1 Samiɛli 28:1-25
-
Saili ɔli wunnzue yifuɛ kun sin An-Dɔɔ lɔ (1-25)
28 Blɛ sɔ’n nun’n, Filistifuɛ’m be yiayiali be sonja akpasuaakpasua mun naan be nin Izraɛlifuɛ’m bé kó kún alɛ.+ I sɔ’n ti’n, Akisi seli Davidi kɛ: “Ɔ bɔbɔ a si jrɛiin kɛ a nin ɔ sran mun amún kó súnman min naan e ko kun alɛ. ?Nɛ́n i-ɔ?”+
2 Davidi kusu seli Akisi kɛ: “N ti ɔ sufuɛ. Ɔ maan ɔ bɔbɔ a si like nga ń yó’n.” Yɛ Akisi seli i kɛ: “I sɔ’n ti’n, á yó min gladi difuɛ tititi.”*+
3 Kɛ ɔ́ yó sɔ’n, nn Samiɛli w’a wu. Yɛ Izraɛlifuɛ’m be kwlaa be sunnin i, kpɛkun be sieli i Rama m’ɔ ti i klɔ’n+ su lɛ. Asa kusu’n, be nga be waan be nin be nga be wuli’n be ijɔ’n nin wunnzue yifuɛ mun’n, Saili nunnunnin be nvle’n nun sekeseke.+
4 Filistifuɛ’m be sonja’m be yiali, kpɛkun be ko boli be nanmue Sunɛmun lɛ.+ Saili kusu yiali Izraɛli lɔ sonja’m be kwlaa, kpɛkun be ko boli be nanmue liɛ’n Gilboa lɛ.+
5 Kɛ Saili wunnin Filistifuɛ’m be nanmue’n, i awlɛn’n sili i klun sa kpukpukpu, srɛ m’ɔ kunnin i’n ti.+
6 Saili usali Zoova i sa+ lele, sanngɛ Zoova w’a tɛmɛn i su. Ɔ kanman ndɛ klemɛn i laliɛ nun, ɔ faman Urimun’n+ tɛmɛn i su kusu. Yɛ i nuan ijɔfuɛ’m be kanman ndɛ kleman Saili.
7 Kasiɛn su’n, Saili wa seli i sufuɛ’m be kɛ: “Amun kunndɛ bla kun m’ɔ nin be nga be wuli’n be ijɔ’n+ man min naan n wɔ i sin.” Yɛ i sufuɛ’m be tɛli i su kɛ: “Nian, bla kun o An-Dɔɔ+ lɔ, ɔ nin be nga be wuli’n be ijɔ.”
8 Saili wlɛwlɛli i wun kɛ sran ngbɛn wie sa naan b’a wunmɛn i wlɛ. Kpɛkun ɔ nin i sran’m be nun nɲɔn be ɔli bla’n i sin kɔnguɛ. Ɔ seli bla’n kɛ: “Yaci, kɛ mɔ a nin be nga be wuli’n be ijɔ’n, yi wunnzue naan kan min ɲrun lɔ ndɛ kle min.+ Sran nga ń má klé wɔ’n, usɛ i sa man min.”
9 Sanngɛ bla’n tɛli i su kɛ: “?Ɔ bɔbɔ kpa’n, a siman sa nga Saili yoli’n? ?A siman kɛ ɔ nunnunnin sran nga be nin be nga be wuli’n be ijɔ’n nin wunnzue yifuɛ mun nvle’n nun?+ ?Yoo a bali min nganzua sualɛ naan be kun min?”+
10 Yɛ Saili tɛli i nda Zoova ɲrun. Ɔ seli kɛ: “N kan Zoova m’ɔ lafiman’n, be su manman ɔ ndɛ fi sa nga nun.”
11 I sɔ’n ti’n, bla’n seli kɛ: “?Wan yɛ a kunndɛ kɛ n usɛ i sa man wɔ-ɔ?” Saili tɛli i su kɛ: “Usa Samiɛli i sa man min.”
12 Kɛ bla’n wunnin “Samiɛli’n,”*+ ɔ kpannin kekle kpa. Kpɛkun ɔ seli Saili kɛ: “?Ngue ti yɛ a lakali min-ɔn? Saili yɛle wɔ!”
13 Famiɛn’n seli bla’n kɛ: “Nán srɛ kun wɔ. ?Ngue yɛ a wun i-ɔ?” Bla’n tɛli i su kɛ: “N wun aolia nun sran kun, ɔ fin asiɛ’n bo lɔ su fite.”
