An Ikaduha nga Libro han mga Hadi 9:1-37
9 Katapos, gintawag ni Eliseo an usa han mga anak han mga propeta ngan nagsiring ha iya: “Igsuksok an ubos nga bahin han imo mga bado ha imo hawak, ngan dad-a dayon ini nga tibod han lana ngan pakadto ha Ramot-gilead.+
2 Pag-abot mo didto, pamilnga hi Jehu+ nga anak ni Jehosafat nga anak ni Nimsi; sulod ngan patindoga hiya ngan pabayaa ha iya kabugtoan ngan dad-a hiya ngadto ha gisusuluri nga kwarto.
3 Katapos, kuhaa an tibod han lana ngan igbubo ito ha iya ulo ngan siring, ‘Ini an ginsiring ni Jehova: “Gindidihogan ko ikaw sugad nga hadi han Israel.”’+ Katapos, abrihi an purtahan ngan palagiw dayon.”
4 Salit an kabulig han propeta linarga tipakadto ha Ramot-gilead.
5 Pag-abot niya, an mga lider han kasundalohan nanlilingkod didto. Hiya nagsiring: “May mensahe ako para ha imo, O lider.” Hi Jehu nagpakiana: “Hin-o ha amon?” Hiya nagsiring: “Para ha imo, O lider.”
6 Salit binuhát hi Jehu ngan sinulod ha balay; iginbubo han kabulig an lana ngada ha iya ulo ngan nagsiring ha iya, “Ini an ginsiring ni Jehova nga Dios han Israel: ‘Gindidihogan ko ikaw sugad nga hadi han katawohan ni Jehova, han Israel.+
7 Kinahanglan pamatayon mo an panimalay ni Ahab nga imo ginoo, ngan akon igbubulos an dugo han akon mga surugoon nga mga propeta ngan han ngatanan nga surugoon ni Jehova nga namatay ha mga kamot ni Jezebel.+
8 Ngan an bug-os nga panimalay ni Ahab magkakamatay; ngan akon pupoohon tikang kan Ahab an tagsa nga lalaki,* upod an mga waray mahihimo ngan magluya ha Israel.+
9 Ngan hihimoon ko an panimalay ni Ahab pariho han panimalay ni Jeroboam+ nga anak ni Nebat ngan pariho han panimalay ni Baasa+ nga anak ni Ahias.
10 Mahitungod kan Jezebel, kakaunon hiya han mga ayam dida ha tuna han Jezreel,+ ngan waray bisan usa nga maglulubong ha iya.’” Katapos, iya gin-abrihan an purtahan ngan pinalagiw.+
11 Pagbalik ni Jehu ngadto ha mga surugoon han iya ginoo, nagpakiana hira ha iya: “May problema ba? Kay ano nga kinanhi ha imo ini nga lurong nga tawo?” Hiya binaton ha ira: “Maaram kamo han sugad hito nga klase hin tawo ngan kon ano nga klase an iya istorya.”
12 Pero nagsiring hira: “Diri ito tinuod! Alayon sumati kami.” Katapos, hiya nagsiring: “Ini an iya ginsiring ha akon, ngan nagsiring pa hiya, ‘Ini an ginsiring ni Jehova: “Gindidihogan ko ikaw sugad nga hadi han Israel.”’”+
13 Salit ginhukas dayon han tagsa ha ira an iya bado ngan iginbutang ito ha mga balitang basi iya tamakan,+ ngan ginhuypan nira an sungay ngan nagsiring: “Hi Jehu nagin hadi!”+
14 Katapos, hi Jehu+ nga anak ni Jehosafat nga anak ni Nimsi nakigkunsabo kontra kan Jehoram.
Hi Jehoram nagbinantay ha Ramot-gilead,+ hiya ngan an bug-os nga Israel, tungod kan Hadi Hazael+ han Sirya.
15 Ha urhi, hi Hadi Jehoram binalik ha Jezreel+ basi magpaopay han iya mga samad kay nasamaran hiya han mga Siryano han nakig-away hiya kan Hadi Hazael han Sirya.+
Yana hi Jehu nagsiring: “Kon nauyon ka,* ayaw tuguti nga makapalagiw an bisan hin-o tikang ha syudad basi kumadto ngan magsumat hini ha Jezreel.”
16 Katapos, hi Jehu sinakay ha iya karuwahe ngan kinadto ha Jezreel, kay aadto didto hi Jehoram nahigda nga may mga samad, ngan hi Hadi Ahazias han Juda linugsad ngadto basi makita hi Jehoram.
17 Samtang an bantay natindog ha torre ha Jezreel, nakita niya nga tiabot an damu nga tawo ni Jehu. Nagsiring dayon hiya: “May nakikita ako nga damu nga tawo.” Hi Jehoram nagsiring: “Kuha hin nakakabayo nga sundalo ngan sugoa hiya nga tapoon hira, ngan pasiringa hiya: ‘Kinanhi ka ba para ha kamurayawan?’”
18 Salit linarga an nakakabayo nga sundalo basi tapoon hiya ngan nagsiring: “Ini an siring han hadi, ‘Kinanhi ka ba para ha kamurayawan?’” Pero hi Jehu nagsiring: “Ano an imo nahibabaroan mahitungod han ‘kamurayawan’? Sunod ha akon!”
Katapos, an bantay nagsumat: “An mensahero nakaabot ha ira, pero waray hiya bumalik.”
