Injili mar Luka 17:1-37
17 Eka nowacho ne jopuonjrene niya: “En adier ni gik ma miyo ji donjo e richo nyaka bi, to yaye nobed malit ne ng’at ma miyo jomoko donjo e richo!
2 Dibed maber moloyo ka otue kidi mar pong’ e ng’ute kendo wite e nam, kar mondo ochwany achiel kuom jo ma tindogi.+
3 Ritreuru uwegi. Ka owadu otimo richo, kwere matek,+ to ka oloko chunye, wene.+
4 Kata ka otimoni richo nyadibiriyo e odiechieng’ achiel mi oduogo iri nyadibiriyo kowacho ni, ‘Ayie kethona,’ nyaka to iwene.”+
5 Koro joote nokwayo Ruoth kama: “Medwae yie.”+
6 Eka Ruoth nodwokogi niya: “Ka dine bed ni un gi yie ma rom gi koth karadali, dine uwacho ne yadh onungani kama: ‘Pudhri ia kae idhi ipidhri e nam!’ to dine owinjou.+
7 “En ng’a kuomu ma ka nigi misumba ma purone kata ma ritone kueth, to onyalo wacho ne misumbano koduogo oa e puodho ni, ‘Bi kae mapiyo kendo ibed e mesa mondo ichiem’?
8 Kar mano, donge obiro wachone ni, ‘Ikna chiemba modhiambo kendo rwak law tich mondo itina nyaka chop atiek chiemo gi metho, eka bang’ mano inyalo chiemo kendo metho’?
9 Ok obi pwoyo misumbano nikech otiyo tije ma omiye, donge?
10 Kamano bende, ka usetimo tije duto momiu, wachuru niya: ‘Wan mana wasumbni ma kayiem nono. Gik ma wasetimo e gik ma nonego watim.’”+
11 Sa ma noyudo odhi Jerusalem, nokalo e kind Samaria gi Galili.
12 To sa ma nodonjo e gweng’ moro, jodhoho apar noromo kode, to ne gichung’ mabor matin.+
13 Eka ne gikok niya: “Yesu, Japuonj, kechwa!”
14 Ka nonenogi, nokonegi niya: “Dhiuru mondo unyisru e nyim jodolo.”+ Eka sa ma ne gin e yo ka gidhi, ne gichango.*+
15 Ka achiel kuomgi noneno ni nosechange, noduogo kopako Nyasaye gi dwol maduong’.
16 Mi nopodho auma e tiend Yesu kogoyone erokamano. Jalo ne en Ja-Samaria.+
17 Nikech mano, Yesu nopenjo niya: “Donge ji apar duto nodoko maler, koso? To kare jomamoko ochikoka ni kanye?
18 Onge kata ng’ato achiel kuomgi moseduogo mondo omi Nyasaye duong’, mak mana jal moa e oganda machieloni?”
19 Eka nowacho ne jalo niya: “A malo mondo idhi; yieni osechangi.”+
20 Ka Jo-Farisai nopenje kinde ma Pinyruodh Nyasaye ne dhi biroe,+ nodwokogi kama: “Pinyruodh Nyasaye ok bi e yo ma nenore malich;
21 kata ji ok bi wacho ni, ‘Neuru en ka!’ kata ni, ‘En kacha!’ Nikech Pinyruodh Nyasaye ni e dieru.”+
22 Eka nowacho ne jopuonjrene kama: “Kinde biro ma unugomb nenoe ndalo* mag Wuod dhano, to ok ununene.
23 Kendo ji nowachnu ni, ‘Neuru, en kacha!’ kata ni, ‘En ka!’ kik uwuog oko kata lawo bang’gi.+
24 Nikech mana kaka mil polo rieny koa konchiel e polo nyaka komachielo, kamano e kaka odiechieng Wuod dhano+ nobedi.+
25 Kata kamano, Wuod dhano nyaka kadh e sand mang’eny mokwongo, kendo tieng’ni nokwede.+
26 E wi mano, mana kaka notimore e ndalo Noa,+ e kaka nobed e ndalo mag Wuod dhano:+
27 ji ne chiemo, ne gimetho, chwo ne kendo, mon ne ikendo, nyaka e chieng’ono ma Noa nodonjo e yie,+ mi Ataro nobiro mokethogi giduto.+
28 Kamano bende e kaka ne otimore e ndalo Lut:+ ji ne chiemo, ne gimetho, ne ging’iepo, ne giuso, ne gichuoyo, kendo ne gigedo.
29 To chieng’ ma Lut nowuok Sodom, mach gi salfa* ne ochue koa e polo mokethogi giduto.+
30 Kamano e kaka nobed e chieng’ono ma Wuod dhano nofwenyree.+
31 “Chieng’no, ng’at manie tat ot to gige ni e ot, kik olor piny mondo okawgi. Kamano bende, ng’at man oko e puodho kik dog ne gik moweyo chien ngang’.
32 Paruru chi Lut.+
33 Ng’at ma dwaro reso ngimane nolale, to ng’at molalo ngimane, biro reso ngimane.+
34 Awachonu ni, e otienono ji ariyo nobed e otanda achiel; achiel nokaw to machielo nowe.+
35 Mon ariyo nobed ka rego e pong’ achiel; moro nokaw to machielo nowe.”
36 *—
37 Kuom mano, ne gipenje kama: “Ruoth, mano notimre kanye?” Nodwokogi niya: “Ka ma gimoro othoe, kanyo e ma achudhe chokoree.”+
Weche Moler Piny
^ Kata, “ne gibedo maler.”
^ Kata, “chieng’ achiel.”
^ Ma en kit poda moro ma mako mach mapiyo ahinya, kendo sa ma oliel ogolo tik mager kendo marach.
^ Som Apendiks A3.
