An Pahayag kan Juan 10:1-11

  • Makusog nga anghel may gutiay nga linukot nga basahon (1-7)

    • “Diri na gud maglalangan pa” (6)

    • Sagrado nga tinago matatapos (7)

  • Ginkaon ni Juan an gutiay nga linukot nga basahon (8-11)

10  Ngan nakita ko an usa pa nga makusog nga anghel nga nalusad tikang ha langit, nga napapanaptonan* hin dampog, ngan may balangaw ha iya ulo, ngan an iya nawong pariho han adlaw,+ ngan an iya mga bitiis* pariho hin mga harigi nga kalayo,  ngan may ginkakaptan hiya nga gutiay nga linukot nga basahon nga nakabuklad. Ngan igintamak niya an iya too nga tiil ha dagat, pero an iya wala nga tiil ha tuna,  ngan ginuliat hiya ha daku nga tingog pariho han pag-uwang han usa nga leon.+ Ngan han ginuliat hiya, an mga tingog han pito nga dalugdog+ nagyakan.  Yana han nagyakan an pito nga dalugdog, magsusurat na unta ako, pero nakabati ako hin tingog tikang ha langit+ nga nasiring: “Selyuhi an mga butang nga ginyakan han pito nga dalugdog, ngan ayaw ito isurat.”  An anghel nga akon nakita nga natindog ha dagat ngan ha tuna nag-alsa han iya too nga kamot ngadto ha langit,  ngan nanumpa hiya ha ngaran han Dios nga nabubuhi ha kadayonan, oo ha kadayonan,+ nga naglarang han langit ngan han mga butang nga aada hito ngan han tuna ngan han mga butang nga aada hito ngan han dagat ngan han mga butang nga aada hito:+ “Diri na gud maglalangan pa.  Pero ha mga adlaw nga hirani na huypan han ikapito nga anghel+ an iya trumpeta,+ an sagrado nga tinago+ nga iginpahayag han Dios sugad nga maopay nga sumat ha iya mismo mga uripon nga mga propeta+ ha pagkamatuod natapos na.”  Ngan nabatian ko an tingog tikang ha langit+ nga nakikiistorya utro ha akon ngan nasiring: “Kadto, kuhaa an linukot nga basahon nga nakabuklad nga aada ha kamot han anghel nga natindog ha dagat ngan ha tuna.”+  Kinadto ako ha anghel ngan nagsiring ha iya nga ihatag ha akon an gutiay nga linukot nga basahon. Nagsiring hiya ha akon: “Kuhaa ini ngan kaona ini,+ ngan papapaiton hini an imo tiyan, pero ha imo baba magigin matam-is ini pariho hin dugos.” 10  Ginkuha ko an gutiay nga linukot nga basahon ha kamot han anghel ngan ginkaon ito,+ ngan ha akon baba matam-is ito pariho hin dugos,+ pero han ginkaon ko na ito, nagpait an akon tiyan. 11  Ngan nagsiring hira ha akon: “Kinahanglan magtagna ka utro mahitungod han mga katawohan ngan mga nasud ngan mga pinulongan* ngan damu nga hadi.”

Mga footnote

O “napuputos.”
Lit., “mga tiil.”
O “mga yinaknan.”