19 Salit nagsugo hiya hin ikaduha nga nakakabayo nga sundalo nga nagsiring han inabot hiya ha ira: “Ini an siring han hadi, ‘Kinanhi ka ba para han kamurayawan?’” Pero hi Jehu nagsiring: “Ano an imo nahibabaroan mahitungod ha ‘kamurayawan’? Sunod ha akon!”
20 Katapos, an bantay nagsumat: “Nakaabot hiya ha ira, pero waray hiya bumalik, ngan an pagpadalagan han karuwahe pariho han pagpadalagan ni Jehu nga apo* ni Nimsi, kay an iya pagpadalagan pariho hin kanan tuyaw nga tawo.”
21 Hi Jehoram nagsiring: “Andama an karuwahe!” Salit igin-andam an iya pan-girra nga karuwahe ngan hi Hadi Jehoram han Israel ngan hi Hadi Ahazias+ han Juda ginawas nga sakay han ira kalugaringon nga pan-girra nga karuwahe basi tapoon hi Jehu. Iginkatapo nira hiya ha tuna ni Nabot+ nga taga-Jezreel.
22 Pakakita gud ni Jehoram kan Jehu, nagsiring hiya: “Kinanhi ka ba para ha kamurayawan, Jehu?” Pero hiya nagsiring: “Paonan-o magkakaada hin kamurayawan tubtob nga nagbubuhat hin prostitusyon ngan hin damu nga pamarang+ an imo nanay nga hi Jezebel?”+
23 Ginwaring dayon ni Jehoram an iya karuwahe basi pumalagiw, ngan nagsiring hiya kan Ahazias: “Nauwat kita, Ahazias!”
24 Ginkaptan ni Jehu an iya bawog ngan ginpana hi Jehoram ha butnga han mga sugbong, ngan an pana linapos ha iya kasingkasing, ngan natumba hiya ha iya pan-girra nga karuwahe.
25 Katapos, nagsiring hiya kan Bidkar nga iya opisyal: “Alsaha hiya ngan iglabog ngadto ha uma ni Nabot nga taga-Jezreel.+ Hinumdumi nga han kita nga duha sakay ha mga karuwahe* ha luyo ni Ahab nga iya tatay, hi Jehova mismo nagpahayag hini kontra ha iya:+
26 ‘“Sugad nga nakita ko kakulop* an dugo ni Nabot+ ngan an dugo han iya mga anak,” nasiring hi Jehova, “mabulos ako+ ha imo dinhi mismo hini nga tuna,” nasiring hi Jehova.’ Salit alsaha hiya yana ngan iglabog hiya ngadto ha tuna, sumala ha pulong ni Jehova.”+
27 Han nakita ni Hadi Ahazias+ han Juda an nahitabo, pinalagiw hiya ngadto ha dalan nga hirani ha haluag nga garden.* (Ha urhi ginlanat hiya ni Jehu ngan nagsiring: “Pataya gihap hiya!” Salit gin-atake nira hiya ha karuwahe han tipasagka hiya ngadto ha Gur, nga hirani ha Ibleam.+ Pero nagpadayon hiya ha iya pagpalagiw ngadto ha Megido ngan didto hiya namatay.
28 Katapos, gindara hiya han iya mga surugoon ha karuwahe ngadto ha Jerusalem ngan iginlubong hiya ha iya lubnganan kaupod han iya mga kaapoy-apoyan ha Syudad ni David.+
29 Han ika-11 ka tuig ni Jehoram nga anak ni Ahab, hi Ahazias+ nagin hadi ha Juda.)
30 Han inabot hi Jehu ha Jezreel,+ nabatian ito ni Jezebel.+ Salit iya ginkoloran an iya mga mata hin itom nga kolorete ngan gin-adornohan an iya ulo ngan humang-aw ha bintana.
31 Samtang nasulod hi Jehu ha ganghaan, hi Jezebel nagsiring: “Ano an nahitabo kan Zimri nga nagpatay han iya ginoo?”+
32 Hinangad hiya ha bintana ngan nagsiring: “Hin-o an dapig ha akon? Hin-o?”+ Humang-aw dayon ha iya an duha o tulo nga opisyal ha palasyo.
33 Hiya nagsiring: “Ighulog hiya!” Salit ira ginhulog hi Jezebel, ngan an iba han iya dugo nagtapsik ha pader ngan ha mga kabayo, ngan gintamak-tamakan hiya han mga kabayo ni Jehu.
34 Katapos hito, sinulod hi Jehu ngan kinaon ngan ininom. Katapos, nagsiring hiya: “Alayon, panginanoa niyo ini nga iginsumpa nga babaye ngan iglubong hiya. Tutal anak hiya hin hadi.”+
35 Pero han kinadto hira basi iglubong hiya, waray na hira iba nga nakita kondi an iya bungo ngan an iya mga tiil ngan an mga palad han iya mga kamot.+
36 Han binalik hira ngan ginsumatan hiya, nagsiring hiya: “Ini an katumanan han pulong ni Jehova+ nga iya iginyakan pinaagi han iya surugoon nga hi Elias nga Tisbita, nga nasiring, ‘Ha tuna han Jezreel, kakaunon han mga ayam an unod ni Jezebel.+
37 Ngan an patay nga lawas ni Jezebel magigin sugad hin tai ha bawbaw han uma ha tuna han Jezreel, basi diri hira makasiring: “Amo ini hi Jezebel.”’”
