2 Malena 13:1-25
13 Ka silimo sabu 23 sa puso ya Joasi+ mwanaa Akazia+ mulena wa Juda, Joakazi mwanaa Jehu+ aba mulena wa Isilaele mwa Samaria, mi abusa lilimo ze 17.
2 Azwelapili kueza zemaswe mwa meeto a Jehova, mi aswalelela kueza sibi seo Jeroboami mwanaa Nebati naatahiselize Maisilaele kueza.+ Naasika tuhela sibi seo.
3 Cwale buhali bwa Jehova+ bwatukela Maisilaele,+ mi abafa mwa mazoho a Mulena Hazaele+ wa Siria ni mwa mazoho a Beni-hadadi+ mwanaa Hazaele, mwa mazazi ao kaufela.
4 Hamulaho wa nako, Joakazi akupa Jehova kuli abashemube, mi Jehova amuutwa, kakuli naaboni mone bahatelelezwi Maisilaele ki mulena wa Siria.+
5 Kabakaleo, Jehova afa Maisilaele mupilisi+ kuli abalukulule mwa mazoho a Siria, mi Maisilaele bapila hape mwa mandu abona sina sapili.*
6 (Kono nebasika tuhela sibi sa ba ndu ya Jeroboami sanaatahiselize Maisilaele kueza.+ Bazwelapili mwa sibi seo,* mi kota ya kulapela*+ yasiyala iyemi mwa Samaria.)
7 Joakazi asiyalelwa ki mpi ya bapahami ba lipizi ba 50 feela, likoloi zelishumi, ni masole babazamaya ka mahutu ba 10,000, kakuli mulena wa Siria naababulaile,+ abahatikela inge liluli ka nako yekupuliwa bubeke.+
8 Haili litaba zeñwi za Joakazi, zona lika kaufela zanaaezize ni maata ahae, kikuli halisika ñolwa mwa buka ya litaba za linako za malena ba Isilaele?
9 Mi Joakazi ashwa, abulukiwa sina bo kuku wahae, apumbekwa mwa Samaria;+ mi Joasi mwanaa hae amuyola fa bulena.
10 Ka silimo sabu 37 sa puso ya Mulena Joasi+ wa Juda, Joasi mwanaa Joakazi aba mulena wa Isilaele mwa Samaria, mi abusa lilimo ze 16.
11 Azwelapili kueza zemaswe mwa meeto a Jehova, naasika tuhela libi kaufela zeo Jeroboami mwanaa Nebati naatahiselize Maisilaele kuli balieze.+ Azwelapili* mwa libi zeo.
12 Haili litaba zeñwi za Joasi, zona lika kaufela zanaaezize ni maata ahae ni mwanaalwaniselize Mulena Amazia wa Juda,+ kikuli halisika ñolwa mwa buka ya litaba za linako za malena ba Isilaele?
13 Mi Joasi ashwa, abulukiwa sina bo kuku wahae, mi Jeroboami*+ aina mwa lubona lwahae. Mi Joasi apumbekwa kone bapumbekezwi malena ba Isilaele mwa Samaria.+
14 Cwale Elisha+ hanaakula butuku bone bufitile fakumubulaya, Joasi mulena wa Isilaele ashetumukela ku yena mi alilela fa mubili wahae, ali: “Ndate, ndate! Koloi ya Isilaele ni bapahami bahae ba lipizi!”+
15 Elisha kihaa li ku yena: “Hakuunge buta ni masho.” Mi aanga buta ni masho.
16 Cwale Elisha abulelela mulena wa Isilaele, ali: “Beya lizoho lahao kwa buta.” Abeya lizoho lahae kwa buta, mi Elisha akambeka mazoho ahae fahalimwaa mazoho a mulena.
17 Kihaa li: “Kwalula lihaulo la kwa upa.” Mulena akwalula lihaulo. Elisha ali: “Kunupa!” Mulena akunupa. Mi cwale Elisha ali: “Lisho la Jehova la tulo,* lisho la tulo fahalimwaa* Siria! Ukabulaya* Masiria kwa Afeki+ kufitela ubafeza.”
18 Aekeza ali: “Hakuunge masho,” mi mulena aanga masho. Kihona abulelela mulena wa Isilaele, ali: “Taba fafasi.” Kihaa taba halaalu fafasi ni kutuhela.
19 Muuna wa Mulimu wa niti habona cwalo ahalifa, mi ali: “Neuswanela kutaba fafasi haketalizoho kamba ha 6! Fo, neuka be ubulaile Masiria kufitela ubafeza, kono cwale fa, uka batula feela halaalu.”+
20 Hasamulaho, Elisha ashwa mi abulukiwa. Nekunani bahapi ba kwa Moabi+ bane batahanga mwa naha kwa makalelo a silimo.*
21 Nako yeñwi batu babañwi hane babuluka mufu, babona bahapi, mi kapili-pili banepela mufu mwa libita la Elisha ni kumata. Mufu hangunyuta masapo a Elisha, azuha mi ayema.+
22 Mulena Hazaele+ wa Siria ahatelela Maisilaele+ mwa mazazi kaufela a Joakazi.
23 Kono Jehova abashemuba ni kubahauhela+ mi abababalela kabakala tumelelano yanaaezize ni Abrahama,+ Isaka,+ ni Jakobo.+ Naasika lata kubayundisa, mi hasika bazwisa fapilaa hae kufitela ni kacenu le.
24 Mulena Hazaele wa Siria hashwa, Beni-hadadi mwanaa hae amuyola fa bulena.
25 Cwale Joasi mwanaa Joakazi aamuha Beni-hadadi mwanaa Hazaele mileneñi yanaahapile ka ndwa ku Joakazi ndatahe. Joasi amukoma* halaalu,+ mi akutisa mileneñi ya Isilaele.
Litaluso ze kwatasi
^ Fo kikuli, ka kozo ni buiketo.
^ Mubone Litaluso za Manzwi.
^ Linzwi ka linzwi, “Azamaya ku sona.”
^ Linzwi ka linzwi, “Azamaya.”
^ Fo kikuli, Jeroboami Wabubeli.
^ Kamba “puluso.”
^ Kamba “kupuluswa ku.”
^ Kamba “Ukatula.”
^ Linzwi ka linzwi, “silimo hasitaha,” mwendi mwa mbumbi.
^ Kamba “amutula.”
