An Ikaduha nga Libro han mga Hadi 4:1-44
4 Yana, usa han mga asawa han mga anak han mga propeta+ an nangaraba kan Eliseo, nga nasiring: “An akon bana nga imo surugoon patay na, ngan maaram ka gud nga an imo surugoon pirme may kahadlok kan Jehova.+ Yana may parapautang nga inabot basi kuhaon an akon duha nga anak sugad nga iya mga uripon.”
2 Hi Eliseo nagsiring ha iya: “Ano an maibubulig ko ha imo? Sumati ako, ano an aadto ha imo balay?” Binaton hiya: “An imo surugoon waray gud bisan ano ha balay kondi usa la ka tibod nga lana.”+
3 Katapos, hiya nagsiring: “Kadto ha gawas, pangaro hin mga surudlan nga waray sulod ha ngatanan mo nga amyaw. Damua la tubtob ha imo mahihimo.
4 Katapos, sulod kamo han imo mga anak nga lalaki ngan sadhi an purtahan. Pun-a hin lana ito ngatanan nga surudlan, ngan iglain an mga puno na.”
5 Salit linakat an babaye.
Pakasulod niya ngan han iya mga anak ha balay, iya ginsadhan an purtahan ngan ira iginduhol ha iya an mga surudlan, ngan iya ito ginpan-ipisan.+
6 Kapuno han mga surudlan, nagsiring hiya ha iya usa nga anak: “Tagi ako hin iba pa nga surudlan.”+ Pero nagsiring hiya: “Waray na mga surudlan.” Ngan inundang an lana.+
7 Salit kinadto an babaye ha surugoon han tinuod nga Dios ngan ginsumatan hiya, ngan hiya nagsiring: “Kadto, ibaligya an lana ngan bayari an imo mga utang, ngan mabubuhi ka na ngan an imo mga anak han mahisasalin hito.”
8 Usa ka adlaw, hi Eliseo kinadto ha Sunem,+ diin may-ada babaye nga kilala gud didto, ngan nagpirit ha iya nga kumaon didto.+ Kada paglabay niya, nahapit hiya didto basi kumaon.
9 Salit nagsiring hiya ha iya bana: “Maaram ako nga ito nga tawo nga pirme naagi dinhi, baraan nga surugoon han Dios.
10 Alayon, paghimo kita hin gutiay nga kwarto ha atop+ ngan butangan naton ito hin katre, lamesa, lingkoran, ngan hin burutangan han lampara para ha iya. Katapos, ha kada panahon nga makanhi hiya ha aton, makakaukoy hiya didto.”+
11 Usa ka adlaw inabot hiya didto, ngan kinadto hiya ha kwarto ha atop basi humigda.
12 Katapos, nagsiring hiya kan Gehazi+ nga iya kabulig: “Tawaga an Sunamita+ nga babaye.” Salit iya gintawag hiya, ngan tinindog hiya ha iya atubangan.
13 Katapos, nagsiring hi Eliseo kan Gehazi: “Alayon sidnga hiya, ‘Kitaa, nagsakripisyo ka ha pag-asikaso ha amon.+ Ano an maibubulig ko ha imo?+ Sadang ba ako makiistorya ha hadi+ o ha lider han kasundalohan para ha imo?’” Pero binaton hiya: “Naukoy ako nga may seguridad kaupod han akon katawohan.”
14 Salit hi Eliseo nagsiring: “Kon sugad, ano an maibubulig naton ha iya?” Yana hi Gehazi nagsiring: “Bueno, waray hiya anak nga lalaki,+ ngan an iya bana lagas na.”
15 Nagsiring dayon hi Eliseo: “Tawaga hiya.” Salit iya gintawag hiya ngan tinindog hiya ha may purtahan.
16 Katapos, hiya nagsiring: “Ha pariho hini nga panahon ha sunod nga tuig, magkukugos ka hin anak nga lalaki.”+ Pero an babaye nagsiring: “Ayaw, agaron ko, nga surugoon han tinuod nga Dios! Ayaw pagbuwa ha imo surugoon.”
17 Pero an babaye nagburod ngan nag-anak hin lalaki ha pariho nga panahon han sunod nga tuig, sugad han ginsiring ha iya ni Eliseo.
18 Nagtubo an bata, ngan usa ka adlaw ginawas hiya ngadto ha iya tatay, nga nakadto kaupod han mga mag-arani.
19 Nagsiniring hiya ha iya tatay: “Kasakit han akon ulo, kasakit han akon ulo!” Katapos, an iya tatay nagsiring ha kabulig: “Dad-a hiya ha iya nanay.”
20 Salit iginbalik niya an bata ha iya nanay, ngan nagsinabak hiya ha iya tubtob ha udto, ngan namatay hiya.+
21 Katapos, sinaka an babaye ngan iginbutang an bata ha katre han surugoon han tinuod nga Dios,+ ngan pakagawas niya ha purtahan iya ito ginsadhan ngan binaya hiya.
22 Yana gintawag niya an iya bana ngan ginsidngan: “Alayon, pakadia ha akon an usa han mga kabulig upod an usa han mga asno, ngan tuguti ako nga kumadto dayon ha surugoon han tinuod nga Dios ngan mabalik ako.”
23 Pero hiya nagsiring: “Kay ano nga makikigkita ka ha iya yana nga adlaw? Diri man yana dulom+ o sabbath.” Pero hiya nagsiring: “Ayaw kabaraka, maopay man an ngatanan.”
24 Salit iya ginbutangan hin montura* an asno ngan ginsidngan an iya kabulig: “Pagdagmit. Ayaw paghinay-hinay tungod ha akon, labot la kon sidngan ko ikaw.”
