Kal idhi e weche manie iye

Kal idhi kama ochanie weche mantie

 A5

Nying Nyasaye e Ndiko mag Dho-Grik mag Jokristo

Joma olony e weche mag Muma oseyie ni nying Nyasaye e nyukta ang’wen miluongo ni Tetragramaton (יהוה), yudore chiegni nyadi 7,000 e Ndiko mag Dho-Hibrania. Kata kamano, ji mang’eny ok oyie ni nyingno bende ne yudore e Ndiko mag Dho-Grik mag Jokristo (Muma Manyien). Nikech mano, ng’eny Mumbni mag Kisungu ma tinde iloko ok ti gi nying Nyasaye e Ndiko mag Dho-Grik mag Jokristo. Bende, kata mana sama giyudo nyukta mag Tetragramaton e Ndiko mag Dho-Grikgo sama giloko, ng’eny jolokogo wilo Jehova gi “Ruoth.”

Joma oloko Muma Maler—Loko mar Piny Manyien to ok otimo kamano. Nying Jehova yudore e iye nyadi 237 e Ndiko mag Dho-Grik mag Jokristo. Nitie gik moko ariyo madongo momiyo joma ne oloko Mumano notiyo gi nying Jehova e yo ma kamano: (1) Kitepe mag dho Grik ma yudore e kindegi ok e ma ne okwong ndik tik-tik. Thoth kitepego ne ondik chiegni higni 200 bang’ ka nosendik buge mokwongo tik-tik mag Ndiko mag Dho-Grik mag Jokristo. (2) E kindego, nenore ni joma ne kopo kitepe mag dho Grik ne golo nyingno kae to giwile gi Kyʹri·os, ma en dho Grik ma tiende en “Ruoth,” kata, nyalo bedo ni ne gikopo kitepe mag dho Grik ma noyudo osegolie nyingno.

Komiti mar Muma mar Loko mar Piny Manyien nofwenyo ni nitie gik manyiso maler ni nyukta mag Tetragramaton ne yudore e kitepe mokwongo tik-tik mag dho Grik. Paro ma ne ging’ado otenore gi weche maluwogi:

  • Ndiko mag Dho-Hibrania ma ne itiyogo ndalo mag Yesu kod jootene, ne nigi nyukta mag Tetragramaton kuonde duto ma ne giyudoree. E higni moko mokalo, nitie joma ne kwedo wachno. Kata kamano, gie sani nitie kopi moko mag Ndiko mag Dho-Hibrania ma nondik e kind higa mar 1 nyaka 100 Bang’ Kristo (B.K.), ma noyud machiegni gi Qumran. Omiyo, onge kiawa ni nyukta mag Tetragramaton ne yudore e kitepego.

  • E ndalo Yesu kod jootene, ne oti gi nyukta mag Tetragramaton sama ne iloko Ndiko e dho Grik kowuok e dho Hibrania. Kuom higni mang’eny, joma olony e weche mag somo ne paro ni nyukta mag Tetragramaton ne onge e loko mag dho Grik ma noloki kowuok e dho Hibrania (Greek Septuagint). Kae to bang’e,  e higa mar 1950, joma olony e weche mag somo noyudo bethe kitepe moko mag Greek Septuagint ma notigo chon e ndalo Yesu. Bethe kitepego nigi nying Nyasaye, kendo ondikgi e nyukta mag dho Hibrania. Omiyo, wechego nyiso maler ni e ndalo Yesu, Ndiko mag Dho-Grik ne nigi nying Nyasaye e igi. Kata kamano, ka nochopo e kind higa mar 300 nyaka 400 B.K., buge ma ne ihinyo tigo mag Greek Septuagint kaka Codex Vaticanus kod Codex Sinaiticus, ne onge gi nying Nyasaye kuonde duto ma nyingno ne yudoree e loko mokwongo tik-tik a e bug Chakruok nyaka Malaki. Mano e momiyo ok en gima kawowa gi wuoro ni kitepe ma nokan chakre kindego onge gi nying Nyasaye e Muma Manyien kata Ndiko mag Dho-Grik.

    Yesu nowacho ayanga niya: “Asebiro e nying Wuora.” Nojiwo bende ni tije ma notimo, notimo ‘e nying Wuon-gi’

  • Ndiko mag Dho-Grik mag Jokristo wacho maler ni Yesu notiyo gi nying Nyasaye nyading’eny kendo nonyiso jomamoko nyigno. (Johana 17:6, 11, 12, 26) Yesu nowacho ayanga niya: “Asebiro e nying Wuora.” Nojiwo bende ni tije ma notimo, notimo ‘e nying Wuon-gi.’—Johana 5:43; 10:25.

  • Nikech Ndiko mag Dho-Grik mag Jokristo bende ne ondik kuom much Nyasaye mana kaka Ndiko mag Dho-Hibrania, golo nyingno e Ndiko mag Dho-Grik nyiso kaka joma loko ok makre gi weche manie Ndiko mag Dho-Hibarania. E higa mar 50 B.K., jaote Jakobo nowacho ne jodongo ma ne ni Jerusalem kama: “Simeon oselero adimba kaka Nyasaye koro noparo jo ma oa e ogendni mamoko mondo okaw kuomgi jo ma iluongo gi nyinge.” (Tich Joote 15:14) Jakobo ne ok nyal tiyo gi wechego ka dipo ni ne onge ng’ama nong’eyo nying Nyasaye kata ma ne luongo nyingno e hignigo.

