Zacarias 6:1-15
6 Katapos, hinangad ako utro ngan nakakita ako hin upat nga karuwahe nga naulpot tikang ha butnga han duha nga bukid, ngan an mga bukid tumbaga.*
2 An siyahan nga karuwahe may-ada mga kabayo nga pula, ngan an ikaduha nga karuwahe, mga kabayo nga itom.+
3 An ikatulo nga karuwahe may-ada mga kabayo nga busag, ngan an ikaupat nga karuwahe, mga kabayo nga tagiptipon ngan kabang.+
4 Ginpakianhan ko an anghel nga nakikiistorya ha akon: “Ano ini, ginoo ko?”
5 An anghel binaton ha akon: “Ini an upat nga espiritu+ han langit nga nagawas katapos tumindog ha atubangan han Ginoo han bug-os nga tuna.+
6 An usa* nga may-ada mga kabayo nga itom nagawas tipakadto ha tuna ha norte;+ an mga busag nagawas tipakadto ha tabok han dagat; ngan an mga tagiptipon nagawas tipakadto ha tuna ha sur.
7 Ngan an mga kabang tigawas na gud basi libuton an bug-os nga tuna.” Katapos, hiya nagsiring: “Kadto, libota an bug-os nga tuna.” Ngan ginlibot nira an bug-os nga tuna.
8 Katapos, gintawag niya ako ngan nagsiring: “Kitaa, an mga napakadto ha tuna ha norte nagpakalma han espiritu ni Jehova ha tuna ha norte.”
9 An pulong ni Jehova inabot utro ha akon, nga nasiring:
10 “Kuhaa kanda Heldai, Tobias, ngan Jedaias an ira gindara tikang ha katawohan nga distyero; ngan hito nga adlaw, kinahanglan kumadto ka ha balay ni Josias nga anak ni Zepanias kaupod ini nga mga tikang ha Babilonya.
11 Pagdara hin silber ngan bulawan ngan paghimo hin korona* ngan ibutang ito ha ulo ni Josue+ nga hitaas nga saserdote, nga anak ni Jehozadak.
12 Ngan sidnga hiya,
“‘Ini an siring ni Jehova han mga hugpo: “Adi an tawo nga an ngaran Saha.+ Magigin saha hiya tikang ha iya mismo lugar, ngan tutukuron niya an templo ni Jehova.+
13 Hiya an magtutukod han templo ni Jehova, ngan hiya an makarawat han kadungganan. Malingkod hiya ha iya trono ngan magmamando, ngan magigin saserdote liwat hiya dida ha iya trono,+ ngan magkakaada hin murayaw nga kauyonan butnga han duha.*
14 Ngan an korona* magigin hinumdóman* para kanda Helem, Tobias, Jedaias,+ ngan Hen nga anak ni Zepanias, dida ha templo ni Jehova.
15 Ngan an mga aadto ha hirayo magkakaabot ngan mabulig ha pagtukod han templo ni Jehova.” Ngan mahibabaro gud kamo nga hi Jehova han mga hugpo an nagsugo ha akon nga kumanhi ha iyo. Ngan mahitatabo ito—kon diri kamo mapakyas ha pagpamati han tingog ni Jehova nga iyo Dios.’”
