Seken Buk Blong Kronikel 7:1-22

  • Tempol i fulap long glori blong Jehova (1-3)

  • Seremoni blong opening (4-10)

  • Jehova i kamtru long Solomon (11-22)

7  Nao stret afta we Solomon i finis prea,+ faea i aot long heven i kamdaon,+ mo i bonem ofring we i blong bon fulwan mo ol narafala sakrefaes, mo glori blong Jehova i fulumap haos ya.+  Nao ol pris oli no save go insaed long haos blong Jehova from we glori blong Jehova i fulumap haos blong Jehova.+  Olgeta man Isrel oli stap lukluk taem faea ya i kamdaon mo glori blong Jehova i kam long haos ya. Nao oli bodaon we fes blong olgeta i go long floa we oli wokem long ston, blong ona long Jehova mo talem tangkiu long hem “from we hem i gud, mo fasin blong hem blong lavem man oltaem i stap olwe.”  Nao king wetem olgeta man oli mekem ol sakrefaes i go long Jehova.+  King Solomon i givim 22,000 buluk, mo 120,000 sipsip, blong sakrefaes. Long fasin ya, king wetem olgeta man ya oli mekem opening blong haos blong tru God.+  Ol pris oli stap stanap long ples we oli wok long hem. Mo ol Livaet we oli holem ol instramen we bambae oli plei long hem taem oli singsing blong presem Jehova,+ olgeta tu oli stanap long ples blong olgeta. (King Deved i wokem ol instramen ya blong talem tangkiu long Jehova, taem hem i presem God wetem olgeta,* “from we fasin blong hem blong lavem man oltaem i stap olwe.”) Mo ol pris oli blo strong long ol trampet+ long fored blong olgeta, taem olgeta man Isrel oli stanap i stap.  Nao Solomon i mekem medel blong yad long fored blong haos blong Jehova i kam tabu, from we long ples ya nao hem i mas givim ol ofring we oli bon fulwan,+ mo i givim ol gris we i kamaot long ol sakrefaes blong pis. Hemia from we olta ya long kopa+ we Solomon i wokem i no gat naf ples long hem blong bonem ol sakrefaes we oli bon fulwan, wetem ol sid ofring,+ mo ol gris.+  Long taem ya, Solomon i mekem lafet ya blong seven dei.+ Hem i mekem lafet ya wetem olgeta man Isrel, wan bigfala kongregesen blong ol man we oli kam longwe, i stat long Lebohamat* i godaon kasem Wadi* long Ijip.+  Be long namba 8 dei,* olgeta oli mekem wan impoten asembli,+ from we oli bin mekem opening blong olta ya blong seven dei, mo oli mekem lafet blong seven dei bakegen. 10  Nao long namba 23 dei blong namba 7 manis, hem i sanem ol man oli go wanwan long haos blong olgeta we oli glad tumas,+ mo hat blong olgeta i harem gud from ol gudfala samting we Jehova i bin soemaot long Deved, Solomon, mo ol man blong hem, ol man Isrel.+ 11  Long fasin ya, Solomon i finisim haos blong Jehova mo haos* blong king.+ Mo evri samting we hat blong Solomon i wantem mekem long haos blong Jehova mo long prapa haos blong hem, hem i mekem evriwan.+ 12  Biaen Jehova i kamtru long Solomon+ long naet, mo i talem long hem se: “Mi mi harem prea blong yu, mo mi jusum ples ya blong i ples blong mi olsem wan haos blong mekem sakrefaes.+ 13  Taem mi mi satem heven nao ren i no moa foldaon, mo taem mi givim oda long ol grasopa blong oli flatemgud kantri ya, mo sipos mi sanem wan strong sik i kam long medel blong ol man blong mi, 14  mo sipos ol man blong mi we oli tekem nem blong mi+ oli mekem tingting blong olgeta i stap daon,+ oli prea, oli lukaot mi* mo oli tanem baksaed long ol rabis fasin blong olgeta,+ bambae mi mi stap long heven mo mi lesin i kamdaon mo mi fogivim sin blong olgeta, mo mi hilim kantri blong olgeta.+ 15  Naoia ae blong mi bambae i open mo sora blong mi bambae i lesin gud long prea we oli mekem long ples ya.+ 16  Mo naoia mi mi jusum haos ya mo mi mekem i kam tabu, blong nem blong mi i save stap long hem oltaem,+ mo bambae ae blong mi mo hat blong mi i stap olwe long ples ya.+ 17  “Mo long saed blong yu, sipos yu mekem olsem papa blong yu Deved, yu wokbaot oltaem long fored blong mi taem yu mekem evri samting we mi mi talem long yu, mo yu obei long ol rul mo ol jajmen blong mi,+ 18  bambae mi mekem se jea blong rul blong yu i stap strong,+ stret olsem we mi mekem wan kontrak wetem papa blong yu Deved,+ se: ‘Oltaem bambae i gat wan man long laen blong yu we i rul long Isrel.’+ 19  Be sipos yu tanem baksaed mo yu lego ol loa mo ol komanmen blong mi we mi putum long fored blong yu, nao yu go mekem wosip long ol narafala god mo yu bodaon long olgeta,+ 20  bambae mi mi aotem ol man Isrel long kantri ya blong mi, we mi givim long olgeta,+ mo bambae mi sakemaot haos ya we mi mekem i tabu mo we nem blong mi i stap long hem. Mo bambae mi mekem oli kam wan samting we olgeta man oli stap lukluk nogud long hem,* mo oli stap jikim.+ 21  Mo haos ya bambae i kam ol hip blong ol doti nomo. Mo ol man we oli pas klosap long hem, bambae oli sapraes nao oli stanap mo oli lukluk,+ mo bambae oli talem se: ‘?From wanem Jehova i mekem olsem long ples ya mo long haos ya?’+ 22  Nao bambae ol man oli talem se: ‘Jehova we i God blong ol olfala blong olgeta mo we i bin tekemaot olgeta long kantri ya Ijip,+ hem nao i mekem trabol ya i kasem olgeta,+ from we olgeta oli lego hem+ mo oli go folem ol narafala god, oli bodaon long olgeta, mo oli mekem wosip long olgeta.’”+

Ol futnot

Maet hemia i minim ol laen blong Livae.
NT: “long get blong Hamat.”
Yu luk Diksonari.
Hemia dei afta long lafet, o namba 15 dei.
NT: “pales.”
NT: “fes blong mi.”
PT: “luk olgeta olsem wan proveb.” Yu luk Diksonari.