Seken Buk Blong Kronikel 22:1-12
22 Nao ol man we oli stap long Jerusalem oli mekem Ahasia we i lasbon boe blong Jehoram, i kam king long ples blong hem. Hemia from we grup blong ol raskol we i bin kam long kamp wetem ol man Arebia, oli kilim i ded olgeta bigfala brata blong hem.+ Taswe Ahasia we i boe blong Jehoram i stat blong rul long Juda.+
2 Long taem ya Ahasia i gat 22 yia, mo hem i stap long Jerusalem mo i rul blong wan yia. Mama blong hem, nem blong hem Atalia,+ we i smol bubu* blong Omri.+
3 Ahasia tu i wokbaot long rod we olgeta long haos blong Ehab oli folem,+ from we mama blong hem i kam advaesa blong hem, nao i pulum hem blong mekem samting we i nogud.
4 Mo hem i gohed blong mekem samting we i nogud long ae blong Jehova, olsem we olgeta long haos blong Ehab oli mekem, from we afta we papa blong hem i ded, olgeta ya nao oli kam ol advaesa blong hem, mo bigfala trabol i kasem hem from.
5 Hem i folem advaes blong olgeta, ale i folem Jehoram we i boe blong King Ehab blong Isrel, blong oli go long Ramotgilead+ blong faet agensem Hasael+ we i king blong Siria, mo long ples ya, ol man blong sut long bonara oli givim kil long Jehoram.
6 Ale hem i gobak long Jisrehel+ blong ol kil ya oli kam gud, hemia ol kil we oli givim long hem long Rama, taem hem i stap faet agensem King Hasael blong Siria.+
Sam taem biaen, Ahasia* we i boe blong Jehoram+ mo i king blong Juda, i godaon long Jisrehel blong visitim Jehoram+ we i boe blong Ehab, from kil we hem i bin kasem.*+
7 Be taem Ahasia i go luk Jehoram, God i mekem se hem i kasem trabol. Taem hem i kamtru, hem i folem Jehoram blong go mitim Jehu+ we i smol bubu* blong Nimsi, we Jehova i bin makemaot hem blong hem i kilim i ded* olgeta long haos blong Ehab.+
8 Nao taem Jehu i stat blong mekem jajmen blong God i kamtru long haos blong Ehab, hem i faenem ol prins blong Juda wetem ol boe blong brata blong Ahasia, hemia ol minista blong Ahasia, nao hem i kilim olgeta oli ded.+
9 Biaen ol man blong Jehu, oli go lukaot Ahasia, mo oli faenem we hem i stap haed long Sameria, ale oli holemtaet hem mo oli tekem hem i go long Jehu. Biaen oli kilim hem i ded mo oli berem hem,+ from we oli talem se: “Hem i smol bubu blong Jehosafat, man ya we i lukaot Jehova long olgeta hat blong hem.”+ Nao i no gat wan man long haos blong Ahasia we i gat paoa blong rul long kingdom.
10 Taem Atalia+ we i mama blong Ahasia, i luk we boe blong hem i ded, hem i girap mo i go kilim i ded olgeta evriwan long laen blong king* blong Juda.+
11 Be Jehosabiat we i gel blong king, hem i tekemaot Jehoas+ we i boe blong Ahasia, long medel blong ol narafala boe blong king we oli rere blong kilim olgeta oli ded. Ale hem i putum hem wetem woman we i stap lukaot long hem, long wan rum we i insaed olgeta. Jehosabiat we i gel blong King Jehoram,+ hem i waef blong pris ya Jehoeada+ mo i sista blong Ahasia. Hem i haedem boe ya, nao Atalia i no kilim hem i ded.+
12 Jehoas i stap wetem olgeta blong sikis yia, i stap haed long haos blong tru God, taem Atalia i stap rulum kantri ya.
Ol futnot
^ PT: “gel.”
^ NT: “hem i sik.”
^ Long sam Hibru hanraet, “Asaria.”
^ PT: “boe.”
^ PT: “aotem.”
^ PT: “olgeta evriwan we oli kamaot long laen blong kingdom.”
