An Ikaduha nga Libro han mga Hadi 8:1-29
8 Hi Eliseo nagsiring ha babaye nga an anak iya ginbanhaw:*+ “Buhát ngan lakat, ikaw ngan an imo panimalay, ngan ukoy sugad nga dayo ha bisan diin nga imo makakadtoan, kay hi Jehova nagpahayag nga magkakaada hin gutom,+ ngan mahitatabo ito ha tuna hin pito ka tuig.”
2 Salit an babaye binuhát ngan ginhimo an ginsiring han surugoon han tinuod nga Dios. Linakat hiya upod an iya panimalay ngan inukoy ha tuna han mga Filisteo+ hin pito ka tuig.
3 Katapos han pito ka tuig, an babaye binalik tikang ha tuna han mga Filisteo ngan kinadto ha hadi basi makimalooy para han iya balay ngan han iya uma.
4 Yana an hadi nakiistorya kan Gehazi nga kabulig han surugoon han tinuod nga Dios, nga nasiring: “Alayon, isumat ha akon an ngatanan nga urusahon nga butang nga ginbuhat ni Eliseo.”+
5 Samtang iginsusumat niya ha hadi kon paonan-o ni Eliseo ginbanhaw an patay,+ an babaye nga an anak ginbanhaw kinadto ha hadi, nakikimalooy para han iya balay ngan han iya uma.+ Nagsiring dayon hi Gehazi: “Akon ginoo nga hadi, amo ini an babaye, ngan amo ini an iya anak, nga ginbanhaw ni Eliseo.”
6 Ngan an hadi nagpakiana ha babaye, ngan iginsumat niya ha iya an nahitabo. Katapos, an hadi nagtawag para ha babaye hin opisyal ha palasyo ngan ginsidngan hiya: “Ibalik ha iya an ngatanan nga iya gintatag-iya ngan bayari hiya han ngatanan nga kità han uma tikang ha adlaw nga binaya hiya ha tuna tubtob yana.”
7 Hi Eliseo inabot ha Damasco+ han may sakit hi Ben-hadad+ nga hadi han Sirya. Salit iginsumat ito ha iya: “An surugoon han tinuod nga Dios+ inabot nganhi.”
8 An hadi binaton kan Hazael:+ “Pagdara hin regalo ngan lakat ngan pakigkita ha surugoon han tinuod nga Dios.+ Pakianhi hi Jehova pinaagi ha iya, nga nasiring, ‘Mag-oopay ba ako hini nga akon sakit?’”
9 Hi Hazael linakat basi makigkita ha iya ngan nagdara hiya hin regalo, han tagsa nga klase han mag-opay nga butang ha Damasco, nga iginkarga ha 40 nga kamelyo. Inabot hiya ngan tinindog ha iya atubangan ngan nagsiring: “An imo anak, hi Ben-hadad nga hadi han Sirya, nagsugo ha akon nga kumanhi ha imo, nga napakiana, ‘Mag-oopay ba ako hini nga akon sakit?’”
10 Hi Eliseo binaton ha iya: “Lakat ngan sumati hiya, ‘Sigurado nga mag-oopay ka,’ pero iginpakita ha akon ni Jehova nga sigurado nga mamamatay hiya.”+
