1, 2. Ka kuya ka Ezekiele 47:1-12, Ezekiele ubonañi mi uitutañi? (Mubone siswaniso sesi fahalimu.)

EZEKIELE ubona nto yeñwi yemakaza mwa pono ya tempele: Ubona nukana yebuba kuzwelela mwa sibaka sesikenile! Mueze inge mwamubona hanze alatelela nukana yeo kubona moibubiseza mezi ayona akenile hahulu. (Mubale Ezekiele 47:1-12.) Mezi ashulumuka kuzwelela mwatasaa munyako wa sibaka sesikenile; mi ayozwela fa sibaka sa tempele sesi kwa munyako o kwa upa. Lingeloi lelipotisa Ezekiele limuzwisa mwa tempele inze limishala nukana yeo. Lingeloi leo likuta-kutela kubulelela Ezekiele kuli afite mwa mezi, mi mupolofita yo ulemuha kuli nukana yeo izwelapili kutunga, mi mezi aba amañata hahulu kuli mutu naakona feela kufita mwa nukana yeo haiba asila inze atapa!

² Ezekiele ulemuha kuli nuka yeo ibubiseza mezi ayona mwa Liwate Lelishwile, mi mezi ao hanaakopana ni mezi a lizwai a mwa liwate leo, mezi a mwa liwate naafoliswa mi zeneli mwateñi kaufela nelipila hape, ili kutahisa kuli kube ni litapi zeñata. Mi fa minanga ya nuka, ubona likota za mufuta kaufela inze lihula. Kweli ni kweli, likota zeo libeya miselo yeminde, mi limela matali  afolisa matuku. Kubonahala kuli Ezekiele naaikutwile hande ni kuba ni sepo hanaaboni lika zeo. Kono lika zeo zanaaboni mwa pono nelika tusa cwañi Ezekiele ni bahapiwa babañwi? Mi likona kulutusa cwañi ni luna kacenu?

3. Ki kabakalañi Majuda ba kwaikale hane basaangi kuli nuka yanaaboni Ezekiele mwa pono neli nuka luli?

³ Majuda ba kwaikale nebasaangi kuli nuka yanaaboni Ezekiele mwa pono neli nuka luli. Kono nuka ya mwa pono yeo mwendi neibahupulisize bupolofita bobuñwi bwanaañozi Joele, bobubulela za kukutiswa sinca kwa lika, ili bo mwendi nebuñozwi lilimo zefitelela 200 pili Ezekiele asika bona kale pono yeo. (Mubale Joele 3:18.) Majuda bane bali mwa buhapiwa hane babalile bupolofita bwa Joele bwanaañozi ka kususumezwa ki moya okenile, nebasaangi kuli malundu luli ‘naakalotisa waine yemunati’ kamba kuli malundunyana ‘abubise mabisi’; kamba kuli ‘liweluwelu lizwe mwa ndu ya Jehova.’ Ka nzila yeswana, kubonahala kuli batu bane bali mwa buhapiwa ni Ezekiele bao, nebautwisisa luli kuli nuka yanaaboni Ezekiele neisayemeli nuka luli. * Kacwalo, nuka yeo yanaabonisize Jehova ku Ezekiele neiyemelañi? Mañolo alutusa kuutwisisa zeliyemela likalulo zeñwi za nuka yeo. Nihakulicwalo, lukanyakisisa ka butungi litaba zetaalu ka za pono yeo kaufela, ili litaba zekalutusa kuba ni sepo.

4. (a) Nuka yanaaboni Ezekiele mwa pono neitahisize kuli Majuda balibelele kufiwa limbuyoti mañi ki Jehova? (b) Bibele moiitusiselize manzwi a kuli “nuka” ni “mezi” ilufa sepo mañi ya kuli Jehova ukafuyaula batu bahae? (Mubone mbokisi yeli, “Linuka Zefa Limbuyoti Zezwa ku Jehova.”)