  • Ondik nying Nyasaye e yo machiek e Ndiko mag Dho-Grik mag Jokristo. E Fweny 19:1, 3, 4, 6, nying Nyasaye yudore e wach motigo ni “Haleluyah.” E dho Hibrania, wachni tiende en “Pakuru Jah.” “Yah” kata “Jah” en nying Jehova e yo machuok. Nyinge mang’eny ma ne otigo e Ndiko mag Dho-Grik mag Jokristo nowuok kuom nyingno. Kuom ranyisi, nitie buge moko ma lero ni tiend nying Yesu en “Jehova e Jareswa.”

  • Buge mag Jo-Yahudi nyiso ni Jokristo ma Jo-Yahudi ne tiyo gi nying Nyasaye e bugegi. Buk moro miluongo ni Tosefta, moting’o chike ma notiek ndik e higa mar 200 nyaka 300 B.K., wuoyo kuom buge Jokristo ma niwang’o chieng’  Sabato. Bugno wacho kama: “Ne giwang’o buge mag Joland-Injili kod mag minim [ma niparo ni gin mag Jokristo ma Jo-Yahudi]. Kata kamano, ne iwang’o nyaka kuonde ma ne bugego nitie, kaachiel gi buge mamoko mag nonro ma nying Nyasaye ne nie igi.” Bugni bende nwoyo weche mag Rabi moro miluongo ni Yosé ma Ja-Galili, ma nodak chiegni higni mag 100 B.K. Nowacho kama: “E odiechienge mamoko mag juma, ng’ato achiel ne liro weche kuonde ma nying Nyasaye nitie e bugego [ma niparo ni gin ndiko mag Jokristo] kendo kanogi mabor, kae to jomamoko wang’o bethe bugego modong’.”

  •   Joma olony e weche mag Muma oseyie ni nenore ni nying Nyasaye ne nitie e Ndiko mag Dho-Hibrania ma notigo e Ndiko mag Dho-Grik mag Jokristo. E bwo wich ma wacho ni Tetragramaton e Muma Manyien,” buk miluongo ni The Anchor Bible Dictionary wacho kama: “Nitiere gik manyiso maler ni nying Nyasaye e nyukta mag Tetragramaton, ma en Yahweh, ne yudore kuonde moko kata kuonde duto e Muma Manyien ma nokwong ndik.” Jasomo molony e weche mag Muma miluongo ni George Howard wacho kama: “Nikech nyukta mag Tetragram ne pod yudore e kopi mag Muma mar dho Grik [iluonge bende  ni Septuagint] ma kanisa mokwongo ne tiyogo, wanyalo wacho ni joma ne ndiko buge mag Muma Maler ne ok ogolo nyukta mag Tetragram.”

  • Joloko mong’ere mag Muma osetiyo gi nying Nyasaye e Ndiko mag Dho-Grik mag Jokristo. Moko kuom jolokogo notimo mano ka pok nolok Muma mar Loko mar Piny Manyien. Maluwogi gin moko kuom bugego kod nyinge joma nolokogi: A Literal Translation of the New Testament . . . From the Text of the Vatican Manuscript, ma nondik gi Herman Heinfetter (1863); The Emphatic Diaglott, ma nondik gi Benjamin Wilson (1864); The Epistles of Paul in Modern English, ma nondik gi George Barker Stevens (1898); St. Paul’s Epistle to the Romans, ma nondik gi W. G. Rutherford (1900); kod The New Testament Letters, ma nondik gi J.W.C. Wand, Bishop ma London (1946). E wi mano, nitie loko moko e dho Spain ma notim chiegni higa mar 1900, ma jalok dhok miluongo ni Pablo Besson notiyoe gi “Jehová” e bug Luka 2:15 kod Juda 14, kendo otiyo nyadi 100 kama kode e weche moler piny. Higni mang’eny ka pok nolok bugego, noti gi nyukta mag Tetragramaton kuonde mang’eny ka ne iloko Ndiko mag Dho-Grik mag Jokristo e dho Hibrania chakre higni mag 1500 kadhi nyime. E dho Jerman kende, nitie loko mag Mumbe 11 motiyo gi nying “Jehova”  (kata kaka ne iluonge e dho Hibrania ni “Yahweh”) e Ndiko mag Dho-Grik mag Jokristo, to joloko mamoko ang’wen noketo nyingno e braket bang’ “Ruoth.” Loko mag dho Jerman mokalo 70 tiyo gi nying Nyasaye e weche moler piny kata e weche momedore.

    Nying Nyasaye e Tich Joote 2:34 e loko mar The Emphatic Diaglott, ma nondik gi Benjamin Wilson (1864)

  • Loko mag Muma e dhok mokalo 100 nigi nying Nyasaye e Ndiko mag Dho-Grik mag Jokristo. Ng’eny dhok mag Afrika, Amerka, Asia, Europe, kod chula mar Pacific tiyo gi nying Nyasaye e yo ma thuolo. (Ne list manie ite mar  2062 kod 2063.) Joma noloko Muma e dhokgo noketo nying Nyasaye e lokogigo nikech weche ma osewuoyoe malogo. Nitie moko kuom lokogo ma notiek machiegni, kaka, Muma mar Rotuman (1999), motiyo gi “Jihova” nyadi 51 e kwan matindo maromo 48, kod Muma mar Batak kata Toba (1989) mar piny Indonesia, motiyo gi “Jahowa” nyadi 110.

    Nying Nyasaye e Mariko 12:29, 30 e loko mar dho Hawai

Kuom adier, onge kiawa ni nitie gik mang’eny ma nyiso ni nying Nyasaye ma en Jehova, onego odong’ e Ndiko mag Dho-Grik mag Jokristo. To mano e gima joma noloko Muma mar Loko mar Piny Manyien osetimo. Gimiyo nyingno luor ahinya kendo ok gidwar golo gimoro amora ma ne yudore ei Ndiko mokwongo okwongo.—Fweny 22:18, 19.