25 Salit kinadto hiya ha surugoon han tinuod nga Dios didto ha Bukid Carmel. Pakakita gud ha iya han surugoon han tinuod nga Dios han hirayo pa hiya, nagsiring hiya kan Gehazi nga iya kabulig: “Kitaa! Aadto an Sunamita nga babaye.
26 Alayon, dalagan ngadto pagtapo ha iya ngan pakianhi hiya, ‘Kumusta ka? Kumusta an imo bana? Kumusta an imo anak?’” Binaton hiya: “Maopay man an amon kahimtang.”
27 Pag-abot niya ha surugoon han tinuod nga Dios didto ha bukid, kinapot dayon hiya ha iya mga tiil.+ Salit hi Gehazi hinirani basi igduso hiya, pero an surugoon han tinuod nga Dios nagsiring: “Pabay-i la hiya, kay nasasakit gud hiya,* ngan igintago ito ni Jehova ha akon ngan waray ako sumati.”
28 Katapos, an babaye nagsiring: “Nangaro ba ako ha akon ginoo hin anak nga lalaki? Diri ba nagsiring ako, ‘Ayaw ako pagpalaoma ha waray’?”+
29 Nagsiring dayon hi Eliseo kan Gehazi: “Igsuksok an ubos nga bahin han imo mga bado ha imo hawak+ ngan bitbita an akon tungkod ngan kadto. Kon igkatapo ka hin bisan hin-o, ayaw hiya pangumustaha; ngan kon may bisan hin-o nga mangumusta ha imo, ayaw hiya batona. Kadto ngan ibutang an akon tungkod ha nawong han bata.”
30 An nanay han bata nagsiring: “Sugad nga hi Jehova buhi ngan sugad nga ikaw mismo* buhi, diri ako mabaya kon diri ka umupod.”+ Salit binuhát hi Eliseo ngan inupod ha iya.
31 Hi Gehazi nag-una ha ira ngan iginbutang an tungkod ha nawong han bata, pero waray magtingog o magkiwa an bata.+ Binalik hiya basi tapoon hi Eliseo ngan ginsumatan hiya: “Waray pagmata an bata.”
32 Pag-abot ni Eliseo ha balay, an bata patay na nga nahigda ha iya katre.+
33 Sinulod hiya ngan ginsadhan an purtahan han kwarto. Hira la nga duha an nakadto ha sulod. Ngan nag-ampo hi Eliseo kan Jehova.+
34 Katapos, sinaka hiya ha katre ngan hinapa ha bata ngan igintungbaw niya an iya baba ha baba han bata, an iya mga mata ha iya mga mata, ngan an iya mga palad ha iya mga palad ngan nagpabilin hiya nga nahapa ha iya, ngan an lawas han bata nagtikapaso.+
35 Naglinakat-lakat hiya ngadto-nganhi ha balay, ngan sinaka hiya ha katre ngan hinapa utro ha iya. An bata naghatsing hin pito ka beses, katapos hito iya ginpukrat an iya mga mata.+
36 Yana gintawag ni Eliseo hi Gehazi ngan ginsidngan: “Tawaga an Sunamita nga babaye.” Salit iya gintawag hiya ngan kinadto hiya ha iya. Katapos, hi Eliseo nagsiring: “Kuhaa an imo anak.”+
37 Ngan sinulod hiya ngan linuhod ngan hinapa dida mismo ha mga tiil ni Eliseo ha iya atubangan, katapos hito, iya ginkuha an iya anak ngan ginawas.
38 Han binalik hi Eliseo ha Gilgal, may-ada gutom ha tuna.+ An mga anak han mga propeta+ nangalingkod ha iya atubangan, ngan nagsiring hiya ha iya kabulig:+ “Isun-ad an daku nga daba ngan pagluto hin utan nga sinabwan para ha mga anak han mga propeta.”
39 Salit usa ha ira an kinadto ha uma basi manguha hin mga utanon, ngan nakaagi hiya hin ihalas nga balagon ngan ginpanguha an mga bunga hito, tubtob nga napuno an iya bado. Katapos, binalik hiya ngan gintiros-tiros ito ngada ha daba nga lagaan, nga diri hiya maaram kon ano ito.
40 Kahuman, ira ito iginserbi ha mga lalaki basi kaunon, pero pakakaon gud nira han utan nga sinabwan, ginuliat hira: “May makamaratay dida ha daba, O surugoon han tinuod nga Dios.” Ngan waray nira ito kaona.
41 Salit hiya nagsiring: “Kuha kamo hin gutiay nga harina.” Katapos niya ito isaburak ha sulod han daba, nagsiring hiya: “Igserbi ito ha mga tawo.” Ngan waray na nakakadaot ha sulod han daba.+
42 May usa nga tawo tikang ha Baal-salisa,+ ngan gindad-an niya an surugoon han tinuod nga Dios hin 20 ka bug-os nga tinapay nga sebada+ nga hinimo tikang ha siyahan nga hinog nga mga bunga, sugad man hin usa ka supot nga bag-o nga lugas.+ Katapos hi Eliseo nagsiring: “Ihatag ito ha mga tawo basi makakaon hira.”
43 Pero an iya kabulig nagsiring: “Paonan-o ko ini ibubutang ha atubangan han 100 ka tawo?”+ Binaton hiya: “Ihatag ito ha mga tawo basi hira makakaon, kay ini an siring ni Jehova, ‘Mangangaon hira ngan may mahisasalin pa.’”+
44 Salit iya ito iginbutang ha ira atubangan, ngan nangaon hira ngan may-ada pa hira nahisalin,+ sumala ha ginsiring ni Jehova.
