oel, ol hos, mo ol hafkas dongki, mo fasin ya i gohed evri yia.
25 Mo Solomon i gat 4,000 rum blong ol hos blong hem wetem ol jariot, mo hem i gat 12,000 hos.*+ Mo hem i putum olgeta long ol taon blong jariot mo long Jerusalem, klosap long king.+
26 Solomon i rul antap long olgeta king, i stat long Reva* i go kasem kantri blong ol man Filistia, mo i go kasem boda blong Ijip.+
27 King i mekem se silva long Jerusalem i kam plante we plante olsem ol ston, mo wud blong sida i kam plante olsem ol tri ya sikamo we oli stap long Sefela.+
28 Mo ol man oli stap tekem ol hos long Ijip+ mo long ol narafala kantri, mo oli karem i kam long Solomon.
29 Ol narafala stori blong Solomon,+ stat long stat blong hem i go kasem en blong hem, oli raetemdaon olgeta wetem ol tok blong profet ya Natan,+ mo long profet tok blong Ahaejah+ we i wan man Silo, mo wetem ol stori blong ol vison blong Ido,+ wan man blong luk vison we i tokbaot Jeroboam,+ boe blong Nebat.
30 Solomon i stap long Jerusalem mo i rul long olgeta ples long Isrel blong 40 yia.
31 Nao Solomon i go spel wetem ol olfala blong hem. Ale oli berem hem long Taon Blong Deved we i papa blong hem.+ Mo boe blong hem Rehoboam i tekem ples blong hem, i kam king.+
Ol futnot
^ NT: “ridel.”
^ PT: “wan tok we i haed.”
^ NT: “toktok blong yu.”
^ NT: “pales.”
^ MNT: “antap long namba blong ol presen.”
^ Smol sil ya, plante taem ol man blong sut long bonara oli stap karem.
^ PT: “lukaot rod blong luk fes blong.”
^ NT: “ol man blong ron long hos.”
^ Hemia Yufretes Reva.
