Genesis 31:1-55
31 A hnuah Laban fapale nih “Jakob nih kan pa ngeihmi vialte aa lak dih cang, kan pa ngeihmi chawva in a rumnak cang” tiah an timi kha Jakob nih a theih.
2 Jakob nih Laban mithmai a zoh tikah a cung ah a lungput aa thlenmi le a hlan bantuk a si ti lomi kha a hmuh.
3 Jehovah nih Jakob kha “Na pa le na rualchan hna an umnak ram ah va kir cang, na sinah ka um peng lai” tiah a ti.
4 Jakob nih Rachel le Leah kha a saṭilrun an tlonnak ramlak ah rat ding in bia a cah hna.
5 Cun hitin a ti hna:
“Ka cung ah nan pa a lungput aa thlenmi kha ka hngalh. Asinain ka pa Pathian nih a ka umpi ko.
6 Nan pa caah ka thazaang dihlak in rian ka ṭuanmi kha ṭha tein nan hngalh ko.
7 Nan pa nih a ka hlen i ka rianṭuan man kha voi hra tiang a thlen. Asinain ka cung ah ṭhatlonak tuah ding kha Pathian nih a awnh lo.
8 Laban nih ‘Saṭilrun lakin ṭial dip in a ṭialmi vialte cu na rianṭuan man a si lai’ tiah a ka ti tikah saṭilrun vialte nih ṭial dip in a ṭialmi lawng te an hrin. Cun ‘A phei in a ṭialmi vialte cu na rianṭuan man a si lai’ tiah a ka ti tikah saṭilrun vialte nih a phei in a ṭialmi lawng te an hrin.
9 Cuticun Pathian nih nan pa saṭilrun kha a sinin a lak i keimah a ka pek.
10 Saṭil phol caan ah mang ka manh i ka mang ah saṭil pawl a kaihtu meheh tum hna cu a phei in a ṭialmi, ṭial dip in a ṭialmi le aa dehmi an simi kha ka hmuh.
11 Cun a hmaanmi Pathian vancungmi nih ka mang ah ‘Jakob!’ tiah a ka auh i ‘Hawi’ tiah ka leh.
12 Mah tikah ‘Zoh hmanh! Saṭil a kaihtu meheh tum vialte cu a phei in a ṭialmi, ṭial dip in a ṭialmi le aa dehmi an simi kha na hmuh lai. Zeicahtiah Laban nih na cung ah a tuahmi vialte kha ka hngalh dih.
13 Kei cu lungphun ah chiti na toihnak, ka sinah biakamnak na sernak, Bethel ah a langmi a hmaanmi Pathian kha ka si. Atu tho law hi ram in hin chuak tuah, cun na chuahkehnak ram ah kir cang’ tiah a ka ti.”
14 Rachel le Leah nih cun “Kan pa inn in ro kan co dingmi zeihmanh a um ti lo.
15 A kan zuar i kan man a hmuhmi tangka a hman dih thawk in ramdang mi bantuk in pei a kan hmuh ko cu.
16 Pathian nih kan pa sinin a lakmi chawva vialte cu kanmah le kan fale ta an si. Cucaah Pathian nih aan chimh ning in tuah ko” tiah an ti.
17 Mah tikah Jakob cu a tho i a fale le a nupile kha kalauk cung ah a chuan hna.
18 Cun a saṭilrun vialte, aa khonmi thilri chawva vialte le Paddan-aram i a rak ngeihmi a saṭil vialte kha a lak hna i a pa Isak umnak Kanaan ram lei ah a kal.
19 Laban cu tuuhmul meh awk i a kal lioah Rachel nih a pa ta a simi terafim milem* kha a rak fir hna.
20 Jakob zong nih Laban kha zeihmanh chimh ta loin a thli tein a rak kal. Cuticun Aramaean miphun Laban cu a hlen.
21 Jakob cu a ngeihmi thilri chawva vialte he a zam i Tiva* kha a tan. Cun Gilead tlangram lei kha a fuh.
22 A ni thumnak ni ah Jakob a zam ti kha Laban cu an chimh.
23 Cucaah a mi pawl kha a auh hna i Jakob cu an dawi. Ni sarih hnuah Gilead tlangram ah an va phanh.
24 Cu zan ah cun Aramaean miphun Laban a mang ah Pathian cu a lang i “Jakob sin bia na chim tikah i ralring” tiah a ti.
25 Jakob nih Gilead tlangram ah a thlam kha a bunh. Laban zong cuka tlangram ah cun a mi pawl he an riak ve. Mah hnuah Laban nih Jakob cu a va ton.
26 Cun hitin a ti: “Zeicah hi bantuk in na tuah? Zeicah na ka hlen i ka fanule cu ral ah an tlaihmi hna bantuk in naa kalpi hna?
27 Zeicah na ka hlen i keimah chimh ta loin a thli tein na tlik? Rak ka chim ta law cu khuang le tingtang le hla he lunglawm tein kaan thlah hna hnga lo maw?
28 Atu cu ka tule* le ka fanule kha a hnamh hmanh na ka hnamhter hna lo. Hrut ngai in thil na tuah.
29 Na cung ah harnak ka tlunter khawh ko. Asinain zahan ah na pa Pathian nih ‘Jakob sin bia na chim tikah i ralring’ tiah a ka ti.
