Zacarias 7:1-14
7 Ngan ha ikaupat ka tuig ni Hadi Dario, an pulong ni Jehova inabot kan Zacarias+ ha ikaupat ka adlaw han ikasiyam ka bulan, nga amo an bulan han Kislev.*
2 An katawohan ha Bethel nagsugo kanda Sarezer ngan Regem-melec ngan han iya mga tawo basi makimalooy para han pag-uyon* ni Jehova,
3 nga nasiring ha mga saserdote ha balay* ni Jehova han mga hugpo ngan ha mga propeta: “Sadang ba ako magtangis ha ikalima ka bulan+ ngan diri makaon, sugad han akon ginhimo ha sulod hin damu na hinduro ka tuig?”
4 An pulong ni Jehova han mga hugpo inabot utro ha akon, nga nasiring:
5 “Sidnga an ngatanan nga katawohan ha tuna ngan an mga saserdote, ‘Han nagpuasa ngan nagnguyngoy kamo ha ikalima ka bulan ngan ha ikapito ka bulan+ ha sulod hin 70 ka tuig,+ nagpuasa gud ba kamo para ha akon?
6 Ngan han nakaon ngan nainom kamo, diri ba nakaon kamo para ha iyo kalugaringon ngan nainom para ha iyo kalugaringon?
7 Diri ba kamo sadang sumunod han mga pulong nga iginpasamwak ni Jehova pinaagi han una nga mga propeta,+ samtang an Jerusalem ngan an nakapalibot nga mga syudad hito may mga umurukoy ngan murayaw, ngan samtang an Negeb ngan an Sefela may mga umurukoy?’”
8 An pulong ni Jehova inabot utro kan Zacarias, nga nasiring:
9 “Ini an siring ni Jehova han mga hugpo, ‘Paghukom uyon ha tinuod nga hustisya,+ ngan tratara an usa kag usa nga may maunungon nga gugma+ ngan kalooy.
10 Ayaw panlimbong ha balo ngan ha bata nga waray tatay,*+ ha dayo+ o ha pobre;+ ngan ayaw pagplano hin maraot ha iyo kasingkasing kontra ha usa kag usa.’+
11 Pero padayon hira nga nagdumiri ha paghatag hin atensyon,+ ngan tungod kay matig-a an ira ulo tinalikod hira,+ ngan ira ginsarop an ira mga talinga basi diri makabati.+
12 Ira ginhimo an ira kasingkasing nga pariho hin diamante*+ ngan diri nasunod ha balaud* ngan ha mga pulong nga kan Jehova han mga hugpo iginpadara pinaagi han iya espiritu pinaagi han una nga mga propeta.+ Salit inabot an duro nga kasina ni Jehova han mga hugpo.”+
13 “‘Sugad la nga waray hira mamati han nagtawag ako,*+ waray liwat ako mamati han nagtawag hira,’+ nasiring hi Jehova han mga hugpo.
14 ‘Ngan akon hira ginsarang pinaagi hin makusog gud nga hangin ngadto ha ngatanan nga nasud nga diri nira kilala,+ ngan an tuna nagin binayaan ha ira luyo, waray bisan usa nga naagi o nabalik;+ kay an makaruruyag nga tuna ira ginhimo nga makaharadlok.’”
