Seken Buk Blong Kronikel 31:1-21
31 Stret afta we oli finisim olgeta samting ya, olgeta man Isrel we oli stap long ples ya, oli go long olgeta taon blong Juda, nao oli smasem ol tabu ston,+ oli katemdaon ol tabu pos,*+ oli brekemdaon ol hae ples blong wosip+ mo ol olta+ we oli stap olbaot long Juda, Benjamin, wetem long Efrem mo Manase,+ gogo kasem we oli spolemgud evriwan. Biaen, ol man Isrel ya oli gobak long ol taon blong olgeta, mo wanwan long olgeta i gobak long graon blong hem.
2 Biaen Hesekia i putumap ol pris long ol grup blong olgeta+ mo ol Livaet long ol grup blong olgeta.+ Mo hem i putumap olgeta pris mo Livaet wanwan long ol wok blong olgeta,+ hemia blong bonem ofring we i bon fulwan mo sakrefaes blong pis, mo blong oli mekem minista wok blong God, mo blong oli talem tangkiu mo presem God long ol get blong ol yad* blong Jehova.+
3 Nao king i givim sam long ol animol blong hem, blong oli mekem ofring we i bon fulwan,+ wetem ol ofring we oli stap mekem long moning mo long sapa,+ mo ol ofring we i bon fulwan we oli stap mekem long ol Sabat,+ long niu mun,+ mo long ol narafala lafet,+ olsem we oli raetemdaon long Loa blong Jehova.
4 Mo tu, hem i givim oda long ol man we oli stap long Jerusalem blong oli givim haf we i blong ol pris mo ol Livaet,+ nao long rod ya oli stap folemgud loa blong Jehova.
5 Stret afta we oda ya i goaot, ol man Isrel oli givim ol fasfrut blong ol sid we oli plante we plante, mo oli givim ol niufala waen, oel,+ hani, mo olgeta defdefren kaen kakae blong garen.+ Oli hivimap ol defdefren kakae ya i go long ten hip nao oli karem taet blong olgeta i kam we i plante we plante.+
6 Mo ol man Isrel wetem ol man Juda we oli stap long ol taon blong Juda, olgeta tu oli hivimap ol buluk mo ol sipsip blong olgeta long ten hip mo oli tekem wan hip i kam, mo oli mekem olsem tu long ol samting we oli mekem i tabu,+ i blong God blong olgeta Jehova. Nao oli tekem ol samting ya i kam mo oli putum long plante hip.
7 Long namba 3 manis,+ oli stat blong hivimap ol kontribusen blong olgeta i go long ol hip, mo oli finis long namba 7 manis.+
8 Taem Hesekia wetem ol prins oli kam, mo oli luk ol hip ya, oli presem Jehova mo oli blesem ol man blong hem, ol man Isrel.
9 Nao Hesekia i askem long ol pris mo ol Livaet long saed blong ol hip ya,
10 nao Asaria we i jif pris long haos blong Jadok, i talem long hem se: “Long taem ya we ol man oli stat blong karem ol kontribusen i kam long haos blong Jehova,+ ol man oli stap kakae gogo oli fulap gud, be i gat plante kakae yet i stap, from we Jehova i stap blesem ol man blong hem. Mo ol kakae we i stap yet, hemia nao ol hip ya.”+
11 Nao Hesekia i talem long olgeta blong oli rerem ol storum*+ long haos blong Jehova, ale oli rerem ol storum ya.
12 Mo oli gohed nomo blong tekem ol kontribusen i kam, wetem ol namba 10 hip blong ol samting,*+ mo ol samting we oli tabu. Oli putumap Livaet ya Konania, blong hem nao i lukaot long olgeta samting ya, mo brata blong hem Simei i namba 2 long hem.
13 Mo folem oda blong King Hesekia, Jehiel wetem Asasia, mo Nahat, Asahel, Jerimot, Josabad, Eliel, Ismakaea, Mahat, mo Benaea, oli stap blong givhan long Konania mo brata blong hem Simei, mo Asaria i lukaot long haos blong tru God.
14 Mo Kore we i boe blong Imnaha, wan Livaet we i stap gad long get long saed i go long is,+ hem nao i lukaot long ol ofring we ol man oli glad nomo blong givim+ long tru God, mo hem nao i stap seremaot ol kontribusen we man i givim long Jehova+ mo ol samting we oli tabu we oli tabu.+
15 Mo olgeta we oli stap aninit long hem, i gat Iden, Miniamin, Jesua, Semaea, Amaria, mo Sekania. Olgeta ya oli stap long ol taon blong ol pris,+ mo ol man oli trastem olgeta blong oli seremaot gud ol samting long ol brata blong olgeta, folem ol grup blong olgeta,+ i stat long olgeta we oli bigwan i go kasem olgeta we oli smol.
16 Mo oli seremaot ol samting tu long olgeta we evri dei oli stap kam blong wok long haos blong Jehova mo oli wok folem ol grup blong olgeta, wetem ol boe blong olgeta we oli gat tri yia i go antap, we nem blong olgeta i stap long lis blong famle blong olgeta.
17 Oli wokem lis blong ol famle blong ol pris folem haos blong papa blong olgeta,+ mo oli wokem wan blong ol Livaet we oli gat 20 yia i go antap,+ folem ol wok we oli mekem long ol grup blong olgeta.+
18 Long ol lis ya blong ol famle, i gat nem blong ol waef blong olgeta tu, wetem ol boe, ol gel mo ol smol pikinini blong olgeta, hemia ful kongregesen blong olgeta, from we olgeta ya oli mekem olgeta oli klin blong mekem samting we i tabu, mo ol man oli trastem olgeta.
19 Mo tu, i gat nem blong olgeta we oli kamaot biaen long Eron, hemia ol pris we oli stap long ol open ples we i stap raonabaot long ol taon blong olgeta.+ Long olgeta taon, oli jusumaot nem blong sam man blong oli seremaot ol samting long evri man we oli stap long medel blong ol pris mo long evriwan we nem blong olgeta i stap long lis blong ol famle blong ol Livaet.
20 Hesekia i mekem samting ya long olgeta ples long Juda, mo hem i gohed blong mekem samting we i gud mo i stret long fored blong Jehova we i God blong hem, mo i gohed blong stap tru long hem.
21 Mo evri wok we hem i mekem blong lukaotem God blong hem, nomata se i joen wetem wok long haos blong tru God+ o wetem Loa mo komanmen, be hem i mekem olgeta wok ya wetem fulhat blong hem, mo wok ya i go gud.
