Komaduan Arari 2:1-25
2 Sanen magano lan alaen nen Jehova si Elias+ paonlad tawen diad panamegley na maksil a dagem,+ si Elias tan Eliseo+ et inmalis ed Gilgal.+
2 Et inkuan nen Elias ed si Eliseo: “Dia ka labat, ta ingganggan nen Jehova ya onla ak ed Bethel.” Balet inkuan nen Eliseo: “Unong a mabilay si Jehova tan unong a mabilay ka,* agak onsian ed sika.” Kanian linmasur irad Bethel.+
3 Diad saman, linmad si Eliseo iray ananak na propeta* a walad Bethel tan inkuan dad sikato: “Amtam ya alaen la natan nen Jehova so katawan mo tan agla magmaliw ya ulom?”+ Et oniay ebat to: “On, amtak la. Agkayo maingal.”
4 Et inkuan nen Elias ed sikato: “Dia ka labat Eliseo, ta ingganggan nen Jehova ya onla ak ed Jerico.”+ Balet inkuan to: “Unong a mabilay si Jehova tan unong a mabilay ka,* agak onsian ed sika.” Kanian linma rad Jerico.
5 Diad saman, linmad si Eliseo iray ananak na propeta a walad Jerico tan inkuan dad sikato: “Amtam ya alaen la natan nen Jehova so katawan mo tan agla magmaliw ya ulom?” Et oniay ebat to: “On, amtak la. Agkayo maingal.”
6 Et inkuan nen Elias ed sikato: “Dia ka labat, ta ingganggan nen Jehova ya onla ak ed Jordan.” Balet inkuan to: “Unong a mabilay si Jehova tan unong a mabilay ka,* agak onsian ed sika.” Kanian linma ran dua.
7 Linma met so 50 ed saray ananak na propeta tan akaalagey iran manbabantay diad arawi legan ya akaalagey iran dua diad gilig na Jordan.
8 Et inekal nen Elias so kawes ton parad propeta+ tan nilukot to tan impaspas tod danum, tan abelsay iya, kanian binmeltang iran dua ed amagan dalin.+
9 Sanen akabeltang la ra, inkuan nen Elias ed si Eliseo: “Ibagam no antoy labay mon gawaen ko parad sika antis ak ya alaen ed sika.” Et inmebat si Eliseo: “Komon ta naawat koy mamiduan kabiangan*+ na espiritum.”+
10 Et inkuan nen Elias: “Mairap so kekerewen mo. No nanengneng mo ak sano aalaen ak ed sika, niiter itan ed sika; balet no andi, ag-itan niiter ed sika.”
11 Sanen manaakar ira, legan iran mantotongtong, bigla ran pinansian na mandarlang a karwahe tan mandarlang iran kabayo,+ tan si Elias et sinmegep ed tawen diad panamegley na maksil a dagem.+
12 Legan ya akanengneng si Eliseo et iyeeyag to: “Ama, ama! Say karwahe na Israel tan saray de-kabayoan a sundalo to!”+ Sanen agto la nanengneng si Elias, binembenan toy kawes to tan pinilat to a pinankadua.+
13 Kayari na satan, dinokdok to may naplag nen Elias a kawes ton parad propeta+ tan pinmawil tan inmalagey ed gilig na Jordan.
14 Insan impaspas tod danum imay kawes nen Elias tan inkuan to: “Kawalaan nen Jehova a Dios nen Elias?” Sanen pinaspas toy danum, abelsay iya, kanian akabeltang si Eliseo.+
15 Sanen sikatoy abantag na saray propetan walad Jerico, inkuan da: “Say espiritu nen Elias et wala lad si Eliseo.”+ Kanian sikatoy inabet da tan dinmakmomo rad arapan to.
16 Et imbaga rad sikato: “Wadia so 50 makayarin lalaki a kaiba na saray lingkor mo. Abuloyan mo komon ya anapen day katawan mo. Ompan sikatoy inawit ed tagey na espiritu* nen Jehova tan impelag to diad sakey ed saray palandey odino diad sakey ed saray lawak.”+ Balet inkuan to: “Andi, agyo ra ibabaki.”
17 Balet pinasoot da ya anggad abaingan la, kanian inkuan to: “Sige, ibaki yo ra.” Et imbaki ra so 50 lalaki tan taloy agew iran nananap balet agda aromog.
18 Kapawil da, sikatoy wadman ed Jerico.+ Tan inkuan tod sikara: “Agta imbagak lad sikayon agkayo oonla?”
19 Ag-abayag, saray lalaki ed syudad et inkuan dad Eliseo: “Nanenengneng na katawan ko a balibali lokasyon na syudad;+ balet aliwan marakep so danum dia, tan say dalin et agmamapawalay bunga.”*
20 Diad saman et inkuan to: “Iyalaan yo ak na balon melag a yaong tan kargaan yoy asin.” Kanian inyalaan da.
21 Insan sikatoy linma ed panlalapuan na danum tan insibwag to ditan so asin+ tan imbaga to: “Oniay inkuan nen Jehova, ‘Ginawak lan malinis iyan danum. Agla iya pansengegay ipapatey odino agpanbunga.’”*
22 Tan say danum et nagmaliw a malinis anggad sayan agew, unong ya imbaga nen Eliseo.
23 Et sikatoy inmalis diman pian ontatdang ed Bethel. Sanen manaakar diad dalan, wala ray ugugaw a lalakin pinmaway ed syudad tan sikatoy ininsulto ra,+ tan aminpiga ran imbaga: “Tatdang ka, kalbo! Tatdang ka, kalbo!”
24 Diad saman et sikatoy linmingaw tan ninengneng to ra tan insamba to ra diad ngaran nen Jehova. Insan walay duaran oso a kabatyan+ a pinmaway ed katakelan tan biningbingkas day 42 ed saray ugugaw.+
25 Manlapud man et sikatoy amaarap ed Palandey Carmel,+ insan la pinmawil ed Samaria.
Paimanod leksab
^ Odino “so kamarerwam.”
^ Saray “ananak na propeta” et nayarin ontutukoy ed eskuelaan a mangibabangat ed saray propeta odino ed ulopan na saray propeta.
^ Odino “so kamarerwam.”
^ Odino “so kamarerwam.”
^ Odino “duaran parte.”
^ Odino “dagem.”
^ Odino posiblin, “pakakaekalan na saray malukon.”
^ Odino posiblin, “pakaekalan na saray malukon.”
