Zacarias 14:1-21

  • Bug-os nga kadaogan han tinuod nga pagsingba (1-21)

    • Bukid han mga Olibo matutunga (4)

    • Jehova magigin usa, ngan usa la an iya ngaran (9)

    • Peste ha nakontra ha Jerusalem (12-15)

    • Selebrasyon han Piyesta han mga Payag (16-19)

    • Tagsa nga kaldero magigin baraan kan Jehova (20, 21)

14  “Kitaa! An adlaw maabot, an adlaw ni Jehova, nga an mga dinag-an tikang ha imo* pagbabarabhinon dida ha imo butnga.  Akon titirukon an ngatanan nga nasud basi makiggirra ha Jerusalem; ngan an syudad sasakupon ngan an mga balay pangunguhaan hin mga butang sugad nga dinag-an ngan an mga babaye luluguson. Ngan an katunga han syudad madidistyero, pero an mga nahisalin han katawohan diri kukuhaon tikang ha syudad.  “Hi Jehova magawas ngan makikiggirra hito nga mga nasud+ sugad han iya pakig-away ha adlaw han girra.+  Hito nga adlaw an iya mga tiil matindog ha Bukid han mga Olibo,+ nga naatubang ha Jerusalem ha este; ngan an Bukid han mga Olibo matutunga, tikang ha este* tubtob ha weste,* nga makakahimo hin daku gud nga walog; ngan an katunga han bukid mababalhin ngadto ha norte, ngan an katunga hito ngadto ha sur.  Mapalagiw kamo ngadto ha walog han akon kabukiran, kay an walog han kabukiran maabot ngadto ha Azel. Kinahanglan pumalagiw kamo, sugad han pinalagiw kamo tungod han linog ha mga adlaw ni Hadi Uzias han Juda.+ Ngan maabot hi Jehova nga akon Dios, ngan kaupod niya an ngatanan nga baraan.+  “Hito nga adlaw diri magkakaada hin mahayag nga kalamrag+—an mga butang mabagtik.*  Ngan magigin usa ito nga adlaw nga kikilalahon sugad nga kan Jehova.+ Diri ito magigin adlaw, diri liwat ito magigin gab-i; ngan durante han gab-i magkakaada kalamrag.  Hito nga adlaw an buhi nga katubigan+ maawas tikang ha Jerusalem,+ an katunga hito pakadto ha dagat ha este*+ ngan an katunga hito pakadto ha dagat ha weste.*+ Mahitatabo ito ha katpaso ngan ha kathagkot.  Ngan hi Jehova magigin Hadi ha bug-os nga tuna.+ Hito nga adlaw hi Jehova magigin usa,+ ngan usa la an iya ngaran.+ 10  “An bug-os nga tuna magigin pariho han Araba,+ tikang ha Geba+ tubtob ha Rimon+ ha sur han Jerusalem; ngan mabangon ito ngan uukyan ha hinmumutangan hito,+ tikang ha Ganghaan han Benjamin+ tubtob ha lugar han Siyahan nga Ganghaan, tubtob ha Ganghaan ha Eskina, ngan tikang ha Torre ni Hananel+ tubtob ha mga purog-an nga panbino* han hadi. 11  Ngan an katawohan mag-uukoy dida hito; ngan diri na gud magkakaada utro hin sumpa han kabungkagan,+ ngan an Jerusalem pag-uukyan nga may seguridad.+ 12  “Ngan ini an peste nga pahihinaboon ni Jehova ha ngatanan nga mga katawohan nga nakikiggirra ha Jerusalem:+ An ira unod madudunot samtang natindog pa hira, an ira mga mata madudunot dida ha mga kalungagan hito, ngan an ira dila madudunot dida ha ira baba. 13  “Hito nga adlaw an kasamok nga pahihinaboon ni Jehova magigin kalyap dida ha ira; ngan an kada tagsa magrarabot han kamot han iya kaupod, ngan aatakehon nira an usa kag usa.+ 14  An Juda mahidadabi liwat ha girra didto ha Jerusalem; ngan an bahandi han ngatanan nga nakapalibot nga nasud pagtitirukon, an bulawan ngan silber ngan bado nga damu hinduro.+ 15  “Ngan an peste nga pariho hito nga peste mahitatabo liwat ha mga kabayo, mga mula,* mga kamelyo, mga asno, ngan ha ngatanan nga hayop nga aada hito nga mga kampo. 16  “An bisan hin-o nga nanhibilin tikang ha ngatanan nga nasud nga naatake ha Jerusalem masagka ha kada tuig+ basi magyukbo* ha Hadi nga hi Jehova han mga hugpo,+ ngan basi magselebrar han Piyesta han mga Payag.*+ 17  Pero kon may bisan hin-o dida ha mga pamilya ha tuna nga diri sumagka ha Jerusalem basi magyukbo ha Hadi nga hi Jehova han mga hugpo, waray uran nga maabot ha ira.+ 18  Ngan kon an pamilya han Ehipto diri sumagka ngan diri sumulod, waray uran nga maabot ha ira. Lugod, maabot ha ira an peste nga ginpapahinabo ni Jehova ha mga nasud nga diri nasagka basi magselebrar han Piyesta han mga Payag. 19  Ini an magigin sirot para ha sala han Ehipto ngan ha sala han ngatanan nga nasud nga diri nasagka basi magselebrar han Piyesta han mga Payag. 20  “Hito nga adlaw an mga pulong nga ‘An pagkabaraan kan Jehova!’+ igsusurat ha mga kampanilya han mga kabayo. Ngan an mga kaldero*+ ha balay ni Jehova magigin pariho han mga yahong+ ha atubangan han halaran. 21  Ngan an tagsa nga kaldero* ha Jerusalem ngan ha Juda magigin baraan ngan pagtatag-iyahon ni Jehova han mga hugpo, ngan an ngatanan nga naghahalad masulod ngan magamit han iba hito para ha paglaga. Hito nga adlaw waray na Canaanita* ha balay ni Jehova han mga hugpo.”+

Mga footnote

Karuyag sidngon, an syudad nga gin-uunabi ha ber. 2.
O “ha ginsisirangan han adlaw.”
Lit., “ha dagat.”
O “diri magkikiwa,” sugad hin magtitig-a tungod han kahagkot.
Karuyag sidngon, an Dagat nga Patay.
Karuyag sidngon, an Dagat Mediteraneo.
O “mga bariles.”
An Hebreo nga pulong nagtutudlok ha anak han asno nga lalakí ngan kabayo nga babayé.
O “magsingba.”
O “Temporaryo nga mga Sirongan.”
O “mga kaldero nga haluag an ganggang.”
O “kaldero nga haluag an ganggang.”
O posible nga “parabaligya.”