An Ikaduha nga Libro han mga Hadi 11:1-21
11 Yana han nakita ni Atalia+ nga nanay ni Ahazias nga an iya anak namatay,+ binuhát hiya ngan ginpoo an ngatanan nga tulin han hadi.*+
2 Pero ginkuha ni Jehoseba nga anak nga babaye ni Hadi Jehoram, nga bugto ni Ahazias, hi Jehoas+ nga anak ni Ahazias ngan ginkawat hiya tikang ha mga anak han hadi nga pamamatayon, gintago hiya ngan an iya yaya ha kwarto ha sulod. Naitago nira hiya tikang kan Atalia, salit waray hiya kamatay.
3 Nagpabilin hiya kaupod niya hin unom ka tuig, nga nakatago ha balay ni Jehova, samtang hi Atalia nagmamando ha tuna.
4 Han ikapito ka tuig, iginpatawag ni Jehoiada an mga lider han kada 100 han Cariano nga mga gwardya ngan an mga gwardya ha palasyo*+ ngan ginpakadto hira ha iya ha balay ni Jehova. Naghimo hiya hin kauyonan* ha ira ngan ginpasumpa hira ngada hito didto ha balay ni Jehova, ngan katapos, iya iginpakita ha ira an anak han hadi.+
5 Iya hira ginsugo: “Ini an iyo bubuhaton: Pagbarahin kamo ha tulo nga grupo. An siyahan nga grupo magbabantay kon Sabbath ngan babantayan nira hin maopay an balay* han hadi,+
6 an ikaduha nga grupo ha Ganghaan han Pundasyon, ngan an ikatulo nga grupo ha ganghaan ha luyo han mga gwardya ha palasyo. Magsusurosaliwan kamo pagbantay han balay.
7 An duha nga grupo nga diri magbabantay kon Sabbath kinahanglan magbantay hin maopay ha balay ni Jehova basi proteksyonan an hadi.
8 Kinahanglan palibotan niyo an hadi ha ngatanan nga dapit, an kada tagsa dara an iya armas. An bisan hin-o nga sumulod ha rumbay han mga sundalo papatayon. Updi an hadi bisan diin hiya kumadto.”*
9 Ginbuhat gud han mga lider han kada 100+ an iginsugo ni Jehoiada nga saserdote. Salit gindara han tagsa ha ira an iya mga tawo nga nagbabantay kon Sabbath, upod an mga diri nagbabantay kon Sabbath, ngan kinadto kan Jehoiada nga saserdote.+
10 Katapos, iginhatag han saserdote ha mga lider han kada 100 an mga bangkaw ngan an maglidong nga mga taming nga gintatag-iya ni Hadi David, nga nakadto ha balay ni Jehova.
11 Ngan an mga gwardya ha palasyo+ kinadto ha ira mga pwesto, nga an kada tagsa may dara nga mga armas, tikang ha too nga dapit han balay ngadto ha wala nga dapit han balay, ha ligid han halaran+ ngan ha ligid han balay, ha palibot han hadi.
12 Katapos, igin-gawas ni Jehoiada an anak han hadi+ ngan iginbutang ha iya an korona* ngan an Pagpamatuod,*+ ngan ira hiya ginhimo nga hadi ngan gindihogan hiya. Nagpakpak hira ngan siniring: “Mabuhi an hadi!”+
13 Han nabatian ni Atalia an aringasa han mga tawo nga nagdadadlagan, kinadto dayon hiya ha mga tawo ha balay ni Jehova.+
14 Ngan nakita niya an hadi nga natindog didto hirani ha harigi uyon ha kustomre.+ An mga lider ngan an mga paragtrumpeta+ kaupod han hadi, ngan an ngatanan nga katawohan han tuna nagrayhak ngan naghuyop han mga trumpeta. Tungod hito gin-gisi ni Atalia an iya bado ngan ginuliat: “Pagkunsabo! Pagkunsabo!”
15 Pero ginsugo ni Jehoiada nga saserdote an mga lider han kada 100,+ an mga ginpili nga manguna han kasundalohan, ngan nagsiring ha ira: “Kuhaa hiya tikang ha rumbay han mga sundalo, ngan kon may sumunod ha iya, pataya pinaagi han espada!” Kay an saserdote nagsiring: “Ayaw hiya pagpataya ha balay ni Jehova.”
16 Salit ira hiya gindakop, ngan pag-abot niya ha lugar nga gin-aagian han mga kabayo pagsulod ha balay* han hadi,+ didto hiya ginpatay.
17 Katapos, naghimo hi Jehoiada hin kasabotan butnga ni Jehova ngan han hadi ngan han katawohan,+ nga padayon hira nga magigin katawohan ni Jehova, ngan naghimo liwat hiya hin kasabotan butnga han hadi ngan han katawohan.+
18 Katapos hito, an ngatanan nga katawohan han tuna kinadto ha balay* ni Baal ngan ginbungkag an iya mga halaran,+ bug-os nga gindugmok an iya mga imahen,+ ngan ginpatay hi Mattan nga saserdote ni Baal+ dida ha atubangan han mga halaran.
Katapos, nagpili an saserdote hin mga magdudumara ha balay ni Jehova.+
19 Dugang pa, iya gintirok an mga lider han kada 100,+ an Cariano nga mga gwardya, an mga gwardya ha palasyo,+ ngan an ngatanan nga katawohan han tuna basi updan an hadi tikang ha balay ni Jehova, ngan ha ganghaan han gwardya ha palasyo hira umagi tipakadto ha balay* han hadi. Katapos, liningkod hiya ha trono han mga hadi.+
20 Salit an ngatanan nga katawohan han tuna nagrayhak ngan nagin murayaw an syudad, kay ira ginpatay hi Atalia pinaagi han espada didto ha balay han hadi.
21 Nagin hadi hi Jehoas+ han syete anyos hiya.+