⁴ Nuka ya limbuyoti. Mwa Bibele, linuka ni mezi hañata liyemelanga limbuyoti zeñata zepilisa, zezwa ku Jehova. Bakeñisa kuli Ezekiele naaboni nuka yebuba kuzwelela mwa tempele, kubonahala kuli pono yeo neitahisize kuli batu ba Mulimu balumele kuli Jehova naakabafa limbuyoti zepilisa hane bakazwelapili kumulapela ka nzila yelukile. Ki limbuyoti mañi zene bakafiwa? Baprisita hape nebaka bafanga litaelo zezwa ku Mulimu. Mi hane bakafanga matabelo kwa tempele, nebakabanga ni buikolwiso bwa kuli libi zabona nelikaswalelwa. (Ezek. 44:15, 23; 45:17) Kacwalo, nebakaba babakenile hape, ili kuswana feela inge kuli batapisizwe mwa mezi akenile azwelela kwa tempele.

5. Nuka yanaaboni Ezekiele mwa pono neitusize cwañi batu kuba ni sepo ya kuli kaufelaa bona nebaka fuyaulwa?

⁵ Kana Jehova naakakona kufuyaula Majuda bao kaufela? Pono yeo ibonisa kuli Majuda kaufela nebakona kufuyaulwa, kakuli ibonisa makazo ya mezi akala ka kushulumuka ni kuba mezi amañata hahulu hasabubile ka butelele bobubato eza likilomita zepeli! (Ezek. 47:3-5) Nihaike kuli palo ya Majuda bane bakakutela kwa naha ya habobona neika ekezeha, Jehova naakakona kubafuyaula kaufelaa bona. Nuka yeo neiyemela limbuyoti zeñata zene bakaikola batu ba Jehova!

6. (a) Bupolofita bwa nuka yanaaboni Ezekiele bulufa sepo mañi? (b) Nuka yanaaboni Ezekiele mwa pono ilufa temuso mañi? (Mubone litaluso ze kwatasi.)

⁶ Mezi apilisa. Mwa pono ya Ezekiele, nuka neibubiseza mezi ayona mwa Liwate Lelishwile, ili kupilisa ze mwa liwate leo. Mezi  a mwa nuka yeo naapilisize litapi zeñata hahulu, kuli mane buñata bwazona nebubapanyiwa kwa litapi za mwa Liwate Lelituna, lona la Mediteranea. Fa likamba la Liwate Lelishwile, lene lili mwahalaa mileneñi yemibeli yenesi bukaufi hahulu, nekunani pisinisi ya litapi. Lingeloi nelibulezi kuli: “Lika kaufela likapila kai ni kai koibubela nukana.” Kana taba yeo italusa kuli mezi anaazwa mwa ndu ya Jehova naakafita kwa maneku kaufela a Liwate Lelishwile? Batili. Lingeloi nelibulezi kuli mezi apilisa ao naasike afita kwa mahwatata amañwi. Libaka zeo ‘nelisiyezwi lizwai.’ * (Ezek. 47:8-11) Kacwalo, bupolofita bobubulela za mezi apilisa nebufile batu sepo ya kuli kulapela Jehova ka nzila yelukile nekuka batusa, mi nebaka kondisa mwa bupilo. Kono bupolofita bo hape nebufile temuso yelatelela: Haki batu kaufela bane bakafuyaulwa ki Jehova; mi haki batu kaufela bane bakafoliswa.

7. Likota zanaaboni Ezekiele mwa pono zeneli fa minanga ya nuka nelitusize Majuda bane bali mwa buhapiwa kuba ni sepo mañi?

