1 Samiɛli 9:1-27
-
Samiɛli nin Saili be wunnin be wun (1-27)
9 Bɛnzamɛn akpasua’n nun bian kun o lɛ’n, be flɛ i Kisi.+ Ɔ ti Abiɛli i wa, i kusu ti Zerɔɔ i wa, i kusu ti Bekorati i wa, yɛ i kusu ti Afia i wa. Ɔ ti Bɛnzamɛnfuɛ+ yɛ ɔ ti aɲanbeunfuɛ dan.
2 I wa yasua kun suan Saili.+ Ɔ ti gbanflɛn klanman kpa. (Izraɛli mɛn’n nun’n, sran fi i klanman’n trɛmɛn i.) Asa ekun’n, i ti’n tra sran’m be kwlaa be su.
3 Kɛ Saili i si Kisi i aflunmun’m* be mlinnin’n, Kisi seli i wa Saili kɛ: “Yaci, a nin junman difuɛ’m be nun kun be wɔ be ko kunndɛ aflunmun mun.”
4 Be wlan sinnin Efraimun okaoka lika’n nun ɔ nin Salisa asa’n su. Sanngɛ b’a wunman be. Be sinnin Saalimun asa’n su, sanngɛ b’a wunman aflunmun mun lɔ. Be wlanwlannin Bɛnzamɛnfuɛ’m be lika wunmuan’n nun. Sanngɛ b’a wunman be.
5 Kɛ be juli Zifi asa’n su’n, Saili seli i junman difuɛ m’ɔ o i wun lɛ’n kɛ: “Maan e sa e sin e wɔ. Afin sɛ y’a yoman sɔ’n, min si su buman aflunmun’m be akunndan kun. E ti yɛ ɔ́ wá kókó siɛn’n niɔn.”+
6 Yɛ i junman difuɛ’n seli kɛ: “Ɲanmiɛn i sran kun o klɔ nga su. Sran’m be ɲin yi i kpa. Ndɛ kwlaa ng’ɔ kan’n, ɔ kpɛn su.+ I sɔ’n ti’n, maan e wɔ lɔ ikisa. Atrɛkpa’n, ɔ́ klé e lika ng’ɔ fata kɛ e wɔ’n.”
7 Saili seli i junman difuɛ’n kɛ: “?Sɛ e kɔ’n, ngue yɛ é fá mán bian’n niɔn? E leman kpanwun e saki’m be nun kun. Like fi nunman e sa nun naan y’a fa cɛ Ɲanmiɛn Kpli i sran’n. ?Ngue yɛ e le i-ɔ?”
8 Yɛ Saili i junman difuɛ’n tɛli su ekun kɛ: “Nian! Sika mma kun* o min sa nun wa. Ń fá mán Ɲanmiɛn Kpli i sran’n, kpɛkun ɔ́ klé e lika ng’ɔ fata kɛ e wɔ’n.”
9 (Laa Izraɛli lɔ’n, sɛ sran kun waan ɔ́ kó úsa Ɲanmiɛn i ndɛ wie’n, ɔ se kɛ: “Bla maan e ko wun jeliwafuɛ’n+ i wun.” Afin be nga be flɛ be kɛ Ɲanmiɛn ɲrun jranfuɛ andɛ’n, laa’n be flɛ be kɛ jeliwafuɛ.)
10 Kpɛkun Saili seli i junman difuɛ’n kɛ: “Nga a kɛnnin i lɛ’n ti su. E wɔ.” Yɛ be ɔli klɔ nga i su yɛ Ɲanmiɛn Kpli i sran’n wo’n su-ɔ.
11 Kɛ bé fú kpɔlɛ’n naan b’a to klɔ’n, be nin talua wie mɔ be su kɔ nzue nun’n, be yiali. Yɛ be usali be kɛ: “?Jeliwafuɛ’n wo wa?”+
12 Be tɛli su kɛ: “Ɔ o wa. Amun nian, ɔ o amun ɲrun lɔ. Amun wɔ ndɛndɛ. Andɛ yɛ ɔ bali klɔ wa-ɔ. Afin sran’m be su yi tɛ+ andɛ lika nglonglo’n su lɔ.+
13 Kɛ amun wlu klɔ’n nun cɛ’n, amún wún i. Amun kan amun wun, ɔ su wa kɔ lika nglonglo’n su lɔ like dilɛ. Sɛ ɔ nin-a juman lɔ’n, sran’m be nin-a diman like, afin i yɛ ɔ srɛ tɛ nga be yi’n su kwlaa naan sran nga be yiali be’n, b’a di like-ɔ. Ɔ maan amun wɔ ndɛndɛ, amún wún i.”
14 Yɛ be ɔli klɔ’n su lɔ-ɔ. Kɛ be juli klɔ’n i afiɛn’n, Samiɛli bali be atin kpalɛ naan ɔ́ fá be kɔ́ lika nglonglo’n su lɔ.
