Seken Buk Blong Kronikel 35:1-27
35 Nao Josaea i mekem wan lafet blong Pasova+ long Jerusalem blong ona long Jehova. Mo oli kilim ol animol blong mekem sakrefaes blong Pasova ya+ long namba 14 dei blong faswan manis.+
2 Mo hem i putum ol pris long ol wok blong olgeta, mo i leftemap tingting blong olgeta blong oli mekem wok blong olgeta long haos blong Jehova.+
3 Biaen hem i talem long ol Livaet, olgeta we oli stap tijim olgeta man Isrel+ mo we oli tabu long fes blong Jehova, se: “Yufala i putum tabu Bokis insaed long haos we Solomon, boe blong Deved, we i king blong Isrel, i wokem.+ Bambae yufala i no moa karem bokis ya long solda blong yufala.+ Naoia, yufala i mekem wok blong Jehova we i God blong yufala mo blong ol man blong hem, ol man Isrel.
4 Mo yufala i mas rerem yufala folem haos blong papa blong yufala mo folem ol grup blong yufala, olsem we King Deved+ blong Isrel mo boe blong hem Solomon, tufala i raetemdaon.+
5 Yufala i mas stanap long holi ples, mo stanap long ol grup folem haos blong papa blong ol brata blong yufala, hemia ol narafala man.* Long ol grup wanwan, i mas gat wan grup blong haos blong papa blong ol Livaet.
6 Yufala i mas kilim ol animol blong mekem sakrefaes blong Pasova,+ mo yufala i mas mekem yufala i klin, mo mekemrere ol samting blong ol brata blong yufala, blong oli save folem tok we Jehova i talemaot tru long Moses.”
7 Josaea i givim ol sipsip, ol smol man sipsip, mo ol yang man nani we ful namba blong olgeta, hem i 30,000. Hem i givim ol samting ya long ol man blong oli mekem sakrefaes blong Pasova blong evriwan we oli stap long ples ya. Mo tu hem i givim 3,000 buluk. Olgeta samting ya oli kamaot long ol samting blong king.+
8 Mo ol prins blong hem tu oli givim ol kontribusen olsem ofring we man i glad nomo blong givim, oli givim ol samting ya blong ol man, ol pris mo ol Livaet. Hilkia,+ Sekaraea, mo Jehiel, we oli lida long haos blong tru God, oli givim long ol pris, 2,600 animol blong mekem sakrefaes blong Pasova mo 300 buluk.
9 Konania, wetem Semaea mo Netanel we tufala i brata blong hem, mo Hasabia, Jeiel, Josabad, we oli lida blong ol Livaet, olgeta oli givim kontribusen blong olgeta long ol Livaet, hemia 5,000 animol blong mekem sakrefaes blong Pasova, mo 500 buluk.
10 Nao oli mekemrere ol samting blong lafet ya, mo ol pris oli stanap long ol ples blong olgeta mo ol Livaet oli stanap folem ol grup blong olgeta,+ olsem we king i bin talem.
11 Oli kilim ol animol blong mekem sakrefaes blong Pasova,+ mo oli givim blad blong olgeta long ol pris, nao oli saksakem antap long olta.+ Long taem ya, ol Livaet oli stap katemaot skin blong ol animol.+
12 Biaen oli mekemrere ol ofring we oli blong bon fulwan, blong seremaot long ol narafala man we oli stap long ol grup folem laen blong papa blong olgeta. Nao bambae olgeta oli save givim i go long Jehova, olsem we oli raetem long buk blong Moses. Mo oli mekem olsem tu long ol buluk.
13 Oli kukum* mit blong ofring blong Pasova long faea folem kastom we oli stap mekem oltaem.+ Mo oli kukum ol tabu ofring long ol sospen, ol bigbigfala sospen, mo long ol fraepan, biaen oli hariap blong givimaot ol mit ya long ol man.
