An Ikaduha nga Libro han mga Hadi 17:1-41
17 Ha ika-12 ka tuig ni Hadi Ahaz han Juda, hi Hoshea+ nga anak ni Elah nagin hadi ha Israel ha Samaria; nagmando hiya hin siyam ka tuig.
2 Padayon nga ginbuhat niya an maraot ha pagkita ni Jehova, pero diri sugad karaot ha ginbuhat han mga hadi han Israel nga nauna ha iya.
3 Hi Hadi Salmaneser han Asirya sinulong ha iya,+ ngan hi Hoshea nagin iya surugoon ngan nagtikang paghatag hin bayad* ha iya.+
4 Pero hinbaroan han hadi han Asirya nga hi Hoshea nahidabi ha pakigkunsabo, kay nagsugo hiya hin mga mensahero ngadto kan Hadi So han Ehipto+ ngan waray niya ighatag an bayad ngadto ha hadi han Asirya sugad han naglabay nga mga tuig. Salit ginpriso hiya han hadi han Asirya ngan gin-gapos ha prisohan.
5 Ginsakop han hadi han Asirya an bug-os nga tuna, ngan kinadto hiya ha Samaria ngan ginpalibotan ito ha sulod hin tulo ka tuig.
6 Ha ikasiyam ka tuig ni Hoshea, ginsakop han hadi han Asirya an Samaria.+ Katapos, iya igindistyero an katawohan han Israel+ ngadto ha Asirya ngan ginpaukoy hira ha Hala ngan ha Habor didto ha salog han Gozan+ ngan ha mga syudad han mga Mediano.+
7 Nahitabo ini tungod kay nakasala an katawohan han Israel kan Jehova nga ira Dios, nga naggawas ha ira ha tuna han Ehipto tikang ha pagmando han Paraon nga hadi han Ehipto.+ Nagsingba* hira ha iba nga mga dios,+
8 ira ginsunod an mga kustomre han mga nasud nga ginpaiwas ni Jehova tikang ha atubangan han mga Israelita, ngan ira ginsunod an mga kustomre nga ginhimo han mga hadi han Israel.
9 Ginbinuhat han mga Israelita an mga butang nga diri husto sumala kan Jehova nga ira Dios. Padayon hira nga nagtukod hin higtaas nga mga lugar ha ngatanan nira nga syudad,+ tikang ha torre nga taran-awan tubtob ha pinader nga syudad.*
10 Padayon nga nagtindog hira para ha ira kalugaringon hin sagrado nga mga harigi ngan sagrado nga mga poste*+ ha tagsa nga hitaas nga bungtod ngan ha ilarom han tagsa nga marampag nga kahoy;+
11 ngan ha ngatanan nga higtaas nga lugar nagpapaaso hira hin halad sugad han ginbuhat han mga nasud nga igindistyero ni Jehova tikang ha ira atubangan.+ Padayon nga ginbuhat nira an magraot nga mga butang basi pasinahon hi Jehova.
12 Padayon nga nag-alagad hira ha mangil-ad nga mga idolo,*+ nga mahitungod hito hi Jehova nagsiring ha ira: “Ayaw niyo ini pagbuhata!”+
13 Padayon nga ginpahamangnoan ni Jehova an Israel ngan an Juda pinaagi ha ngatanan niya nga propeta ngan ha tagsa nga parasumat hin bisyon,+ nga nasiring: “Bayai an iyo magraot nga mga panggawi!+ Tumana an akon mga sugo ngan an mga surundon nga akon iginhatag uyon ha ngatanan nga balaud nga akon iginsugo ha iyo mga kaapoy-apoyan nga akon iginpadangat ha iyo pinaagi ha akon mga surugoon nga mga propeta.”