11 Ngan ginkinita niya hi Hazael tubtob nga naawod. Katapos, an surugoon han tinuod nga Dios nagtangis.
12 Hi Hazael nagpakiana: “Kay ano nga nagtatangis an akon ginoo?” Hiya binaton: “Tungod kay maaram ako han kadaot nga imo bubuhaton ha katawohan han Israel.+ Imo susunugon an ira pinader nga mga lugar, imo papatayon pinaagi han espada an ira magkusog nga mga lalaki, imo igpupusak an ira kabataan, ngan imo bubusbosan an ira burod nga mga babaye.”+
13 Hi Hazael nagsiring: “Paonan-o ito mabubuhat han imo surugoon, nga usa la nga ayam?” Pero hi Eliseo nagsiring: “Iginpakita ha akon ni Jehova nga magigin hadi ka ha Sirya.”+
14 Katapos, ginbayaan niya hi Eliseo ngan binalik ha iya ginoo, nga nagsiring ha iya: “Ano an ginsiring ni Eliseo ha imo?” Hiya binaton: “Nagsiring hiya ha akon nga sigurado nga mag-oopay ka.”+
15 Pero kinabuwasan, hi Hazael nagkuha hin kobrekama, igintunlob ito ha tubig, ngan iginduon* ito ha nawong han hadi tubtob nga namatay hiya.+ Ngan hi Hazael an nagin hadi kasaliwan niya.+
16 Ha ikalima ka tuig ni Jehoram+ nga anak ni Ahab nga hadi han Israel, samtang hi Jehosafat amo an hadi han Juda, nagin hadi hi Jehoram+ nga anak ni Hadi Jehosafat han Juda.
17 Nagin hadi hiya han 32 anyos hiya, ngan nagmando hiya hin walo ka tuig ha Jerusalem.
18 Naglakat hiya ha dalan han mga hadi ha Israel,+ sugad han ginbuhat han panimalay ni Ahab,+ kay nagin asawa niya an anak nga babaye ni Ahab;+ ngan padayon nga ginbuhat niya an maraot ha pagkita ni Jehova.+
19 Pero diri karuyag ni Jehova nga bungkagon an Juda tungod kan David nga iya surugoon,+ kay hiya nagsaad ha iya nga pirme hiya maghahatag hin lampara ha iya+ ngan ha iya mga anak.
20 Ha iya mga adlaw an Edom nagrebelde ha Juda+ ngan katapos, nagpili hin ira kalugaringon nga hadi.+
21 Salit hi Jehoram tinabok ha Zair upod an ngatanan niya nga karuwahe, ngan umatake hiya han gab-i ngan ginpirde an mga Edomita nga nakapalibot ha iya ngan an mga kumander han mga nakakaruwahe; ngan pinalagiw an mga sundalo ngadto ha ira mga tolda.
22 Pero padayon nga nagrebelde an Edom ha Juda tubtob hini nga adlaw. Nagrebelde liwat an Libna+ hito nga panahon.
23 Ngan an iba pa nga bahin han kasaysayan ni Jehoram, an ngatanan nga iya ginbuhat, diri ba iginsurat ito ha libro han kasaysayan han mga panahon han mga hadi han Juda?
24 Katapos, hi Jehoram pinahuway kaupod han iya mga kaapoy-apoyan ngan iginlubong kaupod han iya mga kaapoy-apoyan ha Syudad ni David.+ Ngan an iya anak nga hi Ahazias+ an nagin hadi kasaliwan niya.
25 Ha ika-12 ka tuig ni Jehoram nga anak ni Ahab nga hadi han Israel, nagin hadi hi Ahazias nga anak ni Hadi Jehoram han Juda.+
26 Hi Ahazias 22 anyos han nagin hadi hiya, ngan nagmando hiya hin usa ka tuig ha Jerusalem. An ngaran han iya nanay amo hi Atalia+ nga apo* ni Hadi Omri+ han Israel.
27 Naglakat hiya ha dalan han panimalay ni Ahab+ ngan padayon nga ginbuhat an maraot ha pagkita ni Jehova, pariho han panimalay ni Ahab, kay an asawa han iya tatay tikang ha panimalay ni Ahab.+
28 Salit kinadto hiya upod hi Jehoram nga anak ni Ahab basi makiggirra kan Hadi Hazael han Sirya didto ha Ramot-gilead,+ pero nasamaran hi Jehoram han mga Siryano.+
29 Salit hi Hadi Jehoram binalik ngadto ha Jezreel+ basi magpaopay han iya mga samad kay nasamaran hiya han mga Siryano didto ha Rama han nakig-away hiya kan Hadi Hazael han Sirya.+ Hi Ahazias nga anak ni Jehoram nga hadi han Juda linugsad ngadto ha Jezreel basi kitaon hi Jehoram nga anak ni Ahab, kay nasamaran hiya.*
