Genesis 19:1-38
19 Vancungmi pahnih cu zanlei sang ah Sodom khua an va phanh tikah Lot cu Sodom khua hauka hram ah a rak ṭhu ko. A hmuh hna tikah anmah don awkah a tho i vawlei ah a bawk.
2 Cun anih nih “Zaangfahnak in ka bawile hna, tuzan cu ka inn ah riak u law nan ke zong i ṭawl u. Cun thaizing zingka tein nan tho lai i nan lan te lai” tiah a ti hna. Annih nih “Kan riak lai lo. Khua chung tual ah kan va riak lai” tiah an ti.
3 Asinain Lot nih a nawl lengmang hna caah a donghnak ah a inn ah cun an kal. Lot nih an caah rawl kha a timhtuah i thilnu telhlo changreu a serpiak hna, cun an ei.
4 An ih hlanah Sodom khuami pa—mino he, upa he an bupi in inn kha an rak kulh.
5 Lot cu an au hnawh i “Tuzan na sin i a rami hna kha khua zei ah dah an um? Rak chuahpi hna law kan ihpi hna lai” tiah an ti.
6 Lot cu leng ah a va chuak i innka kha a khar.
7 “Unau hna, hi bantuk thil ṭhalo cu tuah hlah u.
8 Pa he a umṭi bal rih lomi fanu pahnih ka ngei hna. Anmah tu hi ka rak chuahpi hna lai i nan duh paoh in tuah ko hna u. Asinain ka inn thladem tang ah a rak i dormi hi mi hna cung ah hin cun zei thil hmanh tuah hlah u” tiah a nawl hna.
9 Annih nih “I thawn tuah! Cingla rualchan a ngei lomi, mipem le ramdang mi nih zeitindah bia na kan ceih ngam! Anmah nakhmanh in fak deuh in kan in tuah sual lai” tiah an ti. Cun Lot cu an nam i innka kha baoh an timh.
10 Cucaah innchung ah a ummi pa hna nih cun Lot cu innchung ah an hnuh i kutka kha an khar.
11 Innka hram ah a ummi mino he, upa he an dihlak in an mit an cawtter hna. Cucaah innka kha an dah i thaba lak in an kawl.
12 Cun innchung ah a ummi pa hna nih Lot kha “Hika ah rualchan dang na ngei ti maw? Na fapale, na fanule, an vale le khua chung i na mi hna kha hika hmun hin chuahpi hna!
13 Zeicahtiah hi hmun hi kan hrawh cang lai. Khuami hna an aihram thawng cu Jehovah nih a theih cang caah hi khua hi hrawh awkah Jehovah nih a kan thlah” tiah an ti.
14 Cucaah Lot cu a chuak i a fanule a ṭhitu ding hna kha “Tho u law hi hmun hin chuak tuah u! Zeicahtiah Jehovah nih hi khua hi a hrawh cang lai!” tiah a ti lengmang hna nain annih nih capo ah an ruah.
15 Khua a dei tikah vancungmi cu Lot sinah an ra i “Tho law na nupi le hika ah a ummi na fanule pahnih hi chuahpi hna! A si lo ahcun sualnak a ngeimi hi khua hi hrawh a si tikah hrawh nan si ve sual lai!” tiah an hnawh chih.
16 Lot cu aa nuainai. Asinain Jehovah nih a cung ah zaangfahnak a langhter caah vancungmi hna nih Lot le a nupi le a fanule pahnih kha an kut in an hnuh hna i khua leng ah an chuahpi hna.
17 Khua leng an phanhle cangka “Nan nun nakhnga tli u! Hnulei zoh hlah u, hi ram i khuazei hmun hmanh ah i din hlah u! Hrawh nan si nakhnga lo tlanglei ah tli u!” tiah a ti hna.
18 Mah tikah Lot nih “Zaangfahnak in Jehovah, cuka ah cun rak ka tlikter hlah!
19 Atu ah na salpa hi mithmai ṭha na ka pek cang i ka nunnak na ka khamhnak thawng in ka cung ah a fekmi dawtnak na langhter cang. Asinain tlanglei ah cun ka tli kho lai lo. Zeicahtiah harnak nih a ka tlun hnawh lai i ka thi ko lai.
20 Khika ah khua hmete pakhat a um i lamnaih te zong a si. Zaangfahnak in khika ah rak ka tlikter ko. Khua hmete lawng a si ko. Cuka ah cun ka luat ko lai” tiah a ti.
21 Mah tikah vancungmi nih “A ṭha ko, nangmah zawnruah ah cu khua cu ka hrawk lai lo.
22 Zokzok in tli! Cuka khua na phanh hlan tiang zeihmanh ka tuah lai lo!” tiah a ti. Cucaah cu khua cu a min ah Zoar* tiah auh a si.
23 Lot cu Zoar khua a phanh tikah ni a chuak cang.
24 Jehovah nih Sodom le Gomorrah khua cung ah kat le mei a surter. Kat le mei cu Jehovah umnak van in a tla.
25 Cuticun Pathian nih cu khua pahnih le nelrawn i a ummi a dang khua hna cu khuami hna le ram chung ah a khomi ramkung vialte he a hrawh dih hna.
26 Asinain Lot hnulei ah a ummi Lot nupi cu a hnulei ah aa mer i cite tung ah aa cang.
27 Abraham cu zingka tein a tho i Jehovah hmai i a rak dirnak hmun ah khan a va kal.
28 Sodom le Gomorrah le cuka ram vialte kha a cuanh tikah ṭihnung tukmi thil sining kha a hmuh. Meiphu in meikhu a tomtom an kai bantuk in cuka ram in meikhu a tomtom an kai.
29 Pathian nih cuka ram i khua hna a hrawh tikah Abraham kha a philh lo. Cucaah Lot a rak umnak khua hna a hrawh tikah Lot cu a luatter.
30 A hnuah Lot cu Zoar khua i um kha a ngamh lo caah a fanule pahnih he tlangram lei ah an kal. Cucaah a fanule pahnih he cun lungkua chung ah khua an sa.
31 Upa deuh nih a nau kha “Kan pa hi a tar cang. Vawlei phunglam ning in kan vat dingmi pa hika hmun ah ahohmanh an um lo.
32 Cucaah kan pa hi mitsur zu dinh u si law kan pa ciruang a tlau nakhnga lo ihpi