2 Samuele 7:1-29
7 Mulena hasaainzi mwa ndu* yahae+ mi Jehova hasa musilelelize kwa lila zahae zeemupotolohile,
2 mulena abulelela mupolofita Natani,+ ali: “Na nipila mwa ndu yeyahilwe ka likota za sidare,+ kono Aleka ya Mulimu wa niti yona i mwa tende ya masila.”+
3 Natani aalaba mulena, ali: “Ueze kaufela sesi mwa pilu yahao, kakuli Jehova uinzi ni wena.”+
4 Ka bona busihu bo, linzwi la Jehova lataha ku Natani, lali:
5 “Zamaya uyo bulelela mutangaaka Davida kuli: ‘Jehova sabulela ki se, uli: “Kana ki wena yaswanela kuniyahela ndu monika ina?+
6 Kakuli hanisika ina mwa ndu kuzwa lizazi lenizwisa Maisilaele mwa Egepita kufitela cwale,+ kono nizwezipili kuzamaya mwa tende, mona mwa tabernakele.+
7 Mwahalaa nako kaufela yene nizamaile ni Maisilaele,* kana nikile nabuza litoho za masika a Isilaele zene niketile kuzamaisa sicaba saka sa Isilaele kuli: ‘Ki kabakalañi hamusika niyahela ndu ya likota za sidare?’”’
8 Cwale uyo bulelela mutangaaka Davida kuli: ‘Jehova wa limpi sabulela, ki se, uli: “Nikuungile kwa milaka, kone ulisa lingu,+ kuli ube mueteleli wa sicaba saka sa Isilaele.+
9 Mi nikaba ni wena kouka ya kaufela,+ nikayundisa lila zahao kaufela fapilaa hao;+ mi nika kuezeza libizo lelituna+ leliswana ni libizo la batu babatuna mwa lifasi.
10 Nikalukiseza sicaba saka sa Isilaele sibaka mobaka yaha, bakapila mwateñi kusina mutu yabafilikanya; mi batu babamaswe habana kubanyandisa hape mobakile baezeza kwamulaho,+
11 mwahalaa nako yene niketile baatuli+ kuli bazamaise sicaba saka sa Isilaele. Mi nika misileleza kwa lila zamina kaufela.+
“‘“Hape Jehova uize ku wena, Jehova ki yena yaka kuyahela ndu.*+
12 Mazazi ahao hasaafelile,+ hase ubulukilwe sina mobabulukezwi bo kuku wahao, nikatahisa mwanaa* hao yakataha mwamulaho wahao, mwanaa* hao tota, mi nikatiisa mubuso wahae.+
13 Ki yena yaka niyahela ndu yekakanyisa libizo laka,+ mi nikatiisa lubona lwa mubuso wahae kuya kuile.+
14 Nikaba ndatahe, mi yena ukaba mwanaka.+ Haafosa, nika mukalimela ka tupa ni ka lipafa sina mobaezezanga bana ba batu.*+
15 Lilato laka lelisa feli halina kuzwisiwa ku yena sina mone nilizwiselize ku Saule,+ yena yene nizwisize fapilaa hao.
16 Ndu yahao ni mubuso wahao likatiiswa kuya kuile; lubona lwahao lukatiiswa kuya kuile.”’”+
17 Natani abulelela Davida manzwi ao kaufela ni pono yeo kaufela.+
18 Cwale Mulena Davida ataha kuto ina fapilaa Jehova mi ali: “Wena Jehova Mulena Yapahami ka Kufitisisa, na ki na mañi? Mi ba ndu yaka ki bo mañi kuli unieze cwana?+
19 Mi hape wena Jehova Mulena Yapahami ka Kufitisisa, hausika feleza feela fo, usa nibulelela ni za ndu ya mutangaa hao mwa nako ya kwapili; mi yeo ki yona taelo* yeufa batu kaufela, wena Jehova Mulena Yapahami ka Kufitisisa.
20 Ki lika mañi hape zakona kukubulelela mutangaa hao Davida, kakuli uniziba hande,+ wena Jehova Mulena Yapahami ka Kufitisisa?
21 Kabakala linzwi lahao ni ka kulumelelana ni pilu yahao,* uezize lika zetuna ze kaufela mi ulipatululezi mutangaa hao.+
22 Ki lona libaka hauli yomutuna,+ wena Jehova Mulena Yapahami ka Kufitisisa. Hakuna yaswana ni wena,+ mi hakuna Mulimu yomuñwi kwandaa hao;+ zeluutwile kaufela ka mazebe aluna lipaka cwalo.
23 Mi ki sifi sicaba mwa lifasi sesiswana ni sicaba sahao sa Isilaele?+ Mulimu naaile kuyo baliulula, kuli babe sicaba sahae,+ mi aikezeza libizo+ ka kubaezeza lika zetuna, zesabisa.+ Neulelekile macaba ni milimu yaona kabakala sicaba sahao, sene uliuluzi ka kusizwisa mwa Egepita.
24 Uketile sicaba sa Isilaele kuli sibe sicaba sahao kamita;+ mi wena Jehova ubile Mulimu wabona.+
25 “Cwale wena Jehova Mulimu, utaleleze kamita sepiso yahao yeufile mutangaa hao ni ba ndu yahae, mi haike ueze sina mousepiselize.+
26 Haike libizo lahao libubekwe kuya kuile,+ kuli batu babulele, bali: ‘Jehova wa limpi ki yena Mulimu wa Maisilaele,’ mi haike ba ndu ya mutangaa hao Davida batiiswe fapilaa hao.+
27 Kakuli wena Jehova wa limpi, Mulimu wa Isilaele, upatululezi mutangaa hao kuli: ‘Nika kuyahela ndu.’*+ Ki lona libaka mutangaa hao habile ni bundume* bwa kulapela ku wena tapelo ye.
28 Mi cwale wena Jehova Mulena Yapahami ka Kufitisisa, ki wena Mulimu wa niti, mi manzwi ahao ki a niti,+ mi usepisize mutangaa hao lika zende ze.
29 Ka mukwa ocwalo, haike ufuyole ba ndu ya mutangaa hao, mi haike ba ndu yahae bazwelepili fapilaa hao kuya kuile;+ kakuli wena Jehova Mulena Yapahami ka Kufitisisa, usepisize, mi haike ka limbuyoti zahao ufuyole ba ndu ya mutangaa hao kuya kuile.”+
Litaluso ze kwatasi
^ Kamba “ndu ya bulena.”
^ Linzwi ka linzwi, “bana ba Isilaele.”
^ Kamba “lusika lwa silena.”
^ Linzwi ka linzwi, “peu.”
^ Linzwi ka linzwi, “yakazwa kwa lilama zahao za mwahali.”
^ Kamba mwendi, “Adama.”
^ Kamba “mulao.”
^ Kamba “kulikana ni tato yahao.”
^ Kamba “lusika lwa silena.”
^ Linzwi ka linzwi, “hafumani pilu yahae.”
