Surat ha mga Hebreo 2:1-18
2 Ito an hinungdan nga importante nga tagan naton hin labaw ha kasagaran nga atensyon an mga butang nga aton hinbatian,+ basi diri gud kita ig-anod pahirayo.+
2 Kay kon an pulong nga ginyakan pinaagi han mga anghel+ napamatud-an nga sigurado, ngan an tagsa nga pagtalapas ngan diri pagsugot may sirot uyon ha hustisya,+
3 paonan-o kita makakalikay kon ginbabalewaray naton an sugad kaimportante nga katalwasan?+ Kay siyahan nga ginyakan ito pinaagi han aton Ginoo+ ngan ginkompirma ha aton han mga nakabati ha iya,
4 samtang an Dios nagpamatuod liwat pinaagi hin mga tigaman ngan urusahon nga mga butang ngan magkalain-lain nga gamhanan nga mga buhat+ ngan pinaagi han baraan nga espiritu nga iginhatag uyon ha iya kaburut-on.+
5 Kay waray niya igpasakop ha mga anghel an tiarabot nga inuukyan nga tuna,+ nga mahitungod hito nagyayakan kami.
6 Pero ha usa nga lugar may saksi nga nagsiring: “Ano ba an tawo nga pirme mo hiya nahinunumdoman, o an anak han tawo nga imo hiya ginmamangnoan?+
7 Ginhimo mo hiya nga uroubos la hin gutiay ha mga anghel; ginkoronahan mo hiya hin himaya ngan dungog, ngan gintokahan hiya nga magdumara han mga buhat han imo mga kamot.
8 An ngatanan nga butang imo iginpasakop ha ilarom han iya mga tiil.”+ Tungod kay iginpasakop na ha iya an ngatanan nga butang,+ waray iginsalin an Dios nga bisan ano nga waray igpasakop ha iya.+ Pero yana, diri pa naton nakikita nga sakop niya an ngatanan nga butang.+
9 Kondi nakikita gud naton hi Jesus, nga ginhimo nga uroubos la hin gutiay ha mga anghel,+ ginkoronahan na yana hin himaya ngan dungog tungod ha pag-antos hin kamatayon,+ basi pinaagi han diri matupngan nga pagkabuotan han Dios maeksperyensyahan niya an kamatayon para ha ngatanan.+
10 Kay angayan la para ha Dios nga tungod ha iya ngan pinaagi ha iya naeksister an ngatanan nga butang, basi mahimaya an damu nga anak,+ nga himoon nga perpekto an Punoan nga Ahente han ira katalwasan+ pinaagi han mga pag-antos.+
11 Kay hiya nga nagbabaraan ngan an mga ginbabaraan+ usa la an gintikangan,+ ngan tungod hini diri hiya naaawod pagtawag ha ira nga kabugtoan,+
12 sugad han iya ginsisiring: “Ipapasamwak ko an imo ngaran ha akon kabugtoan; pagdadayawon ko ikaw ha butnga han kongregasyon pinaagi hin kanta.”+
13 Nasiring liwat hiya: “Masarig ako ha iya.”+ Ngan nasiring pa: “Kitaa! Ako ngan an gudti pa nga mga anak nga iginhatag ha akon ni Jehova.”*+
14 Kon sugad, tungod kay an “gudti pa nga mga anak” mga tawo nga may dugo ngan unod, hiya liwat nagin tawo nga may dugo ngan unod,+ basi pinaagi han iya kamatayon mabungkag niya an usa nga may kapas ha pagpahinabo han kamatayon,+ nga amo an Yawa,+
15 ngan basi matagan niya hin kagawasan an ngatanan nga nauripon ha bug-os nira nga kinabuhi tungod han ira kahadlok ha kamatayon.+
16 Kay ha pagkamatuod, diri mga anghel an iya ginbubuligan kondi an tulin* ni Abraham.+
17 Tungod hito, kinahanglan magin pariho hiya ha iya “kabugtoan” ha ngatanan nga paagi,+ basi hiya magin maloloy-on ngan matinumanon nga hitaas nga saserdote ha mga butang nga may kalabotan ha Dios, basi maghalad hin halad ha pagpahiuli*+ para ha mga sala han katawohan.+
18 Tungod kay hiya mismo nag-antos han ginsarihan hiya,+ makakabulig hiya ha mga ginsasarihan.+