⁷ Likota zefa lico ni zefolisa matuku. Likota ze fa minanga ya nuka zona litusa cwañi? Litahisa kuli sibaka sibonahale hande. Likota zeo hape liyemela lika zeñwi. Ezekiele ni banaapila ni bona nebanahanile hahulu ka za miselo yene ikabeiwa ki likota zeo, ili miselo yeminca yene likabeya likota zeo kweli ni kweli! Taba yeo neikolwisize batu bao kuli Jehova naakabafepa kwa moya. Ki lika mañi zeñwi zene fumaneha kwa likota zeo? Matali a likota zeo ‘naakafolisa matuku.’ (Ezek. 47:12) Jehova naaziba kuli bahapiwa bane bakutezi habobona nebatokwa kufoliswa kwa moya, mi naasepisize kuli naakabafolisa. Mwa Kauhanyo 9 ya buka ye, neluitutile mwanaaezelize cwalo mwa bupolofita bobuñwi bobubulela za kukutiswa sinca kwa lika.

8. Ki nto mañi yebonisa kuli pono ya Ezekiele neikatalelezwa ka nzila yetuna?

⁸ Nihakulicwalo, sina mone luitutezi mwa Kauhanyo 9, litaba zeñwi za bupolofita bwa kukutiswa sinca kwa lika, nelisika talelezwa kaufelaa zona kwa bahapiwa bane bakutezi habobona. Majuda ki bona bane batahisize cwalo. Jehova naasike abafuyaula bakeñisa kuli nebakalile kueza hape lika zemaswe, nebasa muutwi, mi nebasa mulapeli ka nzila yelukile. Batu babasepahala nebautwile hahulu butuku ni kuswaba kabakala likezo zemaswe za Majuda babañwi. Nihakulicwalo, balapeli ba Jehova babasepahala nebaziba kuli lisepiso za Jehova zatalelezwangwa kamita. (Mubale Joshua 23:14.) Kacwalo, pono ya Ezekiele neikatalelezwa ka nzila yetuna. Kono neikatalelezwa lili?

9. Bupolofita bwa tempele yanaaboni Ezekiele mwa pono nebukatalelezwa lili ka nzila yetuna?

⁹ Sina mone luitutezi mwa Kauhanyo 14 ya buka ye, pono ya tempele yanaaboni Ezekiele italelezwa ka nzila yetuna “kwa mafelelezo a mazazi,” ili fo batu balapela Jehova ka nzila yelukile kufita nako ifi kamba ifi. (Isa. 2:2) Pono ya Ezekiele ya nuka yebuba isweli kutalelezwa cwañi kacenu?

10, 11. (a) Ki limbuyoti mañi zalufa Jehova kacenu zeswana sina nuka yebuba? (b) Ki lika mañi zaezize Jehova kuli afuyaule batu bahae kusina taba ni kuli baekezehile hahulu mwa mazazi a mafelelezo?

 ¹⁰ Nuka yefa limbuyoti. Mezi abuba kuzwa mwa ndu ya Jehova aluhupulisa limbuyoti mañi kacenu? Aluhupulisa lika zeñata zalufile Jehova kuli lilutuse kumulapela ka nzila yatabela. Nto yetuna yalufile ki sitabelo sa tiululo ili sesitahisa kuli libi zaluna liswalelwe. Litaba za niti zefumaneha mwa Linzwi la Mulimu liswana sina mezi apilisa ni akenisa. (Maef. 5:25-27) Lufuyauzwi cwañi ka linzila zeo mwa linako zaluna?

