Injili mar Luka 20:1-47
20 Chieng’ moro ka nopuonjo e hekalu kendo olando wach maber, jotend-jodolo gi jondiko kod jodongo nobiro ire
2 mi ne gipenje niya: “Wachnwae, itimo gigi gi ratiro mane? To en ng’a momiyi ratirono?”+
3 En nodwokogi kama: “An bende abiro penjou penjo moro, kendo udwoka:
4 Batiso mar Johana noa e polo koso kuom dhano?”
5 Eka ne giwacho e kindgi niya: “Ka wadwoke ni, ‘Ne en moa e polo,’ obiro penjowa ni, ‘Kare ang’o momiyo ne ok uyie kuome?’
6 To ka wadwoke ni, ‘Ne en moa kuom dhano,’ oganda duto biro chielowa gi kite nimar giyie ni Johana en janabi.”+
7 Omiyo, ne gidwoke ni ne ok ging’eyo ka ma ne batisono oaye.
8 Yesu nowachonegi niya: “An bende ok abi wachonu ni atimo gigi gi ratiro mane.”
9 Eka nogoyo ne ji ngero niya: “Ng’at moro nopidho mzabibu+ moketo puodhono e lwet jopur ma chule, kae to nodhi wuoth e piny mabor kuom ndalo mogwaro.+
10 Ka kinde ma olemo nyakie nochopo, nooro misumba moro ir jopurgo mondo gimiye moko kuom olemo mag puoth mzabibuno. Kata kamano, jopurgo nogoye ma giriembe gi lwete nono.+
11 To nooro misumba machielo. Mano bende ne gigoyo mi gitimone timbe achaya, kendo ne giriembe gi lwete nono.
12 Kendo nooro mar adek; mano bende ne gihinyo mi giwito oko.
13 Omiyo, wuon puoth mzabibuno nowacho ni, ‘En ang’o monego atim? Abiro oro wuoda ma ahero.+ Di po ka gimiye luor.’
14 Ka jopurgo noneno wuodeno, ne giwacho kama, ‘Mani e jal ma puodhoni biro dong’ne. Wanegeuru mondo puodhoni odong’nwa.’
15 Mi ne giwite oko mar puoth mzabibu kendo ne ginege.+ Omiyo, en ang’o ma wuon puoth mzabibuno biro timonegi?
16 Enobi mi noneg jopurgo kae to omiyo jomamoko puoth mzabibuno.”
Bang’ winjo ngerono, ji nowacho kama: “Mano kik timre ngang’!”
17 To nong’iyogi tir mowacho niya: “Kare ere tiend wach mondik ni, ‘Kidi ma jogedo ne odagi osebedo kidi moriwo kor ot’?+
18 Ng’ato ma olwar e kidino biro tur matindo tindo.+ To ng’at ma kidino olwar kuome, kidino biro rege ka buru.”
19 Eka jondiko gi jotend-jodolo nomanyo kaka ne ginyalo make e sa nogono nimar ne ging’eyo ni nogoyo ngerono kuomgi, to ne giluoro ji.+
20 Kendo bang’ nono ahinya gik ma notimo, ne gioro jomoko ma ne gisechulo ling’ ling’ mondo gidhi giwuondre ka jo makare, eka gimake gi wechene+ kae to gikete e lwet jotelo kendo e lwet gavana.
21 Eka jogo nopenje kama: “Japuonj, wang’eyo ni iwuoyo kendo ipuonjo kare, bende ok iluoro wang’ ng’ato, to ipuonjo yor Nyasaye gadier:
22 Be chulo osuru ne Kaisar owinjore gi chik, koso?”
23 Kata kamano, nofwenyo wuondruokgi mowachonegi kama:
24 “Nyisauru ane dinari.* Kido gi ndiko man kuomegi gin mag ng’a?” Ne gidwoke niya: “Gin mag Kaisar.”
25 Nowachonegi kama: “Kare chuluru Kaisar+ gige Kaisar, to gige Nyasaye ne Nyasaye.”+
26 Omiyo, ne ok ginyal make gi gima owacho e nyim ji, to ne gihum nono gi dwokone mi giling’ thi.
27 To Jo-Sadukai ma gin jo ma wacho ni chier onge+ nobiro ire mi gipenje kama:+
28 “Japuonj, Musa nondikonwa niya: ‘Ka ng’ato otho kendo oweyo chiege, to ne ok onyuolo nyathi, owadgi onego okaw chiegeno mondo onyuolnego nyithindo.’+
29 Koro ne nitie owete moko abiriyo. Mokwongo nokendo, to ne otho ma onge nyathi.
30 Mar ariyo
31 gi mar adek bende nokendo dhakono. Ne obet kamano nyaka e mar abiriyo; ne githo ma ok giweyo nyithindo chien.
32 Gikone, dhakono bende ne otho.
33 Nikech mano, e chier, dhakono nobed chi ng’a kuomgi? Nimar owete abiriyogo duto nokende.”
34 Yesu nodwokogi niya: “Nyithind ndaloni* kendo, bende ikendogi,
35 to jo ma osekwan ni owinjore donjo e ndalo ma biro kendo owinjore gi chier, ok kendi, to bende ok kendgi.+
36 Kuom adier, bende ok ginyal tho kendo, nimar gichal malaike, kendo gin nyithind Nyasaye kuom bedo nyithind chier.
37 To kuom wach chiero jo motho, kata mana Musa nowacho mano e sigand yiend kudho, ka noluongo Jehova* ni, ‘Nyasach Ibrahim, Nyasach Isaka, kendo Nyasach Jakobo.’+
38 En Nyasach jo mangima to ok Nyasach jo motho, nimar e wang’e jogo duto ngima.”+
39 Jondiko moko nodwoke niya: “Japuonj, iwacho kare.”
40 Koro ne gionge gi chir mar penje kata wach achiel.
41 Eka nopenjogi niya: “Obet nade ni ji wacho ni Kristo en wuod Daudi?+
42 Nimar Daudi owuon wacho e bug Zaburi ni, ‘Jehova* nowacho ne Ruodha niya: “Bed e bada korachwich
43 nyaka chop aket wasiki obed raten tiendi.”’+
44 Kuom mano, Daudi luonge ni Ruoth; omiyo ere kaka onyalo bedo wuode?”
45 Eka nowuoyo gi jopuonjrene ka ji duto winjo kowacho kama:
46 “Tang’uru gi jondiko mohero wuotho koni gi koni ka girwako kandho kendo mohero ni ji omosgi ka dhialogi e chirni kendo mohero kombe ma nyime* e sunagoke kod kuonde moyiedh mogik e nyasi,+
47 kendo giyako ute* mond liete, kendo gilamo lamo maboyo mana ni mondo ji onegi. Jogi noyud kum magerie* moloyo.”
Weche Moler Piny
^ Som Apendiks B14.
^ Kata, “chenro mar ndaloni.” Som Tiend Weche.
^ Som Apendiks A5.
^ Som Apendiks A5.
^ Kata, “mabeyo moloyo.”
^ Kata, “mwandu.”
^ Kata, “malitie; mapekie.”
