Surat ha mga Hebreo 8:1-13
8 Yana ini an nangunguna nga punto han amon ginsisiring: May-ada kita sugad hini nga hitaas nga saserdote,+ ngan nalingkod hiya ha too han trono han Harangdon ha langit,+
2 usa nga ministro* ha baraan nga lugar+ ngan ha tinuod nga tolda, nga gintindog ni Jehova,* ngan diri han tawo.
3 Kay an tagsa nga hitaas nga saserdote gintutokahan ha paghalad hin mga regalo ngan mga halad; salit kinahanglan nga hiya liwat may ihalad.+
4 Kon aanhi hiya ha tuna, diri unta hiya magigin saserdote,+ kay may kalalakin-an na nga naghahalad han mga regalo uyon ha Balaud.
5 Ini nga kalalakin-an nagbubuhat hin sagrado nga pag-alagad nga simboliko nga representasyon ngan lambong*+ han langitnon nga mga butang;+ sugad kan Moises, han hirani na niya tindugon an tolda, ginsugo hiya han Dios: Kay Hiya nasiring: “Siguroha nga hihimoon mo an ngatanan nga butang sumala ha surubdan hito nga iginpakita ha imo ha bukid.”+
6 Pero yana hi Jesus nakakarawat hin mas ekselente nga ministeryo* kay hiya liwat an tagapamutnga+ han usa nga kasabotan nga mas maopay ha pariho nga paagi,+ nga legal nga gin-establisar ha mas mag-opay nga mga saad.+
7 Kon ito nga siyahan nga kasabotan waray sayop, waray na unta magkinahanglan hin ikaduha.+
8 Kay may nakikita hiya nga sayop ha katawohan han hiya nasiring: “‘Kitaa! Maabot an mga adlaw,’ nasiring hi Jehova,* ‘nga maghihimo ako hin usa nga bag-o nga kasabotan ha panimalay ni Israel ngan ha panimalay ni Juda.
9 Diri ito magigin pariho han kasabotan nga akon ginhimo ha ira mga kaapoy-apoyan han adlaw nga ginkaptan ko an ira kamot basi tugwayan hira ha paggawas ha tuna han Ehipto,+ tungod kay waray hira magpabilin ha kasabotan nga akon ginhimo, salit waray ko na hira mangnoi,’ siring ni Jehova.*
10 “‘Kay ini an kasabotan nga akon hihimoon ha panimalay ni Israel katapos hito nga mga adlaw,’ nasiring hi Jehova.* ‘Ibubutang ko an akon mga balaud ha ira hunahuna, ngan isusurat ko ito ha ira kasingkasing.+ Ngan ako magigin ira Dios, ngan hira magigin akon katawohan.+
11 “‘Ngan diri na magtututdo an kada tagsa ha ira ha iya igkasi-tuminungnong ngan an kada tagsa ha ira ha iya bugto, nga masiring: “Kilalaha hi Jehova!”* Kay hira ngatanan makakakilala ha akon, tikang ha pinakaubos tubtob ha pinakaprominente ha ira.
12 Kay magigin maloloy-on ako ha ira diri magtadong nga mga buhat, ngan diri ko na hihinumdumon an ira mga sala.’”+
13 Han nasiring hiya nga “usa nga bag-o nga kasabotan,” iya ginhimo nga kadaan an nauna.+ Yana, an kadaan ngan nagtitikadaan hirani na mawara.+
Mga footnote
^ O “surugoon nga nagsiserbi ha publiko.”
^ Ha iba nga lugar, “dagaw.”
^ O “pagserbi ha publiko.”