¹¹ Ka silimo sa 1919, nekunani feela batanga ba Jehova basikai, mi nebatabela kufiwa lico za kwa moya zene batokwa. Mwa lilimo zene latelezi, palo yabona neizwezipili kuhula. Kacenu, batanga ba Mulimu bafitelela 8 milioni. Kana lico za kwa moya ki zeñata hahulu kuli likone kufepa batu bao kaufela? Eni! Lulutiwa lituto za niti za mwa Bibele zeñata hahulu. Mwa lilimo ze 100 zefelile, batanga ba Mulimu baamuhezi lihatiso zeñata-ñata, zecwale ka Libibele, libuka, limagazini, libroshuwa, ni matrakiti. Ka kuswana ni nuka yanaaboni Ezekiele mwa pono, batu bababata kuziba ka za Mulimu balutilwe lituto zeñata za niti ya mwa Bibele mwa lifasi kaufela. Ka lilimo-limo, kuhatisizwe lihatiso mokufumaneha litaba za mwa Bibele. Mi ka kuitusisa webusaiti ya jw.org, lihatiso zeo zafumaneha ni mwa mufuta wa kubalela fa lipangaliko mwa lipuo zefitelela 900! Litaba ze mwa lihatiso zeo litusa cwañi batu babatabela kuutwa taba yende?

12. (a) Lushango lwa niti lutusize cwañi batu kwa moya? (b) Pono ya Ezekiele ilufa temuso mañi kacenu? (Mubone ni litaluso ze kwatasi.)

¹² Mezi apilisa. Ezekiele naabulelezwi kuli: “Lika kaufela likapila kai ni kai koibubela nukana.” Munahane feela mo batu baitutezi litaba zeñata za niti ka kuswalisana ni luna mwa naha yaluna ya kwa moya. Litaba za niti za mwa Bibele litusize batu babañata kuba ni tumelo yetuna ku Jehova. Nihakulicwalo, pono yeo hape ibonisa temuso yelatelela: Haki batu kaufela babaka zwelapili kuba ni tumelo ku Jehova. Ka kuswana ni libaka za mahwatata ni za mataba za mwa Liwate Lelishwile zanaaboni Ezekiele mwa pono, kunani batu babahana litaba za niti ni kuhana kulisebelisa mwa bupilo bwabona. * Luswanela kutokomela kuli haluswani ni batu bao!—Mubale Deuteronoma 10:16-18.

13. Luitutañi kwa likota zanaaboni Ezekiele mwa pono?

¹³ Likota zefa lico ni zefolisa matuku. Kana likota ze mwa pono yanaaboni Ezekiele ze kwa minanga ya nuka linani taluso ku luna? Eni! Muhupule kuli kweli ni kweli, likota zeo nelibeyanga miselo yeminca ili yemunati, mi matali azona naafolisa matuku. (Ezek. 47:12) Taba yeo ilutusa kulemuha kuli lusebeleza Mulimu yanani bufani, ili yalufa lico za kwa moya ni kulufolisa kwa matuku aluna a kwa moya. Batu babañata mwa lifasi kacenu habautwisisi zeiluta Bibele. Kono munahane feela litaba za niti zaluluta Jehova. Kana mwaikutwanga kuli Jehova wamifuyaula ka kumifa lico za kwa moya, inge cwalo hamufeza kubala yeñwi ya  limagazini zaluna, hamufeza kuopela pina ya mafelelezo kwa mukopano wa mupotoloho kamba omutuna, hamufeza kubuha yeñwi ya mavidio aluna kamba hamufeza kubuha progilamu ya JW Broadcasting? Jehova walufepa kwa moya luli. (Isa. 65:13, 14) Kana lituto za niti zelusweli kuituta zalutusa mwa bupilo ni kulutusa kueza lika zetabisa Jehova? Likelezo zende zeluamuhela, ili zezwa mwa Linzwi la Mulimu lilutusa kuambuka libi zecwale ka muzamao wa buhule, mukwañuli, ni kutokwa tumelo. Jehova hape ulukisize nzila yeñwi kuli atuse Bakreste babaezize sibi sesituna, ili babakula kwa moya. (Mubale Jakobo 5:14.) Sina feela moiboniseza pono yanaaboni Ezekiele ya likota, lufuyaulwa ki Jehova luli.

14, 15. (a) Luitutañi kwa libaka za mahwatata zenesika foliswa zanaaboni Ezekiele mwa pono? (b) Nuka yanaaboni Ezekiele mwa pono ilutusa cwañi kacenu?

