Seken Buk Blong Kronikel 3:1-17
3 Nao Solomon i stat blong wokem haos blong Jehova+ long Jerusalem, long Hil Ya Moria,+ ples we Jehova i bin kamtru long papa blong hem Deved.+ Mo hemia ples we Deved i bin rerem, long ples blong klinim wit blong Honan+ we i wan man Jebus.
2 Hem i stat blong wokem haos ya long namba 4 yia blong rul blong hem, long seken dei blong seken manis.
3 Mo folem olfala fasin blong mesarem ol samting,* fandesen blong haos blong tru God we Solomon i wokem, longfala blong hem i 60 kiubit, mo bigfala blong hem i 20 kiubit.+
4 Rum long doa blong haos ya, longfala blong hem i 20 kiubit, sem mak olsem bigfala blong haos ya,* mo hae blong hem i 120,* mo hem i blokem insaed long rum ya long gol we i klin gud.+
5 Hem i blokem bigfala rum* long ol wud blong junipa, mo i blokem ol wud ya long gudfala gol,+ biaen i flasem long ol pija blong pamtri+ mo ol jen.+
6 Mo tu, hem i flasem haos ya long ol sas ston we oli naes,+ mo gol+ we hem i yusum, hem i tekem long ples ya Pavaem.
7 Hem i yusum gol blong blokem haos ya, hemia ol rafta blong hem, floa aninit long doa, ol wol blong hem, mo ol doa blong hem.+ Mo hem i katem pija blong ol jerubim long ol wol blong haos ya.+
8 Biaen hem i wokem Rum* we i Tabu we i Tabu.+ Longfala blong hem i 20 kiubit olsem bigfala blong haos ya we i 20 kiubit. Hem i yusum 600 talen* blong gudfala gol blong blokem rum ya.+
9 Mo gol we hem i yusum blong wokem ol nil, hevi blong hem i 50 sekel,* mo ol rum we oli stap antap, hem i blokem long gol.
10 Biaen hem i wokem pija blong tu jerubim mo i putum long Rum* ya we i Tabu we i Tabu, mo hem i blokem tufala long gol.+
11 Ol wing blong tufala jerubim ya,+ longfala blong olgeta i 20 kiubit. Wan wing blong faswan jerubim, longfala blong hem i faef kiubit mo i tajem wol blong haos, mo longfala blong narafala wing blong hem i faef kiubit mo i tajem wan long ol wing blong narafala jerubim.
12 Mo narafala jerubim, wan wing blong hem i faef kiubit mo i tajem narafala wol blong haos, mo narafala wing blong hem i faef kiubit mo i tajem wing blong faswan jerubim.
13 Ol wing blong tufala jerubim ya we i open, longfala blong olgeta i 20 kiubit. Mo tufala i stanap long leg blong tufala, mo baksaed blong tufala i fesem wol.*
14 Mo tu, hem i yusum tred we i blu, pepol wul, tred we i dak red, mo gudfala kaliko, blong wokem wan bigfala kaliko,+ mo i somap pija blong ol jerubim long hem.+
15 Biaen hem i wokem tu bigfala pos+ long fored blong haos ya, mo longfala blong tufala i 35 kiubit, mo hem i wokem tu hed blong putum antap long tufala bigfala pos ya, we longfala blong wanwan long tufala i faef kiubit.+
16 Mo hem i wokem ol jen olsem ol nekles mo i putum i goraon long hed blong tufala bigfala pos ya, mo hem i wokem 100 frut blong grenadin mo i putum olgeta long ol jen ya.
17 Nao hem i stanemap tufala bigfala pos ya long fored blong tempol, wan long raetsaed* mo narawan long lefsaed.* Hem i putum nem blong hemia long raetsaed se Jakin,* mo hemia long lefsaed se Boas.*
Ol futnot
^ 1 kiubit i sem mak long 44.5 sentimeta. Be sam man oli ting se “folem olfala fasin blong mesarem ol samting,” hemia longfala kiubit we i 51.8 sentimeta. Yu luk Ap. B14.
^ NT: “bigfala blong haos ya hem i 20 kiubit.”
^ Oli no save wanem mesamen we oli yusum.
^ PT: “bigfala haos,” maet hemia i minim Rum We i Tabu.
^ PT: “haos.”
^ PT: “haos.”
^ Tufala i lukluk i go long Rum We i Tabu.
^ NT: “saot.”
^ NT: “not.”
^ Hemia i minim “I Gud Hem [Jehova] i Mekem i Kam Strong.”
^ Maet hemia i minim “Long Paoa.”
