An Ikaduha nga Libro han mga Hadi 16:1-20
16 Ha ika-17 ka tuig ni Peka nga anak ni Remalias, nagin hadi hi Ahaz+ nga anak ni Hadi Jotam han Juda.
2 Hi Ahaz 20 anyos han nagin hadi hiya, ngan nagmando hiya hin 16 ka tuig ha Jerusalem. Waray niya buhata an husto ha pagkita ni Jehova nga iya Dios, diri sugad han ginbuhat ni David nga iya kaapoy-apoyan.+
3 Lugod, naglakat hiya ha dalan han mga hadi han Israel,+ ngan iya pa ngani ginsunog ha kalayo* an iya mismo anak,+ iya ginsunod an mangil-ad nga mga buhat han mga nasud+ nga ginpaiwas ni Jehova ha atubangan han mga Israelita.
4 Padayon liwat hiya nga naghalad ngan nagpaaso hin halad ha higtaas nga mga lugar,+ ha mga bungtod, ngan ha ilarom han tagsa nga marampag nga kahoy.+
5 Hito nga panahon, hi Hadi Rezin han Sirya ngan hi Peka nga anak nga lalaki ni Remalias nga hadi han Israel, sinagka basi makiggirra ha Jerusalem.+ Ira ginpalibotan an syudad nga gin-uukyan ni Ahaz pero waray nira ito masakop.
6 Hito nga panahon, an Elat iginbalik ni Hadi Rezin han Sirya+ ngadto ha Edom, katapos hito iya ginpaiwas an mga Judio* ha Elat. Ngan an mga Edomita sinulod ha Elat, ngan inukoy hira didto tubtob hini nga adlaw.
7 Salit hi Ahaz nagsugo hin mga mensahero ngadto kan Hadi Tiglat-pileser+ han Asirya, nga nasiring: “Ako an imo surugoon ngan imo anak. Pakadi ngan talwasa ako tikang ha hadi han Sirya ngan ha hadi han Israel, nga naatake ha akon.”
8 Katapos, ginkuha ni Ahaz an mga silber ngan an mga bulawan nga makikit-an ha balay ni Jehova ngan ha mga tiripigan hin bahandi ha balay* han hadi, ngan nagpadara hin hukip ngadto ha hadi han Asirya.+
9 Sinugot an hadi han Asirya ha iya hangyo, ngan sinagka hiya ha Damasco ngan ginsakop ito, ngan an katawohan hito iya igindistyero ha Kir,+ ngan iya ginpatay hi Rezin.+
10 Katapos, hi hadi Ahaz kinadto ha Damasco basi makigkita kan Hadi Tiglat-pileser han Asirya. Han nakita ni Hadi Ahaz an halaran ha Damasco, nagpadara hiya kan Urias nga saserdote hin plano han halaran, nga nagpapakita han disenyo hito ngan kon paonan-o ito ginhimo.+
11 Naghimo hi Urias+ nga saserdote hin halaran+ sumala ha ngatanan nga instruksyon nga iginpadara ni Hadi Ahaz tikang ha Damasco. Nahuman ito himoon ni Urias nga saserdote antes bumalik hi Hadi Ahaz tikang ha Damasco.
12 Han binalik an hadi tikang ha Damasco ngan nakita niya an halaran, hinirani hiya ha halaran ngan naghalad dida hito.+
13 Ngan dida hito nga halaran padayon nga nagpaaso hiya han iya mga halad nga sinunog ngan han iya mga halad nga tikang ha lugas; iya liwat iginhuwad an iya mga halad nga irimnon ngan iginwisik an dugo han iya mga halad nga ginsasarosaroan dida hito.
14 Katapos, iya iginbalhin an halaran+ nga tumbaga* nga nakada ha atubangan ni Jehova tikang ha hinmumutangan hito ha prente han balay, tikang ha butnga han iya kalugaringon nga halaran ngan han balay ni Jehova, ngan iya ito iginbutang ha norte nga dapit han iya kalugaringon nga halaran.
15 Ginsugo ni Hadi Ahaz hi Urias+ nga saserdote: “Paasoha ha daku nga halaran an halad nga sinunog nga iginhahalad ha aga,+ pati an lugas nga iginhahalad ha pagsirom,+ an halad nga sinunog han hadi, ngan an iya halad nga tikang ha lugas, sugad man an mga halad nga sinunog, an mga halad nga tikang ha lugas, ngan an mga halad nga irimnon han ngatanan nga katawohan. Sadang mo liwat igwisik dida hito an ngatanan nga dugo han mga halad nga sinunog ngan an ngatanan nga dugo han iba pa nga mga halad. Mahitungod han halaran nga tumbaga, magdidesisyon ako kon ano an bubuhaton hito.”
16 Ngan ginbuhat ni Urias nga saserdote an ngatanan nga iginsugo ni Hadi Ahaz.+
17 Dugang pa, ginpangutod ni Hadi Ahaz an mga salipod ha ligid han mga kariton+ ngan ginkuha an dagku nga mga planggana tikang hito,+ ngan iya iginlusad an Dagat* tikang ha todo nga mga baka+ nga tumbaga nga gintutungbawan hito ngan iginbutang ito ha salóg nga bato.+
18 Ngan an may atop nga istraktura para han Sabbath nga gintukod ha balay ngan an aragian han hadi iya iginbalhin tikang ha balay ni Jehova ngadto ha iba nga dapit; iya ito ginbuhat tungod han hadi han Asirya.
19 Mahitungod han iba pa nga bahin han kasaysayan ni Ahaz, kon ano an iya ginbuhat, diri ba iginsurat ito ha libro han kasaysayan han mga panahon han mga hadi han Juda?+
20 Katapos, hi Ahaz pinahuway kaupod han iya mga kaapoy-apoyan ngan iginlubong kaupod han iya mga kaapoy-apoyan ha Syudad ni David; ngan an iya anak nga hi Hezekias*+ an nagin hadi kasaliwan niya.