14 Yɛ ɔ usɛli i kɛ: “?Ɔ ti sɛ?” Bla’n seli kɛ: “Ɔ ti bian oke, tralɛ tɛnndɛn ng’ɔ o i wun’n leman sa.”+ Yɛ Saili wunnin i wlɛ kɛ “Samiɛli-ɔ.” Kpɛkun ɔ utuli i ɲin ase yɛ ɔ kotoli-ɔ.
15 Yɛ “Samiɛli” usali Saili kɛ: “?Ngue ti yɛ a flɛ min-ɔn? ?Ngue ti yɛ a kle min yalɛ-ɔ?” Saili tɛli i su kɛ: “N wunman sa ng’ɔ o min su’n i trawlɛ kaan sa. Filistifuɛ’m be nin min su kun, Ɲanmiɛn kusu nunman min sin kun. Kɛ n usɛ i sa’n, ɔ fɛmɛn i nuan ijɔfuɛ mun tɛman min su kun, yɛ ɔ kanman ndɛ kleman min laliɛ nun kun.+ I sɔ’n ti yɛ n bali ɔ wun wunlɛ naan a kle min like ng’ɔ fata kɛ n yo’n niɔn.”+
16 Yɛ “Samiɛli” seli i kɛ: “Ɔ bɔbɔ a si kɛ Zoova nunman ɔ sin kun,+ w’a kaci ɔ kpɔfuɛ. ?Ɔ maan ngue ti yɛ a usa min sa-ɔ?
17 Ndɛ nga Zoova kannin mɔ n boli su n kleli wɔ’n, i nuan su like yɛ ɔ́ wá yó-ɔ. Yɛle kɛ Zoova dé famiɛn bia’n ɔ sa nun, kpɛkun ɔ́ fá mán ɔ wiengu kun. Sran sɔ’n yɛle Davidi.+
18 Afin w’a nantiman Zoova i ndɛ’n su. Kpɛkun w’a kunman Amalɛkifuɛ m’ɔ fali be wun ya’n.+ I sɔ’n ti yɛ Zoova su yo wɔ sɔ andɛ-ɔ.
19 Asa ekun’n, Zoova wá fá wɔ nin Izraɛlifuɛ mun wlá Filistifuɛ’m be sa nun.+ Ainman’n, a+ nin ɔ mma’m+ bé tó min wa. Kpɛkun Zoova fá Izraɛli sonja mun wlá Filistifuɛ’m be sa nun.”+
20 Kɛ Saili tili “Samiɛli” i ndɛ’n, srɛ kunnin i dan kpa. Ɔ maan i bɔbɔ wunmuan’n tɔli asiɛ wun. Ɔ leman wunmiɛn ba kun sa kun. Afin kɛ ɔ fɛ i nglɛmun lele kɔnguɛ’n w’a diman like.
21 Kɛ bla’n wunngeli Saili i wun lɔ’n, ɔ wunnin kɛ i wla’n w’a bo i wun dan. Ɔ maan ɔ seli kɛ: “Famiɛn, like nga a seli min kɛ n yo’n, n yoli. N fali min nguan’n n sieli i wie nuan+ yɛ n yoli like nga a seli min kɛ n yo’n niɔn.
22 I sɔ’n ti’n, yaci, fa ndɛ nga n su wa kan’n su. Maan n blɛ wɔ kpanwun losin kun naan di. I liɛ’n, á ɲán wunmiɛn kan naan w’a fa atin’n.”
23 Sanngɛ w’a kplinman su. Ɔ seli kɛ: “N diman like.” Sanngɛ i sufuɛ mun nin bla’n be srɛli i lelele. Ɔ maan kasiɛn su’n, ɔ wa fali be ndɛ’n su. Ɔ jasoli asiɛ wun, kpɛkun ɔ ko trannin bɛ’n su.
24 Yɛ bla’n ko fɛli i nannin ba ng’ɔ tɛ i’n, naan w’a kun i* ndɛndɛ. Kpɛkun ɔ fali ble* sanmlɛn, ɔ fɔtɔli naan w’a fa tɔn kpanwun mɔ levii nunman nun’n.
25 Ɔ fa mannin Saili nin i sufuɛ mun. Kɛ be dili’n, be ɔli kɔnguɛ sɔ’n nun.+
Ja ngua lɔ ndɛ mun
^ Ebr., “Á dí min ti’n i gladi cɛn kwlakwla.”
^ Annzɛ “like ng’ɔ fiteli’n, mɔ kɛ a wun i’n, á sé kɛ Samiɛli’n.”
^ Annzɛ “w’a fa yi tɛ.”
^ Annzɛ “ɔɔzu.”
