1 Samiɛli 5:1-12
5 Kɛ Filistifuɛ’m be fali Ɲanmiɛn Kpli i Alaka’n+ Ebɛnin-Ezɛɛ lɛ’n, be fa ɔli Asdɔdu.
2 Filistifuɛ’m be fali Ɲanmiɛn Kpli i Alaka’n be ɔli Dagɔn i sua’n nun, kpɛkun be fa sieli i Dagɔn i wun lɛ.+
3 Kɛ i aliɛ cɛnnin m’ɔ Asdɔdufuɛ’m be jasoli nglɛmun ndɛ kpa’n, bé nían-ɔn, Dagɔn w’a tɔ, i ɲin utu ase Zoova i Alaka’n i ɲrun lɛ.+ Yɛ be mɛnnin i su be sieli i osu’n nun-ɔn.+
4 Kɛ aliɛ cɛnnin ekun mɔ be jasoli nglɛmun ndɛ kpa’n, bé nían-ɔn, Dagɔn w’a tɔ, i ɲin utu ase Zoova i Alaka’n i ɲrun lɛ. I ti’n nin i sa ngbabua’m b’a kpɛkpɛ, be gua amuin sua’n i anuan’n nun lɛ. Dagɔn i lika nga be yoli i kɛ jue sa’n,* yɛ ɔ kali lɛ-ɔ.
5 I sɔ’n ti yɛ andɛ nin andɛ’n, Dagɔn i ɲrun jranfuɛ mun nin be kwlaa nga be wlu Dagɔn i sua’n nun Asdɔdu lɔ’n, be tiaman Dagɔn i sua’n i anuan’n nun’n niɔn.
6 Kɛ ɔ yoli sɔ’n, Zoova wa kleli Asdɔdufuɛ’m be yalɛ dan. Ɔ fali koko yili i be nga be tran Asdɔdu’n nin i asa’n su’n be wun. Ɔ maan be wunnin ɲrɛnnɛn dan kpa.+
7 Kɛ Asdɔdufuɛ’m be wunnin sa ng’ɔ su ju’n, be seli kɛ: “Nán maan Izraɛli i Ɲanmiɛn’n i Alaka’n ka e wun wa. Afin ɔ su kle e nin Dagɔn m’ɔ ti e amuin’n e ɲrɛnnɛn dan.”
8 I sɔ’n ti’n, be yiali Filistifuɛ’m be siefuɛ’m be kwlaa. Kpɛkun be usali be kɛ: “?E yo Izraɛli i Ɲanmiɛn’n i Alaka’n i sɛ?” Yɛ be tɛli su kɛ: “Maan be fa ɔ Gati.”+ Ɔ maan be fali Izraɛli i Ɲanmiɛn’n i Alaka’n be ɔli Gati.
9 Kɛ be fa ɔli lɔ’n, Zoova wa kleli klɔ sɔ’n i sufuɛ’m be ɲrɛnnɛn. Sran’m be wunman kɛ bé yó be wun-ɔn. Ɔ fali ɲrɛnnɛn yili i be kwlaa be su. I bakan-o, i kpɛnngbɛn-o,* koko yoli be kwlaa kpan.+
10 I sɔ’n ti’n, be fali Ɲanmiɛn Kpli i Alaka’n be ɔli Ekrɔn.+ Sanngɛ kɛ Alaka’n juli Ekrɔn lɔ cɛ’n, lɔfuɛ’m be boli kpanlɛ bo. Be seli kɛ: “E nin e nvle’n nunfuɛ mun e kunlɛ ti yɛ b’a fa Izraɛli i Ɲanmiɛn’n i Alaka’n b’a ba wa-ɔ.”+
11 Ɔ maan be yiali Filistifuɛ’m be siefuɛ’m be kwlaa naan b’a se be kɛ: “Amun fa Izraɛli i Ɲanmiɛn’n i Alaka’n be wɔ amun ɲrun. Maan be fa ko sie i osu’n nun. I liɛ’n e nin e nvle nunfuɛ mun e su wuman.” Afin srɛ kunnin klɔ’n sufuɛ’m be dan, be kwlaa be bu i kɛ be su wa wu. Ɲanmiɛn Kpli kleli be yalɛ tɛtɛ kpa.+
12 Be nga b’a wuman’n, koko yoli be. Yɛ klɔfuɛ’m be kpannin lele naan be wa de be. Be kpanlɛ sɔ’n juli ɲanmiɛn su lɔ.