14 Pero waray hira mamati, ngan nagpabilin nga matig-a an ira ulo sugad han* ira mga kaapoy-apoyan nga waray magpakita hin pagtoo kan Jehova nga ira Dios.+
15 Padayon nga iginsalikway nira an iya mga regulasyon ngan an kasabotan+ nga iya ginhimo ha ira mga kaapoy-apoyan ngan an iya mga pahinumdom nga iya iginhatag basi pahamangnoan hira,+ ngan padayon nga nagsingba hira ha waray pulos nga mga idolo+ ngan hira mismo nagin waray pulos,+ ginsusubad an mga nasud nga nakapalibot ha ira nga mahitungod hito iginsugo ni Jehova nga diri nira subaron.+
16 Padayon nga gintalikdan nira an ngatanan nga sugo ni Jehova nga ira Dios, ngan naghimo hira hin metal nga mga rebulto* hin duha nga nati nga baka+ ngan hin sagrado nga poste,*+ ngan yinukbo hira ha bug-os nga hugpo han langit+ ngan nag-alagad kan Baal.+
17 Ira liwat ginsunog ha kalayo* an ira mga anak nga lalaki ngan an ira mga anak nga babaye,+ nagbuhat hira hin panigo+ ngan namiling hin mga tigaman, ngan padayon nga nagbuhat hira hin maraot* ha pagkita ni Jehova, basi pasinahon hiya.
18 Salit nasina gud hi Jehova ha Israel, amo nga iya hira ginwara ha iya paniplatan.+ Waray hiya iginbilin nga bisan hin-o labot la han tribo ni Juda.
19 Bisan an Juda waray magtuman han mga sugo ni Jehova nga ira Dios;+ ginbuhat liwat nira an mga kustomre nga ginsunod han Israel.+
20 Iginsalikway ni Jehova an ngatanan nga katulinan ni Israel ngan ginpakaalohan hira ngan iginhatag hira ha kamot han mga nangunguha hin dinag-an, tubtob nga iya hira ginpaiwas ha iya atubangan.
21 Iya ginkuha* an Israel tikang ha balay ni David, ngan ira ginhimo nga hadi hi Jeroboam nga anak ni Nebat.+ Pero hi Jeroboam an hinungdan nga sinimang an Israel ha pagsunod kan Jehova, ngan hiya an hinungdan nga nakabuhat hira hin daku nga sala.
22 Ngan an katawohan han Israel padayon nga nagsunod han ngatanan nga sala nga ginbuhat ni Jeroboam.+ Waray hira bumaya hito
23 tubtob nga ginwara ni Jehova an Israel ha iya paniplatan, sugad han iya iginpahayag pinaagi han ngatanan niya nga surugoon nga mga propeta.+ Salit igindistyero an Israel tikang ha tuna hito ngadto ha Asirya,+ diin nagpapabilin hira didto tubtob hini nga adlaw.
24 Katapos, an hadi han Asirya nagdara hin mga tawo tikang ha Babilonya, Cuta, Ava, Hamat, ngan Separvaim+ ngan ginpaukoy hira ha mga syudad han Samaria kasaliwan han mga Israelita; hira an nagtag-iya han Samaria ngan inukoy hira ha mga syudad hito.
25 Han nagtikang hira pag-ukoy didto, waray hira magkaada kahadlok* kan Jehova. Salit nagpadara hi Jehova hin mga leon ngada ha ira,+ ngan ginpamatay hito an pipira han katawohan.
26 Ini an iginsumat ha hadi han Asirya: “An mga nasud nga imo igindistyero ngan ginpaukoy ha mga syudad han Samaria diri maaram han relihiyon* ngan han Dios han tuna. Salit padayon nga nagpapadara hiya hin mga leon ngada ha ira, nga nagpapatay ha ira, kay waray bisan usa ha ira an maaram han relihiyon ngan han Dios han tuna.”
27 Ngan an hadi han Asirya nagsugo: “Pabalika didto an usa han mga saserdote nga iyo igindistyero tikang didto basi umukoy didto ngan magtutdo ha ira han relihiyon ngan han Dios han tuna.”
28 Salit usa han mga saserdote nga ira igindistyero tikang ha Samaria an binalik basi umukoy ha Bethel,+ ngan iya gintutdoan hira kon paonan-o magkaada hin kahadlok* kan Jehova.+
29 Pero an kada nasud naghimo han ira kalugaringon nga dios,* nga ira iginbutang ha mga balay han pagsingba didto ha higtaas nga mga lugar nga ginhimo han mga Samaritano; ginbuhat ito han kada nasud ha ira mga syudad nga ira gin-uukyan.
