Komaduan Arari 20:1-21

  • Say impansakit tan inyabig nen Hezekias (1-11)

  • Saray mensahero a nanlapud Babilonia (12-19)

  • Say impatey nen Hezekias (20, 21)

20  Diad saraman ya agew, si Hezekias et nansakit tan ngalngali la ompatey.+ Et linmad sikato si propetan Isaias ya anak nen Amoz tan inkuan to, “Oniay inkuan nen Jehova: ‘Bilin moy sankaabungan mo, ta ompatey ka la; agka la onabig.’”+  Diad saman et sikatoy inmarap ed padir tan nampikasi ed si Jehova:  “Kasian mo ak, O Jehova, nonot mo komon a nanmatoor ak ed sika diad interon puso, tan ginawak so maabig ed pakanengneng mo.”+ Tan nanakis a maong si Hezekias.  Et agni akasabid pegley a sular si Isaias sanen naawat toy mensahe nen Jehova, a kuan to:+  “Pawil ka, tan ibagam ed si Hezekias a lider na totook, ‘Oniay inkuan nen Jehova a Dios nen David ya inmunan ateng mo: “Nadngel koy pikakasim. Anengneng ko ray luam.+ Et paabigen ta ka.+ Diad mikatlon agew et onsegep kad abung nen Jehova.+  Aruman ko na 15 taon so bilay* mo, tan iliktar ta ka tan sayan syudad ed lima na ari na Asirya,+ tan iyagel ko iyan syudad nisengeg ed ngaran ko tan nisengeg ed si David a lingkor ko.”’”+  Insan inkuan nen Isaias: “Mangala kayoy bibingka a gawad pinamaga tan pinitpit ya igos.” Kanian angala ra tan impakep da itan ed pelsa to, tan sikatoy kalkalnan inmabig.+  Tinepet nen Hezekias ed si Isaias: “Antoy tanda+ a paabigen ak nen Jehova tan diad mikatlon agew et onsegep ak ed abung nen Jehova?”  Inmebat si Isaias: “Saya so tanda ya iter nen Jehova pian nanengneng mo a tooren nen Jehova so imbaga to: Antoy labay mon nagawa ed anino diman ed takayan,* onabante na samploran balitang odino onsener na samploran balitang?”+ 10  Et inkuan nen Hezekias: “Mainomay labat ya onabante na samploran balitang so anino, balet ag-itan onsener na samploran balitang.” 11  Kanian tinmawag si propetan Isaias ed si Jehova, tan say anino ed takayan nen Ahaz et pinasener To na samploran balitang sanen akaleksab la itan.+ 12  Diad saman, say ari na Babilonia a si Berodac-baladan ya anak nen Baladan et angipawit na saray sulat tan regalo ed si Hezekias, ta nadngelan ton sikatoy mansasakit.+ 13  Pinatuloy* ira nen Hezekias tan impanengneng tod sikara so interon abung a pangiinan toy kayamanan+—saray pilak, balitok, larak a balsamo tan arum nin mablin larak, saray armas to, tan amin a walad saray pasen a pangiinan toy kayamanan. Anggapoy bengatlan ag-impanengneng nen Hezekias ed sikara diad abung* to tan diad amin a walad pakauley to. 14  Kayari na satan, linmay propetan Isaias ed si Arin Hezekias tan tinepetan to: “Antoy imbaga na sarayan lalaki, tan iner so nanlapuan da?” Kanian inmebat si Hezekias: “Nanlapu rad arawin dalin, diad Babilonia.”+ 15  Tinepet to ni: “Antoy anengneng dad abung mo?”* Inmebat si Hezekias: “Anengneng dan amin so walad abung ko.* Anggapoy bengatlan agko impanengneng ed sikara diad saray pasen a pangiinan koy kayamanan.” 16  Natan, oniay inkuan nen Isaias ed si Hezekias: “Dengel mo so salita nen Jehova,+ 17  ‘Onsabi agew a say amin a walad abung mo* tan amin a tinipon na inmuunan atateng mo anggad sayan agew et awiten ed Babilonia.+ Anggapon balot so nakera,’ so inkuan nen Jehova. 18  ‘Tan arum ed saray magmaliw ya ananak mo et alaen+ tan magmaliw iran opisyal ed palasyo na ari na Babilonia.’”+ 19  Et inkuan nen Hezekias ed si Isaias: “Say salita nen Jehova ya impasabim et maabig.”+ Insan intuloy to: “Maabig no walay kareenan tan kaligenan* legay bilay* ko.”+ 20  Tan saray arum nin agawa ed si Hezekias, say impangipatnag toy inkabiskeg to tan say impanggawa tod tiponay danum+ tan say aagusay danum tan no panon ton impaarap itan ed syudad,+ et akasulat ed libro na saray agawa diad panaon na arari na Juda. 21  Tan si Hezekias et nampainawa la a kaiba na saray inmuunan atateng to;+ tan si Manases+ ya anak to so nagmaliw ya ari a kasalat to.+

Paimanod leksab

Literal, “iray agew.”
Nayarin sarayan takayan et uusaren pian bilangen so oras, a singa say sundial.
Odino “Dinengel.”
Odino “palasyo.”
Odino “palasyom.”
Odino “palasyok.”
Odino “palasyom.”
Odino “katuaan.”
Literal, “legan na saray agew.”