An Pahayag kan Juan 13:1-18

  • Mapintas nga hayop nga may pito nga ulo nga tikang ha dagat (1-10)

  • Hayop nga may duha nga sungay nga tikang ha tuna (11-13)

  • Imahen han hayop nga may pito nga ulo (14, 15)

  • Marka ngan numero han mapintas nga hayop (16-18)

13  Ngan tinindog ito* nga waray kiwa-kiwa ha baras han dagat. Ngan nakita ko an usa nga mapintas nga hayop+ nga nahaw-as ha dagat,+ nga may napulo nga sungay ngan pito nga ulo, ngan ha mga sungay hito may napulo nga korona,* pero ha mga ulo hito may mga ngaran nga nagpapasipara.  Yana an mapintas nga hayop nga akon nakita pariho hin leopardo, pero an mga tiil hito pariho hin kanan oso, ngan an baba hito pariho han baba hin leon. Ngan an gahum han hayop, an trono hito ngan daku nga awtoridad iginhatag han dragon.+  Nakita ko nga an usa han mga ulo hito baga hin nasamaran nga puydi ikamatay, pero nag-opay an grabe nga samad hito,+ ngan an bug-os nga tuna nagsunod ha mapintas nga hayop upod an pagdayaw.  Ngan ira ginsingba an dragon kay iginhatag hito an awtoridad ha mapintas nga hayop, ngan ira ginsingba an mapintas nga hayop hini nga mga pulong: “Hin-o an pariho ha mapintas nga hayop, ngan hin-o an makakahimo pakig-away hito?”  Gintagan ito hin baba nga nagyayakan hin dagku nga mga butang ngan mga pagpasipara, ngan gintagan ito hin awtoridad nga magbuhat ha sulod hin 42 ka bulan.+  Ngan nagyakan ito hin mga pagpasipara+ kontra ha Dios basi pasiparahan an iya ngaran ngan an iya urukyan, bisan an mga naukoy ha langit.+  Gintugotan ito nga makiggirra ha mga baraan ngan daugon hira,+ ngan gintagan ito hin awtoridad ha tagsa nga tribo ngan katawohan ngan pinulongan* ngan nasud.  Ngan an ngatanan nga naukoy ha tuna magsisingba hito. Tikang pa ha tinikangan han kalibotan, waray bisan usa ha ira ngaran an nahisurat ha linukot nga basahon han kinabuhi+ han Kordero nga ginpatay.+  Kon an bisan hin-o may-ada talinga, mamati hiya.+ 10  Kon an bisan hin-o para ha pagkabihag, mabibihag hiya. Kon an bisan hin-o magpapatay pinaagi han espada,* kinahanglan patayon hiya pinaagi han espada.+ Ini nga mga kahimtang nagkikinahanglan hin pagpailob+ ngan pagtoo+ ha bahin han mga baraan.+ 11  Katapos, nakita ko an usa pa nga mapintas nga hayop nga nagawas tikang ha tuna, ngan may duha ito nga sungay pariho hin nati nga karnero, pero nagtikang ito pagyakan pariho hin dragon.+ 12  Ginagamit hito an ngatanan nga awtoridad han siyahan nga mapintas nga hayop+ ha presensya hito. Ngan ginpapasingba hito an tuna ngan an mga umurukoy hito ha siyahan nga mapintas nga hayop, nga nag-opay an grabe nga samad.+ 13  Ngan nagbubuhat ito hin dagku nga mga tigaman, nagpapahulog pa ngani hin kalayo tikang ha langit ngadto ha tuna nga nakikita han katawohan. 14  Ginlilimbongan hito an mga naukoy ha tuna, tungod han mga tigaman nga igintugot nga buhaton hito ha presensya han mapintas nga hayop, samtang ginsisidngan hito an mga naukoy ha tuna nga maghimo hin imahen+ han mapintas nga hayop nga may tinigbasan han espada pero nabuhi pa.+ 15  Ngan gintugotan ito nga maghatag hin gininhawa* ha imahen han mapintas nga hayop, basi an imahen han mapintas nga hayop makayakan ngan maipapatay an ngatanan nga nagdudumiri ha pagsingba han imahen han mapintas nga hayop. 16  Ginpipirit hito an ngatanan nga tawo—an mga ubos ngan an mga prominente, an mga riko ngan an mga pobre, an mga may kagawasan ngan an mga uripon—nga sadang hira markahan ha ira too nga kamot o ha ira agtang,+ 17  ngan waray bisan hin-o nga makakapalit o makakagbaligya labot la ha tawo nga may-ada han marka, an ngaran+ han mapintas nga hayop o an numero han ngaran hito.+ 18  Ini nga kahimtang nagkikinahanglan hin kinaadman: An may hilarom nga pagsabot magkwenta han numero han mapintas nga hayop, kay numero ito hin tawo, ngan an numero hito 666.+

Mga footnote

Karuyag sidngon, an dragon.
Kitaa an ftn. ha Pah 12:3.
O “yinaknan.”
O posible nga “Kon an bisan hin-o papatayon pinaagi han espada.”
O “espiritu.”