Genesis 39:1-23
39 Ishmael mi nih Josef cu Izipt ram ah an kalpi. Cuka ah Faraoh bawi, Izipt miphun runvengtu bawi Potifar nih an sinin a cawk hna.
2 Josef cu Jehovah nih a umpi caah hlawhtlinnak a hmu i Izipt mi a bawipa inn zohkhenhtu a hung si.
3 Jehovah nih a umpi i a tuahmi thil kip ah Jehovah nih hlawhtlinnak a pek ti kha a bawipa nih a hmuh.
4 Josef cu a bawipa mithmai ṭha a hmu i a zumh tukmi sal a hung si. Cucaah a bawipa nih a inn le a ngeihmi thil vialte zohkhenhtu ah a chiah.
5 Potifar nih Josef kha a inn le a ngeihmi thil vialte zohkhenh awkah rian a pek thawk in Jehovah nih Josef thawng in Potifar innchungkhar cu thluachuah a pek hna. A inn ah siseh, a lo ah siseh a ngeihmi thil vialte cung ah Jehovah nih thluachuah a pek.
6 A donghnak ah Potifar nih a ngeihmi thil vialte kha Josef zohkhenhnak tang ah a chiah i a ei awk rawl kong dah ti lo cun zei kong hmanh a ruah a hau lo. Josef cu mi pumrua ṭha le midawh a si.
7 A hnuah a bawipa nupi nih Josef cu a mit a hlaan ngaingai i “Rak ka ihpi” tiah a ti.
8 Asinain Josef nih cun a al i “Hi inn i ka um ruang ah ka bawipa cu zei kong hmanh ah a lungretheih a hau lo, a ngeihmi thil vialte kha keimah kut chung ah a chiah dih.
9 Hi inn ah hin keimah nakin a ngan deuhmi ahohmanh an um lo, ka bawipa nih a nupi nangmah dah ti lo cu a ka sianh lomi zeihmanh a um lo. Cucaah zeitindah hi tluk a nganmi ṭhatlonak cu ka tuah khawh lai i Pathian cung ah ka sual lai?” tiah a ti.
10 Ni khat hnu ni khat in a lem lengmang. Asinain Josef nih cun amah he ihṭi ding le umṭi ding kha a al peng.
11 Asinain ni khat cu rian ṭuan awkah innchung i a luh tikah innchung ah cun sinum ahohmanh an rak um lo.
12 Mah tikah a angki leng in a rak tlaih i “Rak ka ihpi ko!” tiah a ti. Asinain Josef nih a angki leng cu a kaltak i leng ah a tli.
13 A angki leng cu a kaltak i leng ah a tlikmi kha a hmuhle cangka,
14 a innchung i pa pawl kha a auh hna i “Zoh hmanh u! Ka vapa nih a rak ratpimi hi Hebru mipa nih hin ningzah a kan thlaih.* Keimah ihpi awkah a rak ka luh hnawh caah fakpi in ka au.
15 Ka aumi a theihle cangka a angki leng kha a kaltak i leng ah a tli” tiah a ti hna.
16 Cun Potifar a rak ṭin hlan tiang Josef angki leng cu aa chiah ko.
17 A hmasa a chim bantuk in “Na rak ratpimi Hebru salpa nih hin keimah ningzah thlaih awkah a ka luh hnawh.
18 Asinain fakpi in ka aule cangka a angki leng kha a kaltak i leng ah a tli” tiah a vapa cu a chimh.
19 “Na salpa nih ka cung ah hitin a tuah” tiah a nupi nih a chimmi bia kha a theihle cangka Potifar cu a thin a hung tuk hringhran.
20 Cucaah Josef cu a tlaih i siangpahrang nih thongtla pawl a chiah hnanak thonginn ah a thlak i cuka ah cun a um ko.
21 Asinain Jehovah nih Josef cu a umpi i a cung ah a fekmi dawtnak a langhter peng. Cun thongbawi sin zong in mithmai ṭha a hmuhter.
22 Cucaah thongbawi nih Josef cu thongtla vialte zohkhenhtu ah a chiah i thonginn chung ah an ṭuanmi rian vialte kha a tlangtlak hna.
23 Jehovah nih Josef cu a umpi i a tuahmi thil kip ah Jehovah nih hlawhtlinnak a pek caah Josef zohkhenhmi thil paohpaoh cu thongbawi nih zeihmanh a zoh ṭhan a hau ti lo.
Footnotes
^ A hrampi, “mi nih nihsawh ding in a kan tuah.”
