Surat ha mga Hebreo 4:1-16

  • Peligro han diri pakasulod ha pagpahuway han Dios (1-10)

  • Sagdon nga sumulod ha pagpahuway han Dios (11-13)

    • An pulong han Dios buhi (12)

  • Jesus, harangdon nga hitaas nga saserdote (14-16)

4  Salit tungod kay nagpapabilin an saad ha pagsulod ha iya pagpahuway, mag-ikmat* kita kay bangin may usa ha iyo nga diri magin kwalipikado hito.+  Kay iginpasamwak liwat ha aton an maopay nga sumat,+ pariho ha ira; pero waray hira magpahimulos han pulong nga ira hinbatian, kay an ira pagtoo diri pariho han mga namati.  Kay kita nga nagpapakita hin pagtoo nasulod ha pagpahuway, sugad han iya ginsiring: “Salit tungod ha akon kasina nanumpa ako, ‘Diri hira makakasulod ha akon pagpahuway,’”+ bisan kon human na an iya mga buruhaton tikang pa ha tinikangan han kalibotan.+  Kay ha usa nga asoy ini an iya ginsiring mahitungod han ikapito ka adlaw: “Ngan han ikapito ka adlaw an Dios pinahuway ha ngatanan niya nga buruhaton,”+  ngan dinhi nasiring utro hiya: “Diri hira makakasulod ha akon pagpahuway.”+  Salit tungod kay an iba masulod pa hito, ngan an mga siyahan nga ginsumatan han maopay nga sumat waray makasulod hito tungod han pagkadiri-masinugtanon,+  may itinanda na liwat hiya nga usa nga adlaw pinaagi ha pagsiring, katapos han maiha nga panahon ha salmo ni David, nga “Yana nga adlaw”; sugad han ginsiring na, “Yana nga adlaw kon mamamati kamo han iya tingog, ayaw patig-aha an iyo kasingkasing.”+  Kay kon ginpangunahan hira ni Josue+ ngadto ha usa nga lugar nga pahuwayan, waray na unta an Dios mag-unabi hin lain nga adlaw katapos hito.  Salit may nabibilin pa nga pagpahuway pariho ha adlaw han sabbath para ha katawohan han Dios.+ 10  Kay an tawo nga nakasulod ha pagpahuway han Dios pinahuway liwat ha iya mga buruhaton, pariho han ginbuhat han Dios ha iya mga buruhaton.+ 11  Salit buhaton naton an aton bug-os nga mahihimo nga makasulod hito nga pagpahuway, basi waray bisan usa nga mahulog ngan magsubad han pariho nga ehemplo han pagkadiri-masinugtanon.+ 12  Kay an pulong han Dios buhi ngan gamhanan+ ngan mas matarom pa ha bisan ano nga espada nga paluyoluyo an tarom+ ngan nadulot bisan tubtob ha pagbulag han kalag* ngan espiritu,* ngan han mga kaluluthan tikang ha utok ha tul-an, ngan nakakatugkad han mga panhunahuna ngan mga intensyon han kasingkasing. 13  Ngan waray linarang nga diri nakikita han Dios,+ lugod an ngatanan nga butang hubo ngan klaro nga nakikita han iya mga mata, nga ha iya may baratunon kita.+ 14  Salit tungod kay kita may harangdon nga hitaas nga saserdote nga sinaka ha langit, hi Jesus nga Anak han Dios,+ magpadayon kita ha pagpasamwak ha publiko mahitungod ha iya.+ 15  Kay an aton hitaas nga saserdote, diri usa nga diri napaid ha aton mga kaluyahan,+ kondi an aton hitaas nga saserdote ginsarihan ha ngatanan nga paagi pariho ha aton, pero waray hiya sala.+ 16  Salit, dumaop kita ha trono han diri matupngan nga pagkabuotan nga may kagawasan ha pagyakan,+ basi makarawat naton an kalooy ngan mabilngan an diri matupngan nga pagkabuotan nga mabulig ha aton ha husto nga panahon.

Mga footnote

Lit., “mahadlok.”
Kitaa an Glossary.
Kitaa an Glossary.