Surat ha mga Hebreo 13:1-25

  • Pangataposan nga sagdon ngan pangumusta (1-25)

    • Ayaw kalimti pagin maabiabihon (2)

    • Pasidunggan an pag-asawa (4)

    • Sugta an mga nangunguna (7, 17)

    • Ighalad halad han pagdayaw (15, 16)

13  Ipadayon niyo an iyo minagburugto nga gugma.+  Ayaw hingalimot ha pagin maabiabihon,*+ kay pinaagi hito an iba diri maaram nga mga anghel ngay-an an ira gin-abiabi.+  Hinumdumi an mga aadto ha prisohan,*+ nga sugad hin ginpriso kamo upod nira,+ ngan an mga ginmamaltrato, kay kamo liwat aada ha lawas.*  Pasidunggan han ngatanan an pag-asawa, ngan diri paghugawan an higdaan han mag-asawa,+ kay huhukman han Dios an mga tawo nga nagbubuhat hin seksuwal nga imoralidad* ngan mga nag-aadulteryo.+  Mahigawas ha paghigugma ha kwarta an iyo pagkinabuhi,+ samtang kontento na kamo ha mga butang nga aada.+ Kay hiya nagsiring: “Diri ko gud ikaw babayaan, ngan diri ko gud ikaw papabay-an.”+  Basi magin maisugon gud kita ngan makasiring: “Hi Jehova* an akon parabulig; diri ako mahahadlok. Ano an mahihimo ha akon han tawo?”+  Hinumdumi an mga nangunguna ha iyo,+ nga nagyakan han pulong han Dios ha iyo, ngan samtang ginpapamalandong niyo an mag-opay nga mga resulta han ira panggawi, subara an ira pagtoo.+  Hi Jesu-Kristo amo la gihapon hadto ngan yana, ngan ha kadayonan.  Ayaw pasagdi nga maisimang kamo han magkalain-lain ngan iba nga mga katutdoan, kay mas maopay nga an kasingkasing maparig-on han diri matupngan nga pagkabuotan kay han mga pagkaon,* nga diri naghahatag hin kapulsanan ha mga okupado hito.+ 10  May halaran kita diin an mga nagbubuhat hin sagrado nga pag-alagad ha tolda waray awtoridad nga kumaon.+ 11  Kay an mga lawas han mga hayop nga an dugo gindadara han hitaas nga saserdote ngadto ha baraan nga lugar sugad nga halad tungod han sala ginsusunog ha gawas han kampo.+ 12  Salit hi Jesus nag-antos liwat ha gawas han ganghaan han syudad+ basi mabaraan an katawohan pinaagi han iya kalugaringon nga dugo.+ 13  Kon sugad, kadto kita ha iya ha gawas han kampo, nga gin-iilob an pakaalo nga gin-ilob niya,+ 14  kay waray kita dinhi syudad nga nagpapabilin, pero ginpapamulat gud naton an usa nga tiarabot.+ 15  Pinaagi ha iya pirme kita maghalad ha Dios hin halad han pagdayaw,+ nga amo an bunga han aton mga im-im+ nga nagpapasamwak ha publiko han iya ngaran.+ 16  Dugang pa, ayaw hingalimot ha pagbuhat han maopay ngan ha pagpaangbit ha iba han anoman nga may-ada ka,+ kay nalilipay gud an Dios ha sugad nga mga halad.+ 17  Magin masinugtanon ha mga nangunguna ha iyo+ ngan magin mapinasakupon,+ kay padayon nga nagbabantay hira ha iyo* sugad nga hira an magkakaada baratunon,+ basi buhaton nira ini nga may kalipay ngan diri nanhahayhay, kay makakadaot ini ha iyo. 18  Padayon nga ig-ampo kami, kay natapod kami nga may-ada kami tangkod* nga konsensya, kay karuyag namon gumawi hin tangkod ha ngatanan nga butang.+ 19  Pero labi na nga gin-aaghat ko kamo nga mag-ampo basi makabalik dayon ako ha iyo. 20  Yana hinaot an Dios han kamurayawan, nga nagkuha han harangdon nga paraataman han mga karnero,+ an aton Ginoo nga hi Jesus, tikang ha mga patay, pinaagi han dugo han usa nga waray kataposan nga kasabotan, 21  maghatag ha iyo han tagsa nga maopay nga butang ha pagbuhat han iya kaburut-on, nga nagpapagios ha aton pinaagi kan Jesu-Kristo nga buhaton an nakakapalipay gud ha iya paniplatan, nga ha iya an himaya ha kadayonan, oo ha kadayonan. Amen. 22  Yana mga kabugtoan, gin-aaghat ko kamo nga pamatian hin mapailubon ini nga pulong ha pagparig-on, kay naghimo ako hin halipot nga surat para ha iyo. 23  Karuyag ko hibaroan niyo nga an aton bugto nga hi Timoteo ginpagawas na. Kon kumadi dayon hiya, kaupod ko hiya nga makikigkita ha iyo. 24  Ipaabot an akon pangumusta ha ngatanan nga nangunguna ha iyo ngan ha ngatanan nga baraan. Nangungumusta ha iyo an kabugtoan ha Italya.+ 25  Hinaot makarawat niyo ngatanan an diri matupngan nga pagkabuotan.

Mga footnote

O “buotan ha mga estranghero.”
Lit., “an mga gin-gapos; an mga nakagapos.”
O posible nga “sugad hin nag-aantos kamo upod nira.”
Kitaa an Glossary.
Kitaa an Ap. A5.
Karuyag sidngon, mga surundon mahitungod ha pagkaon.
O “iyo kalag.”
Lit., “maopay.”