Genesis 21:1-34
21 Jehovah nih a chim bantuk in Sarah cu a philh lo, Jehovah nih a biakam ning in a tuah.
2 Cucaah Sarah cu fa a hung pawi, Abraham cu a tarlei ah Pathian nih bia a kamh ning in rikhiahmi caan ah fapa a ngei.
3 Sarah nih a hrinpiakmi a fapa cu Abraham nih Isak tiah min a sak.
4 Pathian nih nawl a pek ning in Abraham nih a fapa Isak kha ni riat a si ah a cuarpar a tan.
5 A fapa Isak a chuah lioah Abraham cu kum 100 a si cang.
6 Sarah nih cun “Pathian nih a ka nihter cang; hi kong a theimi paoh nih an ka nihpi lai.*
7 Abraham sinah ‘Sarah nih nau hnuk a dinh te lai’ tiah aho nih dah a chim bal? Asinain a tar hnuah fapa pakhat ka hrinpiak cang” tiah a ti.
8 Cun nau cu a ṭhang i hnuk a thlei ni ah Abraham nih Isak caah rawl danghnak puai nganpi a tuah.
9 Izipt minu Hagar nih Abraham a hrinpiakmi fapa nih Isak a nehsawhmi kha Sarah nih a hmuh lengmang.
10 Cucaah Sarah nih Abraham kha “Hi salnu le a fapa hi ṭhawl hna, zeicahtiah hi salnu fapa hi ka fapa Isak he ro coṭi ding cu a si kho lai lo!” tiah a ti.
11 Asinain Abraham cu a fapa Ishmael kong he aa tlaiin Sarah chimmi bia ruang ah a ngaih a chia ngaingai.
12 Cun Pathian nih Abraham kha “Ngakchiapa le na salnu kong he aa tlaiin Sarah chimmi bia ruang ah na ngaihchia hlah. Sarah bia kha ngai ko, zeicahtiah na tefa tiah auh dingmi cu Isak sinin a chuak lai.
13 Salnu fapa zong na tefa a si caah miphun pakhat ah ka ser lai” tiah a ti.
14 Cucaah Abraham cu zingka tein a tho, changreu le saphaw ti-thawl kha a lak i Hagar cu a pek. A liang ah a khinh i ngakchiapa he cun a kalter hna. Cuticun Hagar cu a chuak i Beersheba thetse ram ah a vakvai.
15 Saphaw ti-thawl ti cu a dih tikah Hagar nih ngakchiapa cu burbuk pakhat tang ah a kaltak.
16 Cun “Ngakchiapa a thihmi kha ka zoh ngam lai lo” tiah a ti i lamhla nawn ah a va kal i a va ṭhu, cun fakpi in a ṭap.
17 Pathian nih ngakchiapa aw cu a theih tikah Pathian vancungmi nih Hagar cu “Hagar, zeicah na ṭah? Na thinphang hlah, Pathian nih ngakchiapa a ṭah thawng kha a theih cang.
18 Tho tuah, ngakchiapa cu va thawh law va pom. Zeicahtiah amah cu miphun ngan ah ka ser lai” tiah a ti.
19 Cun Pathian nih Hagar cu a mit khua a hmuhter i tikhor pakhat kha a hmuh. A va kal i saphaw ti-thawl ah ti kha a rawn, cun ngakchiapa cu a dinter.
20 Ngakchiapa a ṭhan chung vialte Pathian cu a sinah a um. Anih cu thetse ram ah a um i thal kah a thiam ngaimi a hung si.
21 Paran thetse ram ah khua a sa i a nu nih Izipt ram in nupi a ṭhitpiak.
22 Mah lio caan ah Abimelek cu a ralbawi Fikol he an ra i Abraham kha “Na tuahmi kip ah Pathian nih aan umpi.
23 Cucaah keimah si seh, ka fale si hna seh, ka tefa si hna seh na kan hlen nakhnga lo le na cung ah a fekmi dawtnak ka langhter bantuk in keimah le ka ram ah a ummi hna cung ah a fekmi dawtnak na langhter ve nakhnga Pathian hmaiah chiatserh in bia i kam” tiah a ti.
24 Cucaah Abraham nih “Chiatserh in bia kaa kam” tiah a ti.
25 Asinain Abimelek salle nih tikhor hramhram in an chuhnak kong cu Abraham nih Abimelek sinah a phuan.
26 Abimelek nih “Mah cucu aho nih dah a tuah ka hngalh ṭung lo; mah kong cu nangmah nih le na ka chim fawn lo. Atu hi ka theih hmasa bik a si” tiah a ti.
27 Mah tikah Abraham nih tuu le caw kha a lak i Abimelek cu a pek, cun an pahnih in biakamnak an ser.
28 Abraham nih tuurun lakin tuu a nu pasarih kha a dang tein a chiah hna tikah,
29 Abimelek nih “Zeicah tuu a nu pasarih hi a dang tein na chiah?” tiah a hal.
30 Abraham nih “Hi tikhor a cotu cu keimah ka si ti fehternak caah hi tuu a nu pasarih hi na ka cohlanpiak lai” tiah a ti.
31 Cuka hmun ah an pahnih in biakamnak an ser caah cu hmun cu Beersheba* tiah an auh.
32 Beersheba ah biakamnak an tuah hnuah Abimelek le a ralbawi Fikol cu an tho i Filistin ram ah an kir ṭhan.
33 Mah hnuah Abraham nih Beersheba ah tamarisk thingkung* kha a cin i cuka ah zungzal Pathian Jehovah kha a min in a auh i a thangṭhat.
34 Cun Abraham cu Filistin ram ah caan saupi khua a sa.
