Komaduan Arari 3:1-27
3 Si Jehoram+ ya anak nen Ahab et nagmaliw ya ari ed Israel legan a walad Samaria diad koma-18 taon na uley nen Arin Jehosafat na Juda, tan sikatoy 12 taon a nanuley.
2 Et nantultuloy a nanggaway mauges ed pakanengneng nen Jehova, balet aliwan singa kauges nen ama to odino nen ina to, ta inekal to so sagradon lusek nen Baal a ginawa nen ama to.+
3 Balet siansia nin ginawa to ray kasalanan ya inlagyat nen Jeroboam ya anak nen Nebat a gawaen na Israel.+ Agto iratan pinaliisan.
4 Diad saman, si Mesa ya ari na Moab et mankokomponi na karnero, tan mangiiter na 100,000 kordero tan 100,000 ag-akatlian a karneron kalakian bilang buis ed ari na Israel.
5 Sanen inatey si Ahab,+ say ari na Moab et nanrebelde ed ari na Israel.+
6 Kanian diad saman ya agew et pinmaway si Arin Jehoram ed Samaria tan tinipon toy interon Israel.
7 Angipawit met na mensahe ed si Arin Jehosafat na Juda, a kuan to: “Nanrebelde ed siak so ari na Moab. Labay moy milad siak a milaban ed Moab?” Diad saya et inkuan to: “Sige, mila ak.+ Siak tan sika et saksakey. Ontan met iray totook tan totoom, pati saray kabayok tan kabayom.”+
8 Insan tinepet to: “Iner a dalan so tatdangan tayo?” Et oniay ebat to: “Diman ed kalawakan na Edom.”
9 Et binmuat so ari na Israel a kaibay ari na Juda tan ari na Edom.+ Kayari ran nanliber na pitoy agew, anggapo lay danum a nainum na saray sundalo tan ayayep a manumtumbok ed sikara.
10 Et inkuan na ari na Israel: “Agayla ’ya! Impaniiba nen Jehova so taloran ari pian labat iyawat ed lima na Moab!”
11 Diad saman et inkuan nen Jehosafat: “Anggapo ta diay propeta nen Jehova a diad panamegley to et ontupleg tayod si Jehova?”+ Et inmebat so sakey ed saray lingkor na ari na Israel: “Wala, si Eliseo+ ya anak nen Safat, samay mangikakalbo nensaman na danum ed saray lima nen Elias.”*+
12 Et inkuan nen Jehosafat: “Si Jehova et mansasalita diad panamegley to.” Kanian linmad sikato so ari na Israel tan si Jehosafat tan say ari na Edom.
13 Inkuan nen Eliseo ed ari na Israel: “Antoy pibabalik ed sika?*+ La kad saray propeta nen amam tan ed saray propeta nen inam.”+ Balet inkuan na ari na Israel ed sikato: “Andi, ta si Jehova so anawag ed sarayan taloran ari pian iyawat to rad lima na Moab.”
14 Diad saya et inmebat si Eliseo: “Unong a mabilay si Jehova na saray armada a panlilingkoran ko,* no agko labat nononoten si Arin Jehosafat+ na Juda, agta ka nengnengen odino imanoen.+
15 Mangawit kayo dia sirin na managtogtog na arpa.”*+ Et sanen mantotogtog la may managtogtog na arpa, say pakayari* nen Jehova et niwalad si Eliseo.+
16 Inkuan to, “Oniay imbaga nen Jehova: ‘Mangotkot kayo na dakel a banawang diad sayan lawak,*
17 ta oniay imbaga nen Jehova: “Anggapoy nalikas yon dagem, tan anggapoy nanengneng yon uran; balet sayan lawak* et napano na danum,+ tan oninum kayo dia, sikayo tan saray ayayep yo.”’
18 Balet main-inomay labat iya ed si Jehova,+ ta iyawat to met ed lima yo so Moab.+
19 Igeba yon amin so apadiran a syudad+ tan amin a marakep a syudad, batang yon amin so maabig a kiew, saraan yon amin so subol na danum, tan deral yon amin so maabig a dalin diad panamegley na saray bato.”+
20 Kasabi kabuasan, diad oras na panangiyapay na kakanen ed kabuasan+ et biglan inmagus so danum manlapud direksion na Edom, tan say dalin et apano na danum.
21 Nadngelan na saray Moabita a tinmatdang iray arari pian milaban ed sikara, kanian tinipon day amin a lalakin sarag da lay mangawit na armas,* tan pinmuesto ira ed ketegan.
22 Kabangon da ed kabkabuasan, say agew et onsisinag ed danum, kanian say pakanengneng ed satan na saray Moabitan walad basil et ambalbalanga a singa dala.
23 Et inkuan da: “Dala ’tan! Seguradon nampapateyan ed espada iray arari. Kanian manamsam ka,+ O Moab!”
24 Kaloob na saray Moabita ed kampo na Israel, inmalagey iray Israelita tan kinakabil da ray Moabita tan batik iraya.+ Inusilan da ray Moabita anggad Moab, a kakabilen da ra legan iran mamapaarap ditan.
25 Inggegeba da ray syudad, tan balang sakey et angitupak na bato ed amin a maabig a dalin, kanian atabonan iratan na bato; sinaraan day amin a subol na danum,+ tan binatang day amin a maabig a kiew.+ Diad kaunoran, saray padir na Kir-hareset+ labat lay akera, tan pinaliberan itan na saray managpalsot tan inggeba ra.
26 Sanen anengneng na ari na Moab ya atalo la rad guerra, tinipon toy 700 a sundalo ton de-awit na espada pian makapaway ira a paonlad ari na Edom;+ balet agda itan agawaan.
27 Kanian inala toy panguloan ya anak to, samay onsalat ed sikaton manuley, tan inyapay to bilang bagat a popoolan+ diad padir. Et pinasyay insanok ed Israel, kanian amuliktar iraya tan pinmawil irad dalin da.
