1 Samiɛli 2:1-36
2 Kpɛkun Anin srɛli Ɲanmiɛn. Ɔ seli kɛ:
“Zoova ti’n min klun w’a jɔ,+Zoova w’a man min wunmiɛn.*
N kwla tɛ min kpɔfuɛ’m be su kpa siɛn’n,afin sa nga a yo fa de sran’n ti’n, min klun jɔ.
2 Sran fi timan sanwun kɛ Zoova sa,sran fi timan kɛ wɔ sa,+yɔbuɛ wie fi timan kɛ e Ɲanmiɛn’n sa.+
3 Maan be yaci ndɛ kpakpa’m be kanlɛ,nán maan be ti ndɛ dandan amun nuan nun,afin Zoova ti Ɲanmiɛn kun m’ɔ si sa-ɔ,+ɔ di sa’n kwlaa su jɔlɛ sɛsɛsɛ.
4 Be nga be le wunmiɛn’n, be ta mma’m be nun w’a bubu,sanngɛ be man be nga be ti fakafaka’n* be wunmiɛn.+
5 Be nga be di like kpa laa’n, ɔ fata kɛ be di junman naan b’a ɲan kpanwun b’a di,sanngɛ be nga awe’n kun be laa’n, awe’n kunman be kun.+
Bla nga i klun ti kpan’n w’a wu ba nso,+sanngɛ bla ng’ɔ le ba kpanngban laa’n, ɔ kwlá wuman wie kun.*
6 Zoova kun sran, yɛ ɔ yo maan sran ka nguan nun,*ɔ fa sran jra Ndia’n* nun, yɛ ɔ fa sran lɔ fite.+
7 Zoova maan sran di yalɛ, yɛ ɔ yo maan sran ɲɛn i wun,+ɔ kan sran ase, yɛ ɔ man sran su.+
8 Ɔ man be nga be leman wie’n be su ndutre’n nun,ɔ man yalɛfuɛ’n su naan ɔ fin nzuɛn’n* nun fite,+
naan be nin be nga be le ɲrun’n be tran likawlɛ,kpɛkun ɔ man be tranwlɛ kpa.
Asiɛ’n i ja’m be takatakawlɛ’n ti Zoova liɛ,+ɔ fa mɛn’n taka be su.
9 Be nga be nin i nanti nanwlɛ su’n, ɔ nian be ja nga be tu’n su,+sanngɛ klunwifuɛ’m be liɛ’n, bé kún be aosin’n nun,+afin sɛ sran kun fíte nun’n, ɔ finmɛn i wunmiɛn’n.+
10 Zoova wá núnnún be nga be nin i be kun’n,*+ɔ́ jrán ɲanmiɛn su lɔ ɔ́ kpán be su kplannankplannan.+
Zoova dí jɔlɛ jú asiɛ’n itiwa lɔ,+ɔ́ mɛ́n i famiɛn’n i tinmin+yɛ ɔ́ yó maan i sran ng’ɔ guɛli i ti su ngo’n, ɔ́ ɲán wunmiɛn* dan trá laa’n.”+
11 Kɛ ɔ yoli sɔ’n, Ɛlkana sɛli i sin ɔli i awlo, Rama lɔ. Sanngɛ ba’n kali Eli m’ɔ ti Ɲanmiɛn ɲrun jranfuɛ’n i wun lɔ, yɛ ɔ dili junman mannin* Zoova.+
12 Sanngɛ Eli i mma’m be klun yo wi dan.+ Be buman Zoova like fi.
13 Kɛ sran’m be fa ninnge ng’ɔ fata kɛ be fa man Ɲanmiɛn ɲrun jranfuɛ mun’n be ba’n, like nga be yo’n yɛ:+ Kɛ sran kun ko yi tɛ’n, mɔ b’a jin nnɛn’n i sin’n su’n, Ɲanmiɛn ɲrun jranfuɛ’n i sran kun ko fa atiɛ kun mɔ i je’m be ti nsan’n ɔ ba.
14 Kpɛkun ɔ fa wla blalɛ sɛ’n, annzɛ kasrɔ’n, annzɛ sɛ’n nun. Kɛ ɔ́ yí atiɛ je’n, nnɛn kwlaa ng’ɔ o su’n, Ɲanmiɛn ɲrun jranfuɛ’n fa. Izraɛlifuɛ kwlaa ng’ɔ kɔ Silo lɔ’n, kɛ be yo i kɛ ngalɛ’n sa.
