Genesis 32:1-32
32 Jakob cu a khuallam kha a peh ṭhan i Pathian vancungmi hna he an i tong.
2 A hmuh hnale cangka Jakob nih “Mah hi Pathian thlam pei a si hi!” tiah a ti. Cucaah cu hmun cu Mahanaim* tiah min a sak.
3 Mah hnuah Jakob nih Edom ti zong in auhmi, Seir ram ah a ummi a upa Esau sinah lamkal a hei thlah hna.
4 “Ka bawipa Esau sinah hitin nan va chim lai: ‘Na salpa Jakob nih “Laban sinah caan saupi ramdang mi bantuk in ka va um.
5 Caw, laa, tuu le salnu salpa ka ngei cang. Ka bawipa na mithmai ṭha hmuh awkah hi kong hi kaan hngalhter chungmi a si” tiah a ti.’”
6 Lamkal pawl cu Jakob sinah an rak kir i “Na upa Esau cu kan va ton cang. Atu nangmah ton awkah a mi 400 he an ra lio” tiah an ti.
7 Jakob cu a ṭih tuk i a lungre a thei ngaingai. Cucaah a mi hna le a tuurun, a cawrun le a kalauk hna kha phuhnih ah a ṭhen hna.
8 Esau nih phu khat hi a kan doh ahcun a dang phu khat cu kan luat kho lai tiah a ruah.
9 Mah hnuah Jakob cu hitin thla a cam: “Ka pa Abraham Pathian, ka pa Isak Pathian, ‘Na ram le na rualchan hna sinah va kir law thluachuah kaan pek lai’ tiah a ka titu Maw Jehovah,
10 na salpa ka cung ah na langhtermi a fekmi dawtnak le zumhawktlak sinak hna hi hmuh awkah kaa tlak lo. Jordan Tiva kha ṭhiangṭhunh pakhat he lawng ka rak tan nain atu cu phu pahnih ka ngei cang.
11 Ka upa Esau kut in rak ka khamh ko tiah kaan nawl. Zeicahtiah keimah he, ka nupile le ka fale he a kan doh sual lai ti ka phang.
12 ‘Thluachuah tampi kaan pek lai i na tefa cu a rel in rel cawk lomi rilikam i thetse bantuk in ka karhter hna lai’ tiah na ka ti.”
13 Jakob cu cuka ah cun a riak. Cun a upa Esau laksawng pek awkah a saṭil chung in,
14 mehehpi 200, mehehtum 20, tuupi 200, tuukawng 20,
15 fa a hringmi kalauk 30, cawpi 40, cawtum 10, laapi 20, laatum 10 kha a lak.
16 Runkhat cio in a salle kha a zohter hna i “Ka hmaiah kal chung u law runkhat le runkhat kha aa hlat nawn in zulhter hna u” tiah a ti hna.
17 A hmasa bik sal kha “Ka upa Esau he nan i ton tikah ‘Na bawipa cu ahodah a si? Khoika ah dah na kal lai? Hi saṭilrun hi aho ta dah a si?’ tiah aan hal ahcun,
18 ‘Na salpa Jakob ta a si. Ka bawipa Esau, nangmah caah laksawng aan kuatmi a si. Amah zong kan hnulei in a ra lio’ na ti lai” tiah bia a cah.
19 A pahnihnak sal, a pathumnak le a saṭil a zohtu vialte kha “Esau he nan i ton tikah mah bia ning tein nan chim lai.
20 ‘Na salpa Jakob zong kan hnulei in a ra lio’ tiah nan ti lai” tiah bia a cah hna. Zeicahtiah Jakob nih ‘Laksawng ka kuat hmasa ahcun a lungthin a dam deuh lai i kan i ton tikah ṭha tein a ka cohlan lai’ tiah a ruah caah a si.
21 Cucaah laksawng cu a kuat chung i amah tu cu riahhmun ah a taangta.
22 Cu zan ah cun Jakob cu a tho i a nupile pahnih, a salnule pahnih le a fapale 11 kha a kalpi hna i Jabbok tiva a puanhnak in a tanter hna.
23 A ngeihmi vialte he tiva ral lei ah cun a kalter hna.
24 A donghnak ah Jakob cu amah lawng a taang. Mipa pakhat a ra i khuadei tiang an i pai.
25 An i paih lioah mipa nih cun ka tei kho ti lai lo ti kha a hngalh tikah Jakob kha a khel ah a tawngh i Jakob cu a khelruh a pelh.
26 Mipa nih cun “Rak ka thlah cang, khua a dei cang lai” tiah a ti tikah Jakob nih “Thluachuah na ka pek hlan lo kaan thlah lai lo” tiah a ti.
27 Cucaah mipa nih cun “Na min ahodah a si?” tiah a hal tikah “Jakob ka si” tiah a leh.
28 Mipa nih cun “Na min cu Jakob a si ti lai lo, Israel* a si cang lai. Zeicahtiah Pathian he, minung he na paih hna i na tei hna” tiah a ti.
29 Jakob nih “Zaangfahnak in na min rak ka chim” tiah a ti tikah “Zeicah ka min cu na ka hal?” tiah a ti. Cun Jakob cu thluachuah a pek.
30 Cucaah Jakob nih mah hmun kha Peniel* tiah min a sak, zeicahtiah “Pathian kha hmaitonh in ka hmuh cang, asinain ka nunnak cu zuah a si” tiah a ti.
31 Jakob cu Penuel* in a chuah tikah ni a chuak cang. A khelruh a pelh caah Jakob cu a bei.
32 Vancungmi nih Jakob kha a khel ah a tawngh caah Israel mi nih a khelruh cung i a tha kha tuchan tiang an ei lomi a si.
