Surat ha mga Hebreo 6:1-20

  • Mag-uswag ha pagkahamtong (1-3)

  • An Anak iginraraysang utro ha kahoy han mga binaya ha pagtoo (4-8)

  • Siguroha an iyo paglaom (9-12)

  • Sigurado an saad han Dios (13-20)

    • Saad ngan panumpa han Dios diri nababag-o (17, 18)

6  Salit yana nga hinbaroan na naton an nangunguna nga doktrina+ mahitungod han Kristo, padayon kita nga mag-uswag ha pagkahamtong,+ nga diri nagbubutang utro hin pundasyon, nga amo an pagbasol tikang ha patay nga mga buhat ngan pagtoo ha Dios,  an katutdoan mahitungod han mga bawtismo ngan an pagtungbaw han mga kamot,+ an pagkabanhaw han mga patay+ ngan an paghukom nga waray kataposan.  Ngan ini an aton bubuhaton, kon itugot gud han Dios.  Kay may kalabotan ha mga nalamragan na+ ngan ha mga nakatilaw han waray bayad nga regalo tikang ha langit ngan ha mga nagin umarangbit han baraan nga espiritu  ngan ha mga nakatilaw han maopay nga pulong han Dios ngan mga gahum han tiarabot nga sistema han mga butang,*  pero binaya ha pagtoo,+ imposible nga mabuligan hira nga magbasol, kay ira iginraraysang utro ha kahoy an Anak han Dios para ha ira kalugaringon ngan ginpapakaalohan hiya ha publiko.+  Kay an tuna nakarawat hin bendisyon tikang ha Dios kon nainom ito han uran nga agsob tumuro ngada hito ngan katapos, nakakapatubo hin mga tanom nga mapulsanon ha mga nagkukultibar hito.  Pero kon nakakapatubo ito hin katunokan ngan kabanwaan, ginpapabay-an ito ngan haros isumpa, ngan ha kataposan susunugon ito.  Kondi ha iyo kahimtang, mga hinigugma, kombinsido kami ha mas mag-opay nga mga butang, mga butang nga may kalabotan ha katalwasan, bisan kon nagyayakan kami ha sugad hini nga paagi. 10  Kay an Dios diri kay diri matadong nga kalimtan niya an iyo mga buhat ngan an gugma nga iyo iginpakita para ha iya ngaran+ pinaagi ha pagserbi ngan padayon nga pagserbi ha mga baraan. 11  Pero hingyap namon nga an tagsa ha iyo magpakita hin pariho nga pagkamaduruto basi magkaada bug-os nga kasiguradohan han paglaom+ tubtob ha kataposan,+ 12  basi diri kamo magin hubya,+ lugod magsubad kamo ha mga nakakapanunod han mga saad pinaagi han pagtoo ngan pagpailob. 13  Kay han nagsaad an Dios kan Abraham, tungod kay waray hiya mapapanumpaan nga mas labaw pa ha iya, nanumpa hiya ha iya kalugaringon,+ 14  nga nasiring: “Bibendisyonan ko gud ikaw ngan padadamuon ko gud ikaw.”+ 15  Salit katapos ni Abraham magpakita hin pagpailob, nakarawat niya ini nga saad. 16  Kay an mga tawo nanunumpa ha usa nga mas labaw ha ira, ngan an ira panumpa amo an kataposan han tagsa nga diskusyon, kay legal nga garantiya ito ha ira.+ 17  Ha sugad hini nga paagi, han nagdesisyon an Dios nga ipakita hin mas matin-aw ha mga manurunod han saad+ an pagin diri nababag-o han iya katuyoan, gin-garantiyahan niya ito* pinaagi hin panumpa, 18  basi pinaagi han duha nga butang nga diri nababag-o nga mahitungod hini imposible magbuwa an Dios,+ kita nga pinalagiw ngadto ha arayopan maaghat gud nga kaptan hin marig-on an paglaom nga iginbutang ha aton atubangan. 19  May-ada kita hini nga paglaom+ nga sugad hin angkla para han kalag,* nga sigurado ngan marig-on, ngan nasulod ito ha sakob han kurtina,+ 20  diin sinulod an nag-uuna para ha aton nga amo hi Jesus,+ nga nagin hitaas nga saserdote ha paagi nga pariho han kan Melkizedek ha kadayonan.+

Mga footnote

O “han tiarabot nga panahon.” Kitaa an Glossary.
O “nanginlabot hiya.” Lit., “nagpabutnga hiya.”
O “para ha aton kinabuhi.”