30 Salit an mga tawo han Babilonya naghimo hin imahen ni Sucot-benot, an mga tawo han Cut naghimo hin imahen ni Nergal, an mga tawo han Hamat+ naghimo hin imahen ni Asima,
31 ngan an mga Avita naghimo hin imahen ni Nibhaz ngan Tartak. An mga Separvita nagsusunog han ira mga anak ha kalayo para kan Adramelec ngan Anamelec, nga mga dios han Separvaim.+
32 Bisan kon may-ada hira kahadlok kan Jehova, nagpili hira hin mga saserdote tikang ha ngatanan nga katawohan para ha higtaas nga mga lugar, ngan hira an nag-alagad para ha ira ha mga balay han pagsingba didto ha higtaas nga mga lugar.+
33 Salit, nagkaada hira hin kahadlok kan Jehova, pero nagsingba hira ha ira kalugaringon nga mga dios uyon ha relihiyon* han mga nasud nga ira gintikangan.+
34 Tubtob hini nga adlaw, ira ginsusunod an ira mga relihiyon* han una. Waray ha ira nagsisingba* kan Jehova, ngan waray nagtutuman han mga surundon nga iya iginhatag, han iya mga paghukom, han Balaud, ngan han sugo nga iginhatag ni Jehova ha mga anak ni Jacob, nga an ngaran iya ginsaliwnan hin Israel.+
35 Han hi Jehova naghimo hin kasabotan ha ira,+ iya ginsugo hira: “Ayaw kamo pagkaada hin kahadlok ha iba nga mga dios, ngan ayaw kamo pagyukbo ha ira o pag-alagad ha ira o paghalad ha ira.+
36 Pero hi Jehova, nga naggawas ha iyo ha tuna han Ehipto pinaagi hin daku nga gahum ngan hin nakaunat nga butkon,+ amo an Dios nga sadang niyo kahadlokan,+ ngan ha iya kamo sadang yumukbo, ngan ha iya kamo sadang maghalad.
37 Ngan an mga regulasyon, an mga paghukom, an Balaud, ngan an sugo nga iya iginsurat para ha iyo,+ sadang niyo sundon pirme hin maopay, ngan ayaw kamo pagkaada hin kahadlok ha iba nga mga dios.
38 Ngan ayaw niyo kalimti an kasabotan nga akon ginhimo ha iyo,+ ngan ayaw kamo pagkaada hin kahadlok ha iba nga mga dios.
39 Pero kan Jehova nga iyo Dios sadang kamo magkaada hin kahadlok, kay hiya an magtatalwas ha iyo tikang ha kamot han ngatanan niyo nga kaaway.”
40 Pero waray hira sumugot, ngan ira ginsunod an ira relihiyon* han una.+
41 Salit ini nga mga nasud nagkaada hin kahadlok kan Jehova,+ pero nag-alagad liwat hira ha ira kalugaringon nga inukit nga mga imahen. Ginbuhat ito han ira mga anak ngan han ira mga apo sugad han ginbuhat han ira mga kaapoy-apoyan, tubtob hini nga adlaw.
Mga footnote
^ Lit., “Nahadlok.”
^ Karuyag sidngon, ha tagsa nga lugar, gutiay man an naukoy o damu.
^ An Hebreo nga termino bangin may koneksyon ha pulong para ha “tai” ngan gin-gagamit sugad nga pagtamay.
^ Lit., “ginpatig-a an ira liog sugad han liog han.”
^ O “hinurma nga mga rebulto.”
^ O “iginbaligya an ira kalugaringon ha pagbuhat hin maraot.”
^ Lit., “ginpaagi ha kalayo.”
^ Lit., “gin-gisi.”
^ O “magsingba.”
^ O “mga kustomre han relihiyon.”
^ O “magsingba.”
^ O “mga dios.”
^ O “mga kustomre han relihiyon.”
^ O “an mga kustomre han ira relihiyon.”
^ Lit., “nahahadlok.”
^ O “an mga kustomre han ira relihiyon.”