30 Na pa inn ah kir na duh tuk ruang i na va kir hmanh ah zeicah ka pathian cu na fir hna?”
31 Jakob nih cun “Na fanule kha hramhram in na ka chuh sual hna lai ti ka phan caah a thli tein ka kalmi a si.
32 Pakhatkhat sinah na pathian hna cu na hmuh ahcun anih cu thah si seh. Kan unau hna mithmuh ah hin ka thilri lakah kawl law na hmuh ahcun la ko” tiah a ti. Asinain Rachel nih a firmi kha Jakob nih a hngal lo.
33 Cucaah Laban cu Jakob thlam, Leah thlam le salnu pahnih hna thlam ah a lut nain a hmu lo. A donghnak Rachel thlam ah a lut.
34 Mah lioah Rachel nih terafim milem cu a lak hna i nu nih an hmanmi kalauk kengdanh chung ah a chiah hna. Cun an cung in a ṭhut nenh hna. Cucaah Laban nih thlam cu a kawl dih nain a hmu lo.
35 Rachel nih a pa cu “Na thinhung hlah, ka bawipa. Nuphung ka hngalh lio a si caah na hmaiah ka dir khawh lomi a si” tiah a ti. Cuticun Laban nih ṭha tein a kawl len ko nain terafim milem cu a hmu lo.
36 Mah tikah Jakob cu a thin a hung tuk i Laban kha a mawhchiat. Jakob nih Laban cu hitin a ti: “Zei sualnak ko dah ka tuah? Zei palhnak ko dah ka tuah i atu bantuk in na rak ka dawi?
37 Atu ka thilri vialte zong na thlok dih cikcek. Na ta a simi zeidah na hmuh? Na hmuh ahcun mi vialte hmaiah hin chia law kan karah bia khiak hna seh.
38 Na sin i kum 20 ka um chung ah na tuu le na meheh zong fa an hrulh bal lo. Na tuurun chung in tuukawng zong ka ei bal lo.
39 Sahrang nih an sehmi zong na sinah ka rak pu bal lo. Keimah ta tu in ka airolh hna. Chun ah firmi si hna seh, zan ah firmi si hna seh na ka liamter.
40 Chun ah nilin, zan ah khuasik ka ing i mitku vuai loin ka um.
41 Cuticun na inn ah kum 20 chung ka um. Na fanule pahnih caah kum 14, na saṭilrun caah kum 6 chung rian ka ṭuan. Cun ka rianṭuan man kha voi hra tiang na thlen.
42 Abraham Pathian, ka pa Isak nih a ṭihzahmi Pathian nih rak ka umpi hlah seh law kut ro in na ka kalter ko hnga. Pathian nih harnak ka inmi le rian fakpi in ka ṭuanmi kha a hmuh caah zahan ah ralrin aan pekmi a si.”
43 Mah tikah Laban nih Jakob cu “Hi fanule hi ka fanule an si, hi ngakchia hna hi ka tule an si i hi saṭilrun hi ka saṭilrun an si. Na hmuhmi vialte cu keimah le ka fanule ta an si dih. Ka fanule le an fale cu zeitindah harnak ka pek hna hnga?
44 Biakamnak tu ser u sih law mah biakamnak cu nangmah le keimah karah tehte caah a si lai” tiah a ti.
45 Cucaah Jakob nih lung pakhat kha a lak i lungphun a bunh.
46 Jakob nih a mi pawl kha “Lung va khawm u!” tiah a ti hna. An va khawmh i lung cu an pon. Mah hnuah cu lungpon cung ah cun rawl an ei.
47 Laban nih cu lungpon cu Jegar-sahadutha* tiah a auh. Asinain Jakob nih cun Galeed* tiah a auh.
48 Laban nih hi lungpon cu “Nihin ah nangmah le keimah karah tehte a si” tiah a ti. Cucaah cu lungpon cu Galeed tiah auh a si.
49 Vennak Innsang ti zong in auh a si. Laban nih cun “Pakhat le pakhat kan i ṭhen tikah Jehovah nih nangmah le keimah cu rak kan zoh ko seh.
50 Ka fanule kha a ding loin na pehtlaih hna i ka fanule leng ah nupi dang na ṭhit ahcun mi nih an hmuh lo hmanh ah kan tehte a simi Pathian nih a hmuh ti kha i cinken” tiah a ti.
51 Laban nih Jakob cu “Hika ah lungpon le biakamnak kan ser ti langhternak caah kan phunmi lungphun zong a um.
52 Hi lungpon le hi lungphun cu tehte an si. Nangmah harnak pek awkah hi lungphun hi ka lonh lai lo i nangmah zong nih keimah harnak pek awkah hi lungphun le lungpon hi na lonh lai lo.
53 Abraham Pathian, Nahor Pathian le an pa Pathian nih kan karah bia kan ceih ko seh” tiah a ti. Jakob cu a pa Isak nih a ṭihzahmi Pathian min chalh in bia aa kam.
54 Mah hnuah Jakob nih tlang cung ah raithawinak a pek i a mi pawl kha rawl ei a sawm hna. Cucaah an ei i tlang cung ah cun an riak.
55 Laban cu zingka tein a tho i a tule* le a fanule kha a hnamh hna i thluachuah a pek hna. Cun aa thawh i innlei ah a kir.