15 Asa ekun’n, kwlaa naan sran ng’ɔ su yi tɛ’n w’a sie nnɛn’n i lui’n sin’n su naan sin wunsrɛn’n w’a fite’n,+ Ɲanmiɛn ɲrun jranfuɛ’n i sran’n ba. Kpɛkun ɔ se i kɛ: “Man Ɲanmiɛn ɲrun jranfuɛ’n i nnɛn naan ɔ ko ɲintɔn. Sɛ a mɛn i nnɛn nga a tɔnnin’n, ɔ su sɔman nun. Saan nnɛn mɔnnɛn yɛ ɔ́ sɔ́ nun-ɔn.”
16 Kɛ ɔ ko yo sɔ’n, sran’n se i kɛ: “Maan be yra nnɛn’n i lui’n sin’n su naan sin wunsrɛn fite ka.+ I liɛ’n, i kwlaa nga a klo kɛ á fá’n, a kwla fa.” Sanngɛ ɔ tɛ i su kɛ: “Cɛcɛ, fa man min icra’n. Sɛ w’a yoman sɔ’n, ń fɛ́ i kekle nun!”
17 Ɔ maan sran sɔ’m be sa tɛ nga be yo’n, ɔ wa yoli dan ngboko Zoova ɲrun.+ Afin be yo ninnge nga sran’m be fa man Zoova’n i finfin.
18 Samiɛli liɛ’n, ɔ su+ Zoova.* Kusu nn ɔ te yo bakan. Efɔdu nga lɛn yɛ be fa wuli’n,+ yɛ ɔ wlɛ i wun-ɔn.
19 Afuɛ kwlakwla’n, i manmin wu tralɛ tɛnndɛn kun m’ɔ leman sa’n. Kpɛkun kɛ ɔ nin i wun be kɔ tɛ nga be yi i afuɛ nuan kwlaa’n i yilɛ’n, ɔ fa ko mɛn i.+
20 Cɛn kun’n, Eli boli muae mannin Ɛlkana nin i yi. Kpɛkun ɔ seli Ɛlkana kɛ: “Maan Zoova yo naan ɔ yi nga wu ba kun man wɔ naan ɔ sin ba nga a fa mannin Zoova’n i osu.”+ Yɛ be sali be sin ɔli be awlo-ɔ.
21 Zoova buli Anin i akunndan. Ɔ maan ɔ kwla wuli ba.+ Ɔ wuli ba yasua nsan ekun nin ba bla nɲɔn. Samiɛli liɛ’n, ɔ ɲin kɔ i ɲrun titi Zoova ɲrun.+
22 Kɛ ɔ́ yó sɔ’n, nn Eli w’a yo oke kpa. Like kwlaa nga i mma yasua’m be fa yo+ Izraɛlifuɛ mun’n, ɔ tili. Ɔ tili i kɛ be nin bla nga be di junman tannin sua mɔ Ɲanmiɛn yi i wun nglo nun’n i ɲrun lɛ’n be la.+
23 Ɔ seli be kɛ: “?Ngue ti yɛ amun yo ninnge kɛ ngalɛ’n sa mun-ɔn? Afin amun su ndɛ nga n ti i sran’m be kwlaa be nuan nun’n, ɔ ti tɛ.