¹⁴ Lwakona kuituta lituto zeñwi kwa libaka za mahwatata zene lisika foliswa. Halutabeli kutuhelela nto ifi kamba ifi kulupaleliswa kufuyaulwa ki Jehova. Halutabeli kuli lusike lwafoliswa, inge batu babañata babakula kwa moya mwa lifasi le. (Mat. 13:15) Kono lutabela kutusiwa ki limbuyoti zalufa Jehova. Mwendi lwakona kunahana za nuka yanaaboni Ezekiele mwa pono haluituta litaba za niti ze mwa Linzwi la Mulimu, halubulelela babañwi litaba za niti ka kukutaza taba yende, haluamuhela ketelelo yelilato, haluomba-ombiwa, ni halutusiwa ki baana-bahulu babalutilwe ki mutanga yasepahala. Nuka yeo itahisa bupilo mi ifolisa matuku koibubela kaufela!

¹⁵ Bupolofita bobubulela za nuka yanaaboni Ezekiele mwa pono bukatalelezwa cwañi kwapili? Sina moluka itutela, bupolofita bo bukatalelezwa ka nzila yetuna mwa Paradaisi yetuha itaha.

16, 17. (a) Bupolofita bwa nuka yanaaboni Ezekiele mwa pono bukatalelezwa cwañi ka nzila yetuna mwa Paradaisi? (b) Ki limbuyoti mañi zeñata zeluka ikola mwa Paradaisi?

¹⁶ Kana mwaiponanga mwa Paradaisi ni balikani bamina hamohocwalo ni lubasi lwamina, inze muikola bupilo? Kuituta litaba za nuka yanaaboni Ezekiele mwa pono kwakona kumitusa kuipona inze muli mwa Paradaisi luli. Ka mukwa ufi? Munyakisise hape likalulo zetaalu za mwa pono yeo zebonisa lilato la Mulimu.

¹⁷ Nuka yefa limbuyoti. Bupolofita bwa nuka yeo ya swanisezo bukatalelezwa ka nzila yetuna mwa Paradaisi, ili kutahisa limbuyoti za kwa moya ni za kwa mubili. Ka nako ya Puso ya Jesu ya Lilimo ze 1,000, Mubuso wa Mulimu ukatusa batu babasepahala kutusiwa ki tiululo ka nzila yetuna. Hanyinyani-hanyinyani, bakapetahala. Hakusana kuba ni matuku, madokota, manasi, lipatela, ni likampani zetusanga batu habakula! “Buñata bobutuna bwa batu” babakapunyuha “ñalelwa yetuna” ni Armagedoni, bakafuyaulwa hahulu. (Sin. 7:9, 14) Nihaike kuli nako yeo ikaba yetabisa, hamulaho wa nako, batu bakato ikola limbuyoti zeñata hahulu  ni kufita. Sina nuka yanaaboni Ezekiele mwa pono, kukaba ni limbuyoti zeñata hahulu.

18. “Nuka ya mezi a bupilo” ikabayula cwañi ka nako ya Puso ya Kreste ya Lilimo ze 1,000?

¹⁸ Mezi apilisa. Ka nako ya puso ya Kreste ya lilimo ze 1,000, “nuka ya mezi a bupilo” ikabayula. (Sin. 22:1) Batu babañata-ñata bakazusiwa kwa bafu ni kufiwa kolo ya kupila mwa Paradaisi kuya kuile! Limbuyoti zakafa Jehova ka kuitusisa Mubuso wahae likopanyeleza kuzusa batu babañata-ñata babashwile. (Isa. 26:19) Nihakulicwalo, kana batu babaka zusiwa kaufela bakazwelapili kupila kuya kuile?

19. (a) Ki lika mañi zebonisa kuli mwa Paradaisi lukafiwa litaba zenca za niti? (b) Batu babañwi kwapili ‘bakasiyelwa lizwai’ ka mukwa ufi?

