An Ikaduha nga Libro han mga Hadi 15:1-38
15 Ha ika-27 ka tuig ni Hadi Jeroboam* han Israel, nagin hadi+ hi Azarias*+ nga anak ni Hadi Amazias+ han Juda.
2 Nagin hadi hiya han 16 anyos hiya, ngan nagmando hiya hin 52 ka tuig ha Jerusalem. An ngaran han iya nanay amo hi Jecolias nga taga-Jerusalem.
3 Padayon nga ginbuhat niya an husto ha pagkita ni Jehova, sugad han ginbuhat han iya tatay nga hi Amazias.+
4 Pero waray pananggala an higtaas nga mga lugar,+ ngan an katawohan naghahalad la gihapon ngan nagpapaaso hin halad ha higtaas nga mga lugar.+
5 Ginpaantos ni Jehova an hadi hin sakit, ngan nagpabilin hiya nga may liprosi+ tubtob ha adlaw han iya kamatay; ngan inukoy hiya ha nahibubulag nga balay,+ samtang an anak han hadi nga hi Jotam+ amo an nagdumara han balay,* nga naghuhukom ha katawohan han tuna.+
6 Mahitungod han iba pa nga bahin han kasaysayan ni Azarias,+ an ngatanan nga iya ginbuhat, diri ba iginsurat ito ha libro han kasaysayan han mga panahon han mga hadi han Juda?
7 Katapos, hi Azarias pinahuway kaupod han iya mga kaapoy-apoyan,+ ngan ira iginlubong hiya kaupod han iya mga kaapoy-apoyan ha Syudad ni David; ngan an iya anak nga hi Jotam an nagin hadi kasaliwan niya.
8 Ha ika-38 ka tuig ni Hadi Azarias+ han Juda, hi Zacarias+ nga anak ni Jeroboam nagin hadi ha Israel ha Samaria, ngan nagmando hiya hin unom ka bulan.
9 Ginbuhat niya an maraot ha pagkita ni Jehova, sugad han ginbuhat han iya mga kaapoy-apoyan. Waray niya bayai an mga sala nga ginbuhat ni Jeroboam nga anak ni Nebat, nga nagin hinungdan han pakasala han Israel.+
10 Ngan hi Salum nga anak ni Jabes nakigkunsabo kontra ha iya ngan ginpatay+ hiya ha Ibleam.+ Katapos hiya patayon, hi Salum an nagin hadi kasaliwan niya.
11 Mahitungod han iba pa nga bahin han kasaysayan ni Zacarias, iginsurat ito ha libro han kasaysayan han mga panahon han mga hadi han Israel.
12 Ito an katumanan han pulong ni Jehova nga ginsiring kan Jehu: “Upat ka henerasyon han imo mga anak+ an malingkod ha trono han Israel.”+ Ngan ito an nahitabo.
13 Hi Salum nga anak ni Jabes nagin hadi ha ika-39 ka tuig ni Hadi Uzias+ han Juda, ngan nagmando hiya hin usa ka bulan ha Samaria.
14 Ngan hi Menahem nga anak ni Gadi sinagka tikang ha Tirza+ ngadto ha Samaria ngan ginpatay hi Salum+ nga anak ni Jabes didto ha Samaria. Katapos hiya patayon, hi Menahem an nagin hadi kasaliwan niya.
15 Mahitungod han iba pa nga bahin han kasaysayan ni Salum ngan an pakigkunsabo nga iya ginhimo, iginsurat ito ha libro han kasaysayan han mga panahon han mga hadi han Israel.
16 Ito an panahon nga ginawas hi Menahem ha Tirza ngan iya gin-atake an Tipsa ngan ginpamatay an ngatanan nga nakadto ngan an mga nakadto ha teritoryo hito, kay waray ito mag-abri ha iya han mga ganghaan hito. Iya ito gin-atake ngan ginpanbusbosan an burod nga mga babaye didto.
17 Ha ika-39 ka tuig ni Hadi Azarias han Juda, hi Menahem nga anak ni Gadi nagin hadi ha Israel, ngan nagmando hiya hin napulo ka tuig ha Samaria.
18 Padayon nga ginbuhat niya an maraot ha pagkita ni Jehova. Waray niya bayai an ngatanan nga sala nga ginbuhat ni Jeroboam nga anak ni Nebat, nga nagin hinungdan han pakasala han Israel,+ ha ngatanan niya nga adlaw.