24 Min mma mun, nán amun yo sɔ kun. Amun su ndɛ nga Zoova i sran’m be kan sin mɔ n ti’n, ɔ timan kpa.
25 Sɛ sran kun yo i wiengu tɛ’n, sran wie kwla kpli i ti Zoova ɲrun.* ?Sanngɛ sɛ sran kun yo Zoova i sa’n,+ wan yɛ ɔ kwla srɛ i ti-ɔ?” Sanngɛ b’a faman be si’n i ndɛ’n su. Afin Zoova waan ɔ́ yó naan be wu.+
26 Kɛ ɔ́ yó sɔ’n, nn Samiɛli kan’n, ɔ́ ɲín kɔ́ i ɲrun. Yɛ i wun yo Zoova nin sran’m be fɛ titi.+
27 Cɛn kun’n, Ɲanmiɛn i sran kun wa seli Eli kɛ: “Zoova waan yoo: ‘?I nun mɔ ɔ si i awlofuɛ’m be ti kanga Faraɔn i awlo’n nun Ezipti lɔ’n, m’an yiman min wun nglo weinwein m’an kleman be?+
28 Kɛ n nianniannin Izraɛli akpasua’m be kwlaa be nun’n, ɔ si yɛ n kpɛli i+ kɛ ɔ yo min ɲrun jranfuɛ naan ɔ wunnge min tɛ yiwlɛ’n+ i wun lɔ naan ɔ yi tɛ, ɔ yra ansan,* yɛ ɔ wla efɔdu min ɲrun lɛ-ɔ. N kusu n fali ninnge nga Izraɛlifuɛ’m* be fa sie i sin’n su be man min’n, i kwlaa mannin ɔ nannan’n i awlofuɛ mun.+
29 ?Ngue ti yɛ tɛ nga n seli kɛ be yi man min’n, ɔ nin like nga n seli kɛ be fa man min min tranwlɛ lɔ’n, amun yo be finfin-ɔn?*+ ?Ngue ti yɛ a bu ɔ mma’m be sran tra min-ɔn? ?Ngue ti yɛ amun di ninnge kwlaa nga Izraɛlifuɛ mɔ be ti min sran’n be fa man min’n i kpa lika mun-ɔn?+
30 “‘I sɔ’n ti’n, Zoova m’ɔ ti Izraɛli i Ɲanmiɛn’n waan yoo: “N kɛnnin i sakpasakpa kɛ ɔ awlofuɛ mun, nin ɔ nannan’m be awlofuɛ’m bé nánti min ɲrun tititi.”+ Sanngɛ ndɛ nga Zoova kɛn i siɛn’n yɛ: “Ɔ su yoman sɔ kun. Afin be nga be bu min sran’n, ń bú be sran wie.+ Sanngɛ be nga be yo min finfin’n, ń yó be finfin wie.”
31 Nian! Cɛn wie lele’n, ń yó maan ɔ bɔbɔ nin ɔ si i awlofuɛ’m be su ɲanman fanngan* kun. Ɔ maan ɔ awlo’n nun sran ba kun sa su yoman oke naan w’a wu.+
32 Kɛ Izraɛlifuɛ’m bé wún be wun fɛ’n, nn ɔ kpɔfuɛ’n ti ɔ ɲin bo lɛ min tranwlɛ’n nun.+ Yɛ sran oke wie fi su tranman ɔ awlo’n nun kun le.
33 Ń yáci ɔ osu’n nunfuɛ kun lɛ naan ɔ di junman man min min tɛ yiwlɛ’n su. I dunman nun ti’n, a su wunman ase kpa kun, yɛ ɔ wla bó ɔ wun. Sanngɛ tokofi yɛ bé fá kún ɔ awlofuɛ’m be nun sunman-ɔn.+
34 Sa ng’ɔ́ wá jú ɔ mma nɲɔn mun, yɛle kɛ Ɔfnin nin Fineasi be su’n, ɔ ti min ndɛ’n i nzɔliɛ: Be nɲɔn’n bé wú le kunngba.+
35 Kɛ ɔ ko yo sɔ’n, ń fá min ɲrun jranfuɛ kun m’ɔ ti nanwlɛfuɛ’n.+ Ɔ́ yó min klun sa. Kpɛkun ń yó maan i osu’n nunfuɛ’m bé yó min ɲrun jranfuɛ tititi. Yɛ ɔ́ nánti min sran nga n guɛli i ti su ngo’n i ɲrun tititi.
36 Ɔ awlofuɛ kwlaa ng’ɔ́ ká lɛ’n, ɔ́ bá wá kótó i bo naan w’a ɲan sika nin kpanwun kan w’a di. Kpɛkun ɔ́ sé kɛ: “Yaci, sie min Ɲanmiɛn ɲrun jranfuɛ. I liɛ’n, ń ɲán kpanwun losin kan ń dí.”’”+
Ja ngua lɔ ndɛ mun
^ Ebr., “Zoova w’a man min wɛ’n su.” Nian Ndɛ’m be bo tulɛ lika’n nun lɔ, “Wɛ.”
^ Annzɛ “be nga be su tɔ’n.”
^ Ebr., “w’a wu kee.”
^ Annzɛ “ɔ man nguan.”
^ Nian Ndɛ’m be bo tulɛ lika’n nun lɔ.
^ Be kwla se ekun kɛ “wla guawlɛ’n.”
^ Ebr., “wɛ.” Nian Ndɛ’m be bo tulɛ lika’n nun lɔ.
^ Be kwla se ekun kɛ “Be nga be nin Zoova be tu’n, be wawɛ tɔ́ blo.”
^ Annzɛ “ɔ suli.”
^ Annzɛ “ɔ di junman Zoova ɲrun.”
^ Be kwla se ekun kɛ “Ɲanmiɛn jrɛ́n i sin.”
^ Ebr., “Izraɛli i mma mun.”
^ Be kwla se ekun kɛ “be yi tɛ naan sin wunsrɛn’n fite lukuu.”
^ Ebr., “amun tu amun ja si be.”
^ Ebr., “sa.”
