Genesis 9:1-29
9 Pathian nih Noah le a fapale kha thluachuah a pek hna i hitin a ti: “Fa tampi in ngei u law vawleicung ah khat dih u.
2 Vawleicung thilnung, van ah a zuangmi thilnung, a lawn in a lawnmi saram le rili nga vialte nih an in ṭih peng hna lai. Annih cu an dihlak in nan kut ah kaan pek hna.
3 Nunnak a ngeimi saram vialte kha nan ei khawh hna. Thlaihring kaan pek hna bantuk in rawl caah saram vialte zong kaan pek hna.
4 Asinain sa cu a chung ah thi a um ahcun nan ei lai lo. Zeicahtiah thi cu nunnak a si.
5 Mah leng ah pakhatkhat nih an in thah hna ahcun nan nunnak thisen man kha ka hal hna lai. Saram a si ahcun mah saram cu thah a si ve lai. A unau a thattu cu a nunnak hal a si ve lai.
6 Minung cu Pathian muikeng in ser a si caah a minunghawi a thattu* cu thah a si ve lai.
7 Nannih cu fa tampi in ngei u law vawleicung ah khat dih u.”
8 Mah hnuah Pathian nih Noah le a fapale kha hitin a ti hna:
9 “Nanmah le nan hnu i a um dingmi nan tefa hna sinah atu ah biakamnak ka ser lai.
10 Nan sin i a ummi thilnung vialte, va si hna seh, innzuat saṭil si hna seh, ramlak saram si hna seh, lawng chung in a chuakmi thilnung vialte sinah biakamnak ka ser lai.
11 Nanmah he ka sermi biakamnak cu hihi a si: Thilnung vialte kha zeitik hmanh ah tilian in ka hrawk ti lai lo. Vawlei zong zeitik hmanh ah tilian in ka hrawk ti lai lo.”
12 Cun Pathian nih hitin a ti chap: “Mah hi nanmah le nan sinah a ummi thilnung vialte he ka sermi biakamnak ca hmelchunhnak a si i hmailei chan tiang a hmun lai.
13 Ka chuncha cu minmei chung ah ka chiah. Mah chuncha cu vawlei he ka sermi biakamnak ca hmelchunhnak a si lai.
14 Vawleicung ah minmei ka zamter fatin minmei chung in chuncha a chuak lai.
15 Mah tikah nanmah le thilnung vialte he ka sermi ka biakamnak kha ka hngalh ṭhan hrimhrim lai i tilian in thilnung vialte cu zeitik hmanh ah hrawh an si ti lai lo.
16 Minmei ah chuncha a langhmi ka hmuh tikah vawleicung i thilnung vialte he ka sermi, a hmunmi ka biakamnak kha ka hngalh ṭhan lai.”
17 Pathian nih Noah sinah “Mah hi vawleicung i thilnung vialte he ka sermi ka biakamnak ca hmelchunhnak a si” tiah a ti ṭhan.
18 Lawng chung in a chuakmi Noah fapale cu Shem, Ham le Jafeth an si. A hnuah Ham cu Kanaan pa a hung si.
19 Hi Noah fapale pathum hi vawleicung mi vialte a hringsortu an si i a kenkip ah an karh.
20 Noah cu lothlo a hung si i mitsur dum a tuah.
21 Ni khat cu mitsur zu a din tikah a ri i a thlam chung ah taklawng in a it.
22 Kanaan a pa Ham nih a pa taklawng in a ummi kha a hmuh i leng ah a ummi a ule kha a va chimh hna.
23 Cucaah Shem le Jafeth nih puan pakhat kha an lak i an liang in an i zawn, cun hnulei chit in an lut. Taklawng in a ummi an pa kha hnulei hoih buin an khuh caah an pa taklawng in a ummi kha an hmu lo.
24 Noah cu mitsur zu a ritnak in a hung fim i a fapa hniang nih a cung ah a tuahmi kha a hngalh.
25 Cucaah hitin a ti:
“Kanaan cu chiatserh si seh.
A unau hna lakah a nauta bikmi sal si seh.”
26 Cun hitin a ti chap:
“Shem Pathian Jehovah cu thangṭhat si ko seh,Kanaan cu Shem a sal si seh.”
27 Jafeth cu Pathian nih ram kaupi pe ko seh,Jafeth cu Shem a thlam ah um seh.
Kanaan cu Jafeth a sal zong si seh.”
28 Noah cu Tilian a tlun hnuah kum 350 a nung rih.
29 Noah cu kum 950 a si ah a thi.
Footnotes
^ A hrampi, “a minunghawi thisen a chuahtu.”
