Genesis 50:1-26
50 Josef nih a pa cu a kun hnawh i a ṭah i a hnamh.
2 Cun Josef nih a kut tang ah rian a ṭuanmi siibawi pawl kha a pa ruak cu a thut nakhnga lo sii thuh awkah nawl a pek hna. Cucaah siibawi pawl nih Israel ruak cu sii an thuh.
3 A ruak sii thuhnak ah ni 40 chung an rau. Zeicahtiah ruak sii thuhnak ah cu can cu an rau tawn. Cun Izipt mi nih Israel cu ni 70 chung an ṭah.
4 A pa an ṭah caan cu a dih tikah Josef nih Faraoh bawile kha “Nan mithmai ṭha ka hmuh ahcun Faraoh sinah hi bia hi va ka chimhpiak u:
5 ‘Ka pa nih chiatserh in bia a ka kamter i “Kei cu ka thi cang lai. Kanaan ram ah ka cawk ciami thlan hmun ah rak ka vui” tiah a ti. Cucaah zaangfahnak in ka pa ruak cu va vui ta ning law mah hnuah ka rak kir ṭhan lai’” tiah a ti hna.
6 Faraoh nih cun “Va kal law na pa nih bia aan kamter bang in va vui ko” tiah a ti.
7 Cucaah Josef cu a pa vui awkah a kal i Faraoh a salle vialte, a inn bawi vialte le Izipt ram i bawi vialte nih an zulh.
8 Cun Josef a innchungkhar le a unau hna le a pa innchungkhar zong nih an zulh. Ngakchia le an tuurun le an saṭilrun lawng kha Goshen ram ah cun an chiahtak hna.
9 Rangleng le rang cung ralkap zong nih an zulh hna caah mibu nganpi an si.
10 Jordan Tiva pawng i Atad phuhri an phak tikah cuka ah cun thangpi le fakpi in an ṭap. Cun Josef nih a pa ruak cu ni sarih chung a ṭah.
11 Atad phuhri ah an ṭahmi kha cuka ram i a ummi Kanaan mi nih an hmuh tikah “Izipt mi hna caah a fak ngaingaimi ṭahnak pei a si hi!” tiah an ti. Cucaah mah hmun cu Abel-mizraim* tiah min an sak. Mah cu Jordan Tiva pawng ah a ummi a si.
12 Cucaah Jakob nih bia a cah hna ning te khan a fapale nih an tuah.
13 A fapale nih a ruak cu Kanaan ram ah an kalpi i Mamre hmai i Makpelah lo ah a ummi lungkua ah cun an vui. Mah lo cu Abraham nih thlan hmun caah Hit mi Efron sinin a cawkmi a si.
14 Josef nih a pa cu a vui dih hnuah a unau hna le a pa ruak thlahnak ah amah he a kal vemi hna he an dihlak in Izipt ram ah cun an kir ṭhan.
15 Josef ule nih an pa a thih hnuah “Josef nih a cung ah kan rak tuahmi ṭhatlonak ruang ah rak kan hua in teirul kan cham sual seh law zeitin?” tiah an i ceih.
16 Cucaah Josef sinah cun “Ka pa nih a thih hlanah hitin bia a kan cahtak:
17 ‘“Zaangfahnak in na ule nih na cung ah an rak tuahmi thil ṭhalo le an sualnak kha ngaithiam ko hna” tiin Josef kha nan va chimh lai’ tiah a ti. Cucaah zaangfahnak in na pa Pathian salle i ṭhatlonak hi kan ngaithiam ko” tiah bia an cah. Mah bia kha a theih tikah Josef cu a ṭap.
18 Mah tikah a ule cu an ra i a hmaiah cun an kun. Cun “Na duh ning paoh in rak kan tuah ko. Na sal kan si ko hih!” tiah an ti.
19 Josef nih cun “Nan thinphang hlah u. Nanmah biaceih awkah Pathian maw ka si?
20 Ka cung ah ṭhatlonak tuah awkah nan i tim ko nain Pathian nih mah kha thilṭha ah a canter i mah cu atu a tuah bantuk in mi tampi an nunnak khamh awkah a rak si.
21 Cucaah nan thinphang hlah u. Nanmah he, nan fale he kaan zohkhenh peng ko hna lai” tiah a ti. Cuticun an lungre a theih nakhnga lo a hnemh hna.
22 Josef le a pa innchungkhar cu Izipt ram ah khua an sa rih ko. Josef cu kum 110 a nung.
23 Josef nih Efraim a tule kha chan thum tiang a hmuh hna. Manasseh fapa, Makhir fapale zong a hmuh hna. Annih cu Josef nih amah fale bantuk in a pehtlaih hna.*
24 Josef nih a thih lai ah a unau hna kha “Kei cu ka thi cang lai. Asinain Pathian nih aan philh hrimhrim hna lai lo. Hi ram in hin aan chuahpi hna lai i Abraham, Isak le Jakob sinah bia a kamhmi hna ram ah aan kalpi hrimhrim hna lai” tiah a ti.
25 Cun Josef nih Israel fapale kha “Pathian nih aan philh hrimhrim hna lai lo. Mah tikah ka ruh kha hika in hin nan kalpi lai” tiah chiatserh in bia a kamter hna.
26 Josef cu kum 110 a si ah Izipt ram ah a thi. A ruak kha a thut nakhnga lo sii an thuh i ruak kuang chung ah an chiah.