14 Biaen oli mekemrere sakrefaes blong Pasova we i blong olgeta mo blong ol pris, from we ol pris, olgeta we oli kamaot biaen long Eron, oli stap bonem ofring ya we i bon fulwan mo ol gris, go kasem tudak. From samting ya, ol Livaet oli mekemrere ol kakae blong Pasova blong olgeta mo blong ol pris, hemia olgeta we oli kamaot biaen long Eron.
15 Mo ol man blong singsing, hemia ol boe blong Asaf,+ oli stap long ol ples blong olgeta folem komanmen blong Deved,+ Asaf,+ Heman, mo Jedutun,+ man blong king we i stap luk vison. Mo ol man blong gad long get, oli stap long ol defdefren get.+ Olgeta oli no nid blong aot long wok blong olgeta, from we ol brata blong olgeta we oli ol Livaet, oli stap mekemrere ol kakae blong Pasova blong olgeta.
16 Nao long dei ya, olgeta oli mekemrere evri wok blong Jehova blong oli save mekem lafet blong Pasova,+ mo bonem ol ofring oli bon fulwan antap long olta blong Jehova. Oli mekem olsem folem oda blong King Josaea.+
17 Ol man Isrel we oli stap long taem ya, oli mekem lafet blong Pasova mo oli mekem Lafet Blong Bred We i No Gat Is blong seven dei.+
18 I neva gat wan Pasova olsem long Isrel, i stat long taem blong profet Samuel. Mo i no gat wan narafala king blong Isrel we i mekem wan Pasova olsem hemia we Josaea,+ ol pris, ol Livaet, olgeta man Juda, ol man Isrel we oli stap long taem ya, mo ol man Jerusalem, oli mekem.
19 Oli mekem Pasova ya long namba 18 yia blong rul blong Josaea.
20 Afta long olgeta samting ya, taem Josaea i wokem gud tempol,* King Neko+ blong Ijip, i kam blong faet long Kakemis, klosap long Yufretes Reva. Nao Josaea i goaot blong faet agensem hem.+
21 Nao King Neko i sanem sam mesenja blong oli go luk hem, mo talem se: “O king blong Juda, ?yu yu gat wanem bisnes long samting ya? Mi mi no kam tede blong faet agensem yu, be blong faet agensem wan narafala haos, mo God i talem se mi mas hariap. Sipos yu wantem laef, yu gobak, from we God i stap wetem mi. I nogud hem i spolem gud yu.”
22 Be Josaea i no wantem gowe long hem. Hem i jenisim ol klos blong hem blong ol man oli no luksave hem,+ mo i go blong faet agensem Neko. Hem i no wantem lesin long ol tok blong Neko we oli kamaot long maot blong God. Nao hem i go blong faet long Levelples Blong Megido.+
23 Nao ol man blong sut long bonara oli sutum King Josaea, ale hem i talem long ol man blong wok blong hem se: “Yufala i tekemaot mi long ples ya, from we mi kasem bigfala kil.”
24 Nao ol man blong wok blong hem oli tekemaot hem long Jariot mo oli putum hem long seken jariot blong faet blong hem, mo oli tekem hem i go long Jerusalem. Long rod ya, hem i ded mo oli berem hem long tomb blong ol olfala blong hem,+ mo olgeta man Juda mo Jerusalem oli krae from hem.
25 Nao Jeremaea+ i singsing sore* from Josaea. Mo kam kasem tede, olgeta man mo woman blong singsing+ oli gohed blong tokbaot Josaea long ol singsing sore we oli mekem. Mo oli mekem wan desisen se oli mas singsing long ol singsing ya long Isrel, mo oli raetem olgeta wetem ol narafala singsing sore.
26 Ol narafala samting long stori blong Josaea mo ol samting we hem i mekem blong soemaot se oltaem i lavem God, taem i folem ol samting we oli raetem long Loa blong Jehova,
27 mo ol samting we hem i mekem, stat long stat blong hem i go kasem en blong hem, oli raetemdaon long Buk Blong Ol King Blong Isrel Mo Juda.+