An Ikaduha nga Libro han mga Hadi 18:1-37
18 Ha ikatulo ka tuig ni Hoshea+ nga anak ni Elah nga hadi han Israel, nagin hadi hi Hezekias+ nga anak ni Hadi Ahaz+ han Juda.
2 Nagin hadi hiya han 25 anyos hiya, ngan nagmando hiya hin 29 ka tuig ha Jerusalem. An ngaran han iya nanay amo hi Abi* nga anak ni Zacarias.+
3 Padayon nga ginbuhat niya an husto ha pagkita ni Jehova,+ sugad han ginbuhat ni David nga iya kaapoy-apoyan.+
4 Hiya an nananggal han higtaas nga mga lugar,+ nagdugmok han sagrado nga mga harigi, ngan nag-utod han sagrado nga poste.*+ Iya liwat ginrumok an halas nga tumbaga* nga ginhimo ni Moises;+ kay tubtob hito nga panahon an katawohan han Israel nagpapaaso pa hin halad ha atubangan hito ngan hadto gintawag ito nga idolo nga halas nga tumbaga.*
5 Sinarig hiya kan Jehova+ nga Dios han Israel; waray bisan usa nga pariho ha iya ha ngatanan nga hadi han Juda nga sunod ha iya ngan waray liwat pariho ha iya ha mga nahiuna ha iya.
6 Kinapot hiya hin marig-on kan Jehova.+ Waray hiya bumaya ha pagsunod ha iya; padayon nga iya gintuman an mga sugo nga iginhatag ni Jehova kan Moises.
7 Ngan hi Jehova kaupod niya. Bisan diin hiya kumadto, ginios hiya nga maaramon. Nagrebelde hiya ha hadi han Asirya ngan nagdumiri ha pagserbi ha iya.+
8 Iya liwat ginpirde an mga Filisteo+ tubtob ha Gaza ngan ha mga teritoryo hito, tikang ha torre nga taran-awan tubtob ha pinader nga syudad.*
9 Ha ikaupat ka tuig ni Hadi Hezekias, nga amo an ikapito ka tuig ni Hoshea+ nga anak ni Elah nga hadi han Israel, hi Hadi Salmaneser han Asirya umatake ha Samaria ngan ginpalibotan ito.+
10 Nasakop nira ito+ ha kataposan han tulo ka tuig; ha ikaunom ka tuig ni Hezekias, nga amo an ikasiyam ka tuig ni Hadi Hoshea han Israel, nasakop an Samaria.
11 Katapos, ginkuha han hadi han Asirya an Israel ngan igindistyero+ ngadto ha Asirya ngan ginpaukoy hira ha Hala ngan ha Habor didto ha salog han Gozan ngan ha mga syudad han mga Mediano.+
12 Tungod ini kay waray hira mamati ha tingog ni Jehova nga ira Dios, lugod padayon nga ira gintalapas an kauyonan nga iya ginhimo, an ngatanan nga iginsugo ni Moises nga surugoon ni Jehova.+ Waray hira mamati ngan waray liwat hira sumugot.
13 Ha ika-14 ka tuig ni Hadi Hezekias, gin-atake ni Senakerib nga hadi han Asirya+ an ngatanan nga pinader nga syudad han Juda ngan ginpansakop ito.+
14 Salit hi Hadi Hezekias han Juda nagpadara hin mensahe ha hadi han Asirya ha Lakis: “Ako an sayop. Atras tikang ha akon, ngan ihahatag ko an bisan ano nga imo aroon ha akon.” An hadi han Asirya nangaro kan Hadi Hezekias han Juda hin multa nga 300 ka talanton* nga silber ngan 30 ka talanton nga bulawan.
15 Salit iginhatag ni Hezekias an ngatanan nga silber nga makikita ha balay ni Jehova ngan ha mga tiripigan hin bahandi ha balay* han hadi.+
16 Hito nga panahon ginpanguha* ni Hezekias an mga purtahan han templo+ ni Jehova ngan an mga hamba nga hi Hadi Hezekias han Juda mismo an naghaklap,*+ ngan iya ito iginhatag ha hadi han Asirya.
17 Katapos, an hadi han Asirya nagsugo han Tartan,* han Rabsaris,* ngan han Rabsake* upod hin damu nga sundalo tikang ha Lakis+ ngadto kan Hadi Hezekias ha Jerusalem.+ Sinagka hira ha Jerusalem ngan pinwesto hirani ha paawasan han igbaw nga tirokan han tubig, nga nahimumutang ha may kalsada tipakadto ha uma han paraglaba nga lalaki.+
18 Han ira gintawag an hadi nga gumawas, hi Eliakim+ nga anak nga lalaki ni Hilkias, nga nagdudumara han panimalay,* hi Sebnah+ nga sekretaryo, ngan hi Joa nga anak nga lalaki ni Asap nga pararekord, ginawas ngadto ha ira.
19 Salit an Rabsake nagsiring ha ira: “Alayon sidnga niyo hi Hezekias, ‘Ini an siring han harangdon nga hadi, an hadi han Asirya: “Ano an basihan han imo pagsarig?+
20 Nasiring ka, ‘May-ada ako estratihiya ngan gahum ha pakiggirra,’ pero waray pulos ini nga mga pulong. Kan kanay ka nasarig, nga tungod hito may kaisog ka nga magrebelde ha akon?+
21 Kitaa! Nasarig ka ha bulig hinin bari nga tangbo, an Ehipto,+ nga kon dun-an han usa nga tawo madulot ito ngan makakatusok ha iya palad. Sugad hito an Paraon nga hadi han Ehipto ha ngatanan nga nasarig ha iya.
22 Ngan kon magsiring ka ha akon, ‘Nasarig kami kan Jehova nga amon Dios,’+ diri ba Iya an higtaas nga mga lugar ngan an mga halaran nga ginpananggal ni Hezekias,+ samtang nasiring hiya ha Juda ngan ha Jerusalem, ‘Kinahanglan kamo yumukbo ha atubangan hini nga halaran ha Jerusalem’?”’+
23 Salit yana, alayon pakigpusta ha akon ginoo nga hadi han Asirya: Tatagan ko ikaw hin 2,000 nga kabayo kon makakaagi ka hin igo nga kadamu nga masakay hito.+
24 Aanhon mo man pagpaatras han bisan usa nga gobernador nga pinakaubos ha mga surugoon han akon ginoo, nga ha Ehipto ka man nasarig para hin mga karuwahe ngan hin mga parapangabayo?
25 Yana, waray ba ako tagi ni Jehova hin awtoridad nga atakehon ini nga lugar basi bungkagon ini? Hi Jehova mismo an nagsiring ha akon, ‘Atakeha ini nga tuna ngan bungkaga ini.’”
26 Tungod hito hi Eliakim nga anak ni Hilkias, ngan hi Sebnah+ ngan hi Joa nagsiring ha Rabsake:+ “Alayon pagyakan ha imo mga surugoon ha Aramaico* nga yinaknan,+ kay nasabot kami hito; ayaw pagyakan ha amon ha yinaknan han mga Judio ha atubangan han katawohan nga aada ha bawbaw han pader.”+
27 Kondi an Rabsake nagsiring ha ira: “Ha iyo ginoo la ba ngan ha iyo ako ginsugo han akon ginoo basi iyakan ini nga mga pulong? Diri ba ha mga tawo liwat nga nangangalingkod ha bawbaw han pader, ha mga tawo nga makaon han ira mismo tai ngan mainom han ira mismo ihi kaupod niyo?”
28 Katapos, an Rabsake tinindog ngan nagyakan ha daku nga tingog ha yinaknan han mga Judio, nga nasiring: “Pamati ha mensahe han harangdon nga hadi, an hadi han Asirya.+
29 Ini an siring han hadi, ‘Ayaw kamo pagpalimbong kan Hezekias, kay diri hiya makakatalwas ha iyo tikang ha akon kamot.+
30 Ngan ayaw kamo pagtugot nga pasarigon kamo ni Hezekias kan Jehova pinaagi ha pagsiring: “Sigurado nga tatalwason kita ni Jehova, ngan ini nga syudad diri ihahatag ha kamot han hadi han Asirya.”+
31 Ayaw kamo pamati kan Hezekias, kay ini an siring han hadi han Asirya: “Pakigmurayaw kamo ha akon ngan surender,* ngan an tagsa ha iyo makaon tikang ha iya kalugaringon nga tanom nga ubas ngan tikang ha iya kalugaringon nga kahoy nga igos ngan mainom han tubig han iya kalugaringon nga tirokan hin tubig,
32 tubtob nga kumanhi ako ngan dad-on kamo ha usa nga tuna nga pariho han iyo kalugaringon nga tuna,+ usa nga tuna han mga lugas ngan bag-o nga bino, usa nga tuna han tinapay ngan mga urubasan, usa nga tuna han mga kahoy nga olibo ngan dugos. Ngan mabubuhi kamo ngan diri mapatay. Ayaw kamo pamati kan Hezekias, kay iya kamo ginlilimbongan nga nasiring, ‘Tatalwason kita ni Jehova.’
33 Natalwas ba han bisan hin-o han mga dios han mga nasud an ira tuna tikang ha kamot han hadi han Asirya?
34 Hain an mga dios han Hamat+ ngan han Arpad? Hain an mga dios han Separvaim,+ Hena, ngan Iva? Natalwas ba nira an Samaria tikang ha akon kamot?+
35 Hin-o ha ngatanan nga dios han mga tuna an nagtalwas han ira tuna tikang ha akon kamot, nga tungod hito matatalwas ni Jehova an Jerusalem tikang ha akon kamot?”’”+
36 Pero an katawohan nagpabilin nga hilom ngan waray bumaton ha iya hin bisan usa nga pulong, kay an hadi nagsugo, “Ayaw niyo hiya batona.”+
37 Kondi hi Eliakim nga anak ni Hilkias, nga nagdudumara han panimalay,* hi Sebnah nga sekretaryo, ngan hi Joa nga anak ni Asap nga pararekord kinadto kan Hezekias nga gisi an ira mga bado ngan iginsumat ha iya an ginsiring han Rabsake.
Mga footnote
^ An ginpahalipot nga porma han Abias.
^ Ha Ingles, copper.
^ O “gintawag ito nga Nehustan.”
^ Karuyag sidngon, ha tagsa nga lugar, gutiay man an naukoy o damu.
^ O “palasyo.”
^ Karuyag sidngon, “naghaklap hin bulawan.”
^ Lit., “ginpangutod.”
^ O “han kumander.”
^ O “han lider han opisyal ha palasyo.”
^ O “han labaw nga paraserbi hin irimnon.”
^ O “palasyo.”
^ O “Siryano.”
^ Lit., “Paghimo kamo hin bendisyon upod ha akon ngan gawas ngadi ha akon.”
^ O “palasyo.”