15 Cɛn nga sɛ i aliɛ cɛn’n Saili kɔ́ lɔ’n, Zoova seli* Samiɛli kɛ:
16 “Ainman dɔ kɛ nga sa su’n, ń fá sran kun ń kɔ́ ɔ sin. Sran sɔ’n fin Bɛnzamɛn asa’n su.+ Guɛ i ti su ngo naan ɔ yo Izraɛlifuɛ mɔ be ti min sran’n, be su kpɛn.+ Ɔ́ dé min sran mun Filistifuɛ’m be sa nun. Afin n wunnin ɲrɛnnɛn nga min sran’m be wun i’n. Yɛ kpanlɛ nga be kpan’n, w’a to min wa.”+
17 Kɛ Samiɛli wunnin Saili’n, Zoova seli i kɛ: “Sran nga n kɛnnin i ndɛ’n, mɔ n seli wɔ kɛ ɔ́ wá síe min sran mun’n, yɛ ɔ o lɛ-ɔ.”+
18 Saili toli Samiɛli klɔ’n i anuan’n nun lɔ naan w’a usɛ i kɛ: “?Yaci, jeliwafuɛ’n i sua’n wo nin?”
19 Samiɛli tɛli Saili su kɛ: “Min yɛ n ti jeliwafuɛ’n niɔn. Amun dun mmua maan e wɔ lika nglonglo’n su lɔ. E nin amun é dí like andɛ.+ Ainman nglɛmun’n, n ko man amun atin naan amun a wɔ. Like kwlaa nga amun klo kɛ amún sí i’n,* ń kán klé amun.
20 Nán amun klun titi amun aflunmun nga be mlinnin i cɛn ba nsan yɛ’n be ti.+ Afin be wunnin be. ?Izraɛli mɛn’n nun ninnge kpakpa’m be kwlaa be ti wan liɛ? ?Nán wɔ nin ɔ si i awlofuɛ’m be wunmuan’n be liɛ-ɔ?”+
21 Yɛ Saili tɛli su kɛ: “?Ngue ti yɛ a kan sɔ-ɔ? N fin Bɛnzamɛn akpasua’n nun. E yɛ e ti Izraɛli akpasua’m be nun kaan kpafuɛ’n niɔn.+ Yɛ Bɛnzamɛn akpasua’n nun awloboawlobo’m be nun’n, e awlobo liɛ’n yɛ ɔ leman ɲrun-ɔn.”
22 I sin’n, Samiɛli fali Saili nin i junman difuɛ’n ɔli aliɛ diwlɛ lɔ. Kpɛkun ɔ mannin be tranwlɛ sran nga be yiali be’n be kwlaa be ɲrun lɔ. Be nga be yiali be’n, be ti sran kɔe ablasan (30).
23 Samiɛli seli aliɛ tɔnfuɛ’n kɛ: “Nnɛn’n i lika nga n fa mannin wɔ mɔ n seli wɔ kɛ a yia su’n, fa blɛ min.”
24 Yɛ aliɛ tɔnfuɛ’n fali nnɛn’n i sɔwa’n nin nnɛn ng’ɔ o su’n fa bali-ɔ. Ɔ fa sieli i Saili i ɲrun lɛ. Yɛ Samiɛli seli kɛ: “Be fali like nga be fa sieli wɔ’n b’a taka ɔ bo. Di, afin andɛ cɛn liɛ’n ti yɛ be fa sieli wɔ-ɔ. Afin n seli be kɛ: ‘N yiali sran wie mun.’” Ɔ maan Saili nin Samiɛli be dili like likawlɛ cɛn sɔ’n nun.
25 I sin’n, be fɛli i lika nglonglo’n+ su lɔ be bali klɔ lɛ. Ɔ nin Saili be kokoli yalɛ ekun sua’n i ti su gbagblagba’n su lɔ.
26 Kɛ aliɛ cɛnnin’n, be jasoli nglɛmun ndɛ kpa’n. Kɛ wia’n fiteli’n, Samiɛli flɛli Saili sua’n i ti su gbagblagba’n su lɔ. Ɔ seli kɛ: “Siesie ɔ wun, afin n su wa man wɔ atin.” Yɛ Saili siesieli i wun-ɔn. Kpɛkun ɔ nin Samiɛli be fiteli.
27 Kɛ bé jrá bé kɔ́ klɔ’n i tiwa lɔ’n, Samiɛli seli Saili kɛ: “Se junman difuɛ’n+ kɛ ɔ dun e ɲrun mmua.” Yɛ bian’n dunnin mmua-ɔ. Samiɛli seli ekun kɛ: “Ɔ liɛ’n, jran naan n kan Ɲanmiɛn i nuan ndɛ’n n kle wɔ.”
Ja ngua lɔ ndɛ mun
^ Ebr., “aflunmun bla mun.”
^ Ebr., “sikli kun mɔ be bubu nun nnan’n, ɔ ti i bue kun.” Sikli kun ti gramun 11,4. Nian Nd. B14 nun.
^ Ebr., “tikeli i su’n su.”
^ Ebr., “ndɛ kwlaa ng’ɔ o amun klun’n.”
