Genesis 14:1-24
14 Shinar siangpahrang Amrafel, Ellasar siangpahrang Ariok, Elam siangpahrang Khedorlaomer le Goiim siangpahrang Tidal nih,
2 Sodom siangpahrang Bera, Gomorrah siangpahrang Birsha, Admah siangpahrang Shinab, Zeboiim siangpahrang Shemeber le Bela siangpahrang kha an doh hna. Bela cu Zoar ti zong in auh a si.
3 Mah siangpahrang panga cu Cite Rili* tiah auhmi Siddim Nelrawn ah hmunkhat ah an ṭangṭi.
4 Annih cu Khedorlaomer kut tang ah kum 12 chung an rak um i kum 13nak ah an ralchanh.
5 Kum 14nak ah Khedorlaomer le amah he a ṭangṭimi siangpahrang hna cu an ra i Ashteroth-karnaim ah Repha miphun, Ham ah Zuzim miphun, Shaveh-kiriathim ah Emim miphun kha an doh hna i an tei hna.
6 Cun Seir tlang ah a ummi Hor miphun zong kha thetse ramri, Elparan tiang an doh hna i an tei hna.
7 Cun an rak kir ṭhan i Kadesh tiah auhmi Enmishpat ah an rak phan. Mah tikah Amalek mi hna ram vialte le Hazazon-tamar ah a ummi Amor mi zong kha an tei hna.
8 Mah lio caan ah Sodom siangpahrang cu Gomorrah siangpahrang, Admah siangpahrang, Zeboiim siangpahrang le Zoar tiah auhmi Bela siangpahrang he Siddim Nelrawn ah an kal i ral doh awkah hmunhma an khuar.
9 Cun Elam siangpahrang Khedorlaomer, Goiim siangpahrang Tidal, Shinar siangpahrang Amrafel le Ellasar siangpahrang Ariok kha an doh hna—siangpahrang pali le siangpahrang panga cu an i do.
10 Siddim Nelrawn cu kattaza khor in a khat i Sodom siangpahrang le Gomorrah siangpahrang cu an zam tikah khor chung ah an tla, a dang cu tlangram lei ah an zam.
11 Teitu hna nih Sodom le Gomorrah khua i thilri le rawl vialte kha an lak i an kal.
12 Cun Sodom khua ah a ummi, Abram a u fapa Lot le a thilri zong an lak i an kalpi hna.
13 Mah hnuah a luatmi pa pakhat cu Hebru mi Abram sinah a ra i thil sining vialte kha a chimh. Mah lioah Abram cu thingkung nganpipi an umnak Mamre i Amor miphun hna lakah khua a sa.* Mamre cu Eskhol le Aner i an upa a si i annih cu Abram he a ṭangṭimi an si.
14 Abram nih a rualchan* cu tlaih a si ti a theih tikah ral doh awkah ṭha tein cawnpiakmi a mi 318 kha a khawmh hna i Dan khua tiang an dawi hna.
15 Zan a phanh tikah Abram nih a mi pawl kha a bu in a ṭhen hna, cun an ral kha an doh hna i an tei hna. An ral pawl kha Damaskas chaklei in Hobah tiang an dawi hna.
16 An thilri vialte zong a lak, cun a rualchan Lot le a thilri, nu pawl le midang zong a kirpi ṭhan hna.
17 Khedorlaomer le amah he a ṭangṭimi siangpahrang hna teinak in Abram cu a kir ṭhan tikah Sodom siangpahrang nih Siangpahrang Nelrawn tiah auhmi, Shaveh Nelrawn ah a rak don.
18 Salem siangpahrang Melkhizedek nih changreu le mitsur zu kha a rak put; anih cu Cung Nung Bik Pathian tlangbawi a si.
19 Cun thluachuah a pek i hitin a ti:
“Van le vawlei Sertu,Cung Nung Bik Pathian nih Abram cu thluachuah pe ko seh;
20 Na ral pawl na kut chung ah aan petu,Cung Nung Bik Pathian cu thangṭhat si ko seh!”
Cun Abram nih hranchaw a lakmi vialte chung in cheuhra cheukhat kha Salem siangpahrang cu a pek.
21 Mah hnuah Sodom siangpahrang nih Abram kha “Ka mi hna dah ti lo cun hranchaw na lakmi vialte cu nangmah nih i lak ko” tiah a ti.
22 Asinain Abram nih Sodom siangpahrang kha hitin a ti: “Van le vawlei Sertu, Cung Nung Bik Pathian Jehovah hmaiah kut hler in chiatserh in bia kaa kam,
23 ‘Abram cu keimah nih pei ka rumter ko cu’ tiah na chim khawh nakhnga lo na thil a simi paohpaoh lafang pakhat in phanat hri tiang zeihmanh kaa lak lai lo.
24 Hi tlangval hna nih an eimi dah ti lo cu zeihmanh kaa lak lai lo. Keimah he a rami Aner, Eskhol le Mamre tu nih cun an covo kha i lak ko hna seh.”
