An Pahayag kan Juan 11:1-19

  • An duha nga saksi (1-13)

    • Panagna hin 1,260 ka adlaw sul-ot an sako nga panapton (3)

    • Ginpatay ngan ginbayaan nga waray iglubong (7-10)

    • Nabuhi katapos han tulo ngan tunga ka adlaw (11, 12)

  • Ikaduha nga kairo natapos na, ikatulo maabot (14)

  • An ikapito nga trumpeta (15-19)

    • Ginhadian han aton Ginoo ngan han iya Kristo (15)

    • Nagbubungkag han tuna bubungkagon (18)

11  Ngan gintagan ako hin tangbo nga pariho hin tungkod*+ samtang nasiring hiya: “Buhát ngan sukla an santuaryo han templo han Dios ngan an halaran ngan an mga nagsisingba dida hito.  Pero mahitungod han bungsaran nga aadto ha gawas han santuaryo han templo, pabay-i ito ngan ayaw ito pagsukla, kay iginhatag na ito ha mga nasud, ngan pagtatamak-tamakan nira an baraan nga syudad+ ha sulod hin 42 ka bulan.+  Pahihinaboon ko nga managna an akon duha nga saksi ha sulod hin 1,260 ka adlaw nga nakasul-ot hin sako nga panapton.”  Ini hira ginsisimbolohan han duha nga kahoy nga olibo+ ngan han duha nga burutangan han lampara+ ngan natindog hira ha atubangan han Ginoo han tuna.+  Kon may bisan hin-o nga naruruyag magdaot ha ira, nagawas an kalayo ha ira baba ngan gin-uugtang an ira mga kaaway. Kon may bisan hin-o nga karuyag magdaot ha ira, kinahanglan patayon hiya ha sugad hini nga paagi.  Ini hira may awtoridad nga sadhan an langit+ basi diri umuran+ ha mga adlaw han ira panagna, ngan may awtoridad hira ha katubigan nga himoon ito nga dugo+ ngan hampakon an tuna han ngatanan nga klase hin peste hin sugad kaagsob han ira karuyag.  Kon matapos na nira an ira pagpamatuod, an mapintas nga hayop nga nagawas tikang ha kahiladman makikig-away ha ira ngan magdadaog ha ira ngan papatayon hira.+  Ngan an ira patay nga mga lawas mahingangada ha haluag nga kalye han daku nga syudad nga ha espirituwal nga kahulogan gintatawag nga Sodoma ngan Ehipto, diin an ira Ginoo ginpatay liwat ha kahoy.  Ngan adton tikang ha mga katawohan ngan mga tribo ngan mga pinulongan* ngan mga nasud magkikita han ira patay nga mga lawas ha sulod hin tulo ngan tunga ka adlaw,+ ngan diri hira matugot nga iglubong ha lubnganan an ira patay nga mga lawas. 10  Ngan an mga naukoy ha tuna nagrarayhak tungod ha ira ngan nagsiselebrar, ngan magpapadara hira hin mga regalo ha usa kag usa, kay ginpasakitan hini nga duha nga propeta an mga naukoy ha tuna. 11  Katapos han tulo ngan tunga ka adlaw, an espiritu han kinabuhi nga tikang ha Dios sinulod ha ira,+ ngan nanindog hira, ngan nahadlok gud an mga nakakita ha ira. 12  Ngan nakabati hira hin daku nga tingog tikang ha langit nga nasiring ha ira: “Saka kamo ngadi.” Ngan sinaka hira ngadto ha langit dida ha dampog, ngan an ira mga kaaway nakakita ha ira.* 13  Hito nga oras nagkaada hin daku nga linog, ngan narumpag an ikanapulo nga bahin han syudad; ngan 7,000 ka tawo an namatay han linog, ngan an nanhibilin nahadlok ngan naghimaya ha Dios han langit. 14  An ikaduha nga kairo+ natapos na. Kitaa! An ikatulo nga kairo maabot ha kadagmitan. 15  Ginhuypan han ikapito nga anghel an iya trumpeta.+ Ngan may dagku nga mga tingog ha langit, nga nasiring: “An ginhadian han kalibotan nagin Ginhadian han aton Ginoo+ ngan han iya Kristo,+ ngan magmamando hiya sugad nga hadi ha kadayonan, oo ha kadayonan.”+ 16  Ngan an 24 nga tigurang+ nga nalingkod ha ira trono ha atubangan han Dios linuhod nga nahapa ngan nagsingba ha Dios, 17  nga nasiring: “Nagpapasalamat kami ha imo, Jehova* nga Dios, an Makagarahum-ha-ngatanan, an Dios nga amo yana+ ngan amo hadto, kay gin-gamit mo an imo daku nga gahum, ngan nagtikang ka pagmando sugad nga hadi.+ 18  Pero napungot an mga nasud, ngan inabot an imo mismo kapungot, ngan inabot an itinanda nga panahon ha paghukom ha mga patay ngan ha pagbalos+ ha imo mga uripon nga mga propeta+ ngan ha mga baraan ngan ha mga may kahadlok ha imo ngaran, ha mga ubos ngan ha mga prominente, ngan ha pagbungkag ha mga nagbubungkag han tuna.”+ 19  Ngan naabrihan an santuaryo han templo han Dios ha langit, ngan an arka han iya kasabotan nakita ha santuaryo han iya templo.+ Ngan nagkaada mga idlap han kidlat ngan mga tingog ngan mga dalugdog ngan hin linog ngan hin dagku nga uran nga yelo.

Mga footnote

O “tungkod nga isurukol.”
O “mga yinaknan.”
O “nagkikinita.”
Kitaa an Ap. A5.