¹⁹ Mutu ni mutu uswanela kuikezeza keto. Ka nako yeo, kukaapulwa miputo yeminca. Kacwalo, mezi akatulusa aazwa ku Jehova akakopanyeleza litaba zenca za niti, ili litaelo zenca zeluka fiwa. Taba yeo yatabisa luli. Nihakulicwalo, batu babañwi bakahana kulatelela litaelo zenca zeo ni kuiketela kusautwa Jehova. Batu babañwi bakaba bakwenuheli, kono habana kulumelezwa kutahisa filikanyo mwa Paradaisi. (Isa. 65:20) Taba yeo mwendi iluhupulisa pono yanaaboni Ezekiele yene bonisa za libaka za mahwatata fokusina zemelile fateñi, ili ‘zekasiyelwa lizwai.’ Batu babaka hana kunwa kwa mezi apilisa ao ki litoto luli! Hamulaho  wa puso ya lilimo ze 1,000, batu babakaba bakwenuheli bakaba kwa lineku la Satani. Batu kaufela babaka hana kubusiwa ki Jehova ka nzila yelukile, bakabulaiwa mi habana kupila hape.—Sin. 20:7-12.

20. Ki tukiso mañi yakaeza Jehova ka nako ya Puso ya Kreste ya Lilimo ze 1,000 yeluhupulisa likota zanaaboni Ezekiele mwa pono?

²⁰ Likota zefa lico ni zefolisa matuku. Jehova halati kuli mutu ufi kamba ufi apalelwe kuto pila kuya kuile. Ka kuswana ni likota zanaaboni Ezekiele mwa pono zenekona kutusa batu, Jehova ukalukisa nzila yeñwi yekatusa batu kuli bapile kuya kuile. Mwa Paradaisi, limbuyoti za Jehova likalutusa kwa mubili ni kwa moya. Mwa lihalimu, Jesu Kreste ni bakabusa ni bona ba 144,000, bakabusa sina malena ka lilimo ze 1,000. Ka kuba baprisita, ba 144,000 bakatusa batu kuikola limbuyoti zetiswa ki sitabelo sa Kreste sa tiululo, ili kubatusa kupetahala. (Sin. 20:6) Tukiso yeo ya kufolisa batu kwa moya ni kwa mubili iluhupulisa likota zanaaboni Ezekiele mwa pono zeneli kwa minanga ya nuka, ili likota zenebeya miselo yemunati ni zenenani matali afolisa matuku. Litaba za pono ya Ezekiele liswana ni bupolofita bobunde bone buñozwi ki muapositola Joani. (Mubale Sinulo 22:1, 2.) Matali a kwa likota zanaaboni Joani neli “a kufolisa macaba.” Batu babañata-ñata babasepahala bakatusiwa ki misebezi yebaka eza baprisita ba 144,000.

21. Kunahanisisa bupolofita bwa nuka yanaaboni Ezekiele mwa pono kukona kumitusa cwañi, mi lukanyakisisañi mwa kauhanyo yetatama? (Mubone mbokisi yeli, “Mezi Ashulumuka Aba Amañata Hahulu!”)

²¹ Kunahanisisa nuka yanaaboni Ezekiele mwa pono kulutusa kuba ni tabo ni sepo. Lukato ikola lika zende zeñata kwapili! Lilimo zeñata-ñata kwamulaho, Jehova naaitusisize batanga bahae kulufa bupolofita bobulutusa kunahana moikabela Paradaisi, ili kulumema kuli lutoba teñi ka nako yebuka talelezwa bupolofita bo ka nzila yetuna. Kana mukaba teñi mwa lifasi lelinca? Mwendi mwakakanyanga ka za haiba mukaba teñi luli mwa Paradaisi. Mwa kauhanyo yetatama, lukanyakisisa mo manzwi a mafelelezo mwa bupolofita bwa Ezekiele alutuseza kuba ni sepo.