19 Hi Hadi Pul+ han Asirya kinadto ha tuna han Israel, ngan hi Menahem naghatag kan Pul hin 1,000 ka talanton* nga silber sugad nga balos para han iya suporta ha pagparig-on han iya gahum ha ginhadian.+
20 Salit hi Menahem nagtirok hin mga silber tikang ha Israel pinaagi ha pangulekta hito tikang ha prominente ngan riko nga mga tawo.+ Naghatag hiya ha hadi han Asirya hin 50 ka sekel* nga silber para ha kada tawo. Katapos, an hadi han Asirya binalik ngan waray magpabilin hito nga tuna.
21 Mahitungod han iba pa nga bahin han kasaysayan ni Menahem,+ an ngatanan nga iya ginbuhat, diri ba iginsurat ito ha libro han kasaysayan han mga panahon han mga hadi han Israel?
22 Katapos, hi Menahem pinahuway kaupod han iya mga kaapoy-apoyan; ngan an iya anak nga hi Pekahias an nagin hadi kasaliwan niya.
23 Ha ika-50 ka tuig ni Hadi Azarias han Juda, hi Pekahias nga anak ni Menahem nagin hadi ha Israel ha Samaria, ngan nagmando hiya hin duha ka tuig.
24 Padayon nga ginbuhat niya an maraot ha pagkita ni Jehova. Waray niya bayai an mga sala nga ginbuhat ni Jeroboam nga anak ni Nebat, nga nagin hinungdan han pakasala han Israel.+
25 Ngan an iya opisyal nga hi Peka+ nga anak ni Remalias nakigkunsabo kontra ha iya ngan ginpatay hiya ha Samaria ha marig-on nga torre ha balay* han hadi kaupod hira Argob ngan Arye. May kaupod hiya nga 50 ka tawo nga taga-Gilead; ngan katapos niya hiya patayon, hi Peka an nagin hadi kasaliwan niya.
26 Mahitungod han iba pa nga bahin han kasaysayan ni Pekahias, an ngatanan nga iya ginbuhat, iginsurat ito ha libro han kasaysayan han mga panahon han mga hadi han Israel.
27 Ha ika-52 ka tuig ni Hadi Azarias han Juda, hi Peka+ nga anak ni Remalias nagin hadi ha Israel ha Samaria, ngan nagmando hiya hin 20 ka tuig.
28 Nagpadayon hiya ha pagbuhat han maraot ha pagkita ni Jehova, ngan waray niya bayai an mga sala nga ginbuhat ni Jeroboam nga anak ni Nebat, nga nagin hinungdan han pakasala han Israel.+
29 Ha mga adlaw ni Hadi Peka han Israel, hi Hadi Tiglat-pileser+ han Asirya sinulong ngan ginsakop an Ijon, Abel-bet-maaca,+ Janoa, Kedes,+ Hazor, Gilead,+ ngan Galilea, an bug-os nga tuna han Neptali,+ ngan an mga umurukoy iya igindistyero ha Asirya.+
30 Katapos, hi Hoshea+ nga anak ni Elah nakigkunsabo kontra kan Peka nga anak ni Remalias, ngan iya hiya gin-atake ngan ginpatay; ngan hi Hoshea an nagin hadi kasaliwan niya ha ika-20 ka tuig ni Jotam+ nga anak ni Uzias.
31 Mahitungod han iba pa nga bahin han kasaysayan ni Peka, an ngatanan nga iya ginbuhat, iginsurat ito ha libro han kasaysayan han mga panahon han mga hadi han Israel.
32 Ha ikaduha ka tuig ni Peka nga anak ni Remalias nga hadi han Israel, nagin hadi hi Jotam+ nga anak ni Uzias+ han Juda.
33 Nagin hadi hiya han 25 anyos hiya, ngan nagmando hiya hin 16 ka tuig ha Jerusalem. An ngaran han iya nanay amo hi Jerusa nga anak ni Zadok.+
34 Padayon nga ginbuhat niya an husto ha pagkita ni Jehova, sugad han ginbuhat han iya tatay nga hi Uzias.+
35 Pero waray pananggala an higtaas nga mga lugar, ngan an katawohan naghahalad la gihapon ngan nagpapaaso hin halad ha higtaas nga mga lugar.+ Hiya an nagtukod han ganghaan ha igbaw han balay ni Jehova.+
36 Mahitungod han iba pa nga bahin han kasaysayan ni Jotam, kon ano an iya ginbuhat, diri ba iginsurat ito ha libro han kasaysayan han mga panahon han mga hadi han Juda?
37 Hito nga mga adlaw ginsugo ni Jehova hi Rezin nga hadi han Sirya ngan hi Peka+ nga anak ni Remalias kontra ha Juda.+
38 Katapos, hi Jotam pinahuway kaupod han iya mga kaapoy-apoyan ngan iginlubong hiya kaupod han iya mga kaapoy-apoyan ha Syudad ni David nga iya apoy. Ngan an iya anak nga hi Ahaz an nagin hadi kasaliwan niya.
