Genesis 10:1-32
10 Hihi Noah fapale Shem, Ham le Jafeth i an tefale an si.
Annih cu Tilian a tlun hnuah hrinmi an si.
2 Jafeth fapale cu Gomer, Magog, Madai, Javan, Tubal, Meshek le Tiras an si.
3 Gomer fapale cu Ashkenaz, Rifath le Togarmah an si.
4 Javan fapale cu Elishah, Tarshish, Kittim le Dodanim an si.
5 An tefa hna cu tikulh ah an um i an holh, an chungkhar le an miphun ning in an ram cio ah an karh.
6 Ham fapale cu Kush, Mizraim, Put le Kanaan an si.
7 Kush fapale cu Seba, Havilah, Sabtah, Raamah le Sabteka an si.
Raamah fapale cu Sheba le Dedan an si.
8 Kush cu Nimrod pa a si. Nimrod cu vawleicung ah a hmasa bik a liannganmi a hung si.
9 Anih cu Jehovah a ralchanhmi, a ṭhawng tukmi sakap a hung si. Cucaah “Jehovah a ralchanhmi, a ṭhawng tukmi sakap Nimrod bantuk” timi phungthluk a um.
10 A pen hmasa bikmi khua hna cu Shinar ram i Babel, Erek, Akkad le Kalneh khua an si.
11 Cuka ram in Assiria ram lei ah a kal i Nineveh, Rehoboth-Ir le Kalah khua hna kha a dirh.
12 Nineveh le Kalah khua karah a ummi Resen khua zong a dirh: Mah cu a liannganmi khualipi a hung si.*
13 Mizraim fapale cu Ludim, Anamim, Lehabim, Naftuhim,
14 Kasluhim, Casluhim le Kaphtorim an si. Filistin mi cu Casluhim tefa in a rami an si.
15 Kanaan fapale cu a fater Sidon le Heth an si.
16 Kanaan cu Jebus mi, Amor mi, Girgash mi,
17 Hiv mi, Arki mi, Sin mi,
18 Arvad mi, Zemar mi le Hamath mi hna an pupa a si. Mah hnuah Kanaan mi hna cu an i ṭhenṭhek dih.
19 Kanaan mi hna an ramri cu Sidon in Gaza pawng Gerar tiang, cun Lasha pawng Sodom, Gomorrah, Admah le Zeboiim tiang a si.
20 Hi hna hi an chungkhar, an holh, an ram le an miphun ning cio in Ham tefa an si.
21 Fa upa bik Jafeth a nau* Shem zong nih fale a ngeih hna, anih cu Eber miphun i an pupa a si.
22 Shem fapale cu Elam, Asshur, Arpaksad, Lud le Aram an si.
23 Aram fapale cu Uz, Hul, Gether le Mash an si.
24 Arpaksad cu Shelah pa a si, Shelah cu Eber pa a si.
25 Eber nih fapa pahnih a ngeih hna. Pakhat cu a min ah Peleg* a si, zeicahtiah a chan chung ah vawleicung i a ummi hna cu an i ṭhenṭhek dih.* A dang pakhat cu Joktan a si.
26 Joktan fapale cu Almodad, Shelef, Hazarmaveth, Jerah,
27 Hadoram, Uzal, Diklah,
28 Obal, Abimael, Sheba,
29 Ofir, Havilah le Jobab an si. An dihlak in Joktan fapale an si.
30 An umnak hmun cu Mesha in Nichuahlei tlangram Sefar tiang a kau.
31 Hi hna hi an chungkhar, an holh, an ram le an miphun ning cio in Shem tefa an si.
32 Hi hna vialte hi Noah fapale hrinsor an si. An chungkhar le an miphun ning cio in Tilian a tlun hnuah vawleicung khuazakip ah an karh.
