Genesis 34:1-31
34 Jakob le Leah an fanu Dinah cu cuka rammi ngaknu hna sinah a va kal i anmah he caan a hmangṭi tawn.
2 Cuka ram hruaitu Hiv mi, Hamor fapa Shekhem nih Dinah cu a hmuh tikah a kalpi i a tlaihhrem.
3 Jakob fanu Dinah cu a tlaihchan i a duh tuk caah a lungthin lak awkah a bia in a lem.
4 A donghnak ah Shekhem nih a pa Hamor cu “Hi ngaknu hi ka ṭhitpiak ko” tiah a nawl.
5 Jakob nih a fanu Dinah cu Shekhem nih a tlaihhrem ti a theih lioah a fapale cu ramlak ah saṭil an khalh lio a si. Cucaah Jakob cu an rak kir hlan tiang dai tein a um.
6 A hnuah Shekhem a pa Hamor cu Jakob he bia i ruah awkah a va kal.
7 Jakob fapale nih mah kong kha an theihle cangka ramlak in an rak tlung. Shekhem nih Jakob fanu cung ah dawhcah loin thil a tuah i a tlaihhremnak thawng in Israel cu a serhset caah Jakob fapale cu an lung a fak i an thin a hung tuk.
8 Hamor nih hitin a ti hna: “Ka fapa Shekhem nih nan fanu cu a duh tuk. Cucaah zaangfahnak in nupi caah kan pe ko u,
9 ṭhitumnak in ṭangṭi hna u sih. Nan fanule kha rak kan pe u law kan fanule zong i lak ve hna u.
10 Kan sinah hin um u law hi ram i nan duhnak hmun paoh ah nan um kho. Hika ah hin um u, chawlet u law khuasa u.”
11 Cun Shekhem nih cun Dinah a pa le a ṭale kha “Mithmai ṭha rak ka pe ko u, nan ka halmi paoh kaan pek hna lai.
12 Man le laksawng zong nan duh zat in rak ka hau ko u. Nan ka halmi paoh kaan pek hna lai. Ngaknu tu kha nupi caah rak ka pe ko u” tiah a ti hna.
13 Shekhem nih an farnu Dinah kha a thurhnawmhter caah Jakob fapale nih Shekhem le a pa Hamor kha hlenthawinak in bia an leh hna.
14 Hitin an ti hna: “Kan farnu cu cuarpar aa tan lomi pa cu kan vatter kho lo. Kan vatter ahcun kan caah ningzahnak a si hnga.
15 Kanmah bantuk in nan lak i pa vialte nih nan cuarpar nan i tan lawng ah kan in cohlan khawh hna lai.
16 Cun kan fanule kan in pek hna lai i nan fanule kha kan i lak ve lai. Cun nan sinah khua kan sa lai i miphun pakhat kan hung si lai.
17 Asinain kan chimmi kha nan cohlan lo i cuarpar nan i tan lo ahcun kan farnu cu kan i lak lai i kan kalpi ko lai.”
18 An chimmi kha Hamor le a fapa Shekhem cu an lung a tling.
19 Shekhem nih Jakob fanu cu a duh tuk caah an chimmi kha khulrang in a tuah colh. Anih cu a pa innchungkhar ah an hmaizah bikmi a si.
20 Cucaah Hamor le a fapa Shekhem cu khua hauka ah an va kal i khuami kha hitin an ti hna:
21 “Hi mi hna nih hin kanmah he daihnak ser an duh. Hi ram ah hin umter hna u sih law chawlehnak nawl zong pe hna u sih. Hi ram cu a kau ngai ko i an i tlum ko lai. An fanule kha nupi caah kan ṭhit khawh hna lai i kan fanule zong an ṭhit khawh ve hna lai.
22 Asinain anmah he miphun pakhat kan si khawh nakhnga le hmunkhat ah kan umṭi khawh nakhnga kan lak i pa vialte nih anmah bantuk in cuarpar kan i tan ve a hau.
23 Cun an ngeihmi thil, an chawva le an saṭil vialte cu kanmah ta an si lai. Cucaah kan sinah umter ve ding in kan hna tlakpi ko hna u sih.”
24 Khua hauka i aa pummi vialte cu Hamor le a fapa Shekhem nih an chimmi kha an hna a tla i khuami pa vialte cu an cuarpar an i tan dih.
25 Asinain a ni thumnak ni, an hma a fah saling ah Jakob fapale pahnih, Dinah a ṭale Simeon le Levi nih an nam kha an i lak i ruahlopi in khua chung ah an lut i pa vialte kha an thah dih hna.
26 Hamor le a fapa Shekhem zong an thah hna. Cun Dinah cu Shekhem inn in an lak i an kalpi.
27 An farnu Dinah cu an thurhnawmhter caah Jakob fapale dang zong thah a simi hna an umnak ah an ra i khua kha an lak.
28 An tuurun, an saṭilrun, an laa hna le khua chung ah a ummi siseh, lo ah a ummi siseh zeizong vialte kha an lak dih.
29 Cun an chawva vialte zong an lak dih. Ngakchia le an nupile kha an tlaih hna i innchung ah a ummi thil vialte zong an lak dih.
30 Mah tikah Jakob nih Simeon le Levi kha “Ka cung ah harnak nganpi nan tlunter. Hika ram ah a ummi Kanaan mi le Periz mi nih an ka huat cang lai. Kannih cu mi tlawmte lawng kan si. Annih cu an i fonh lai i keimah le ka innchungkhar cu an kan hloh dih ko lai” tiah a ti.
31 Asinain annih nih “Kan farnu cu hlawhhlangnu bantuk in an tuah awk a si maw?” tiah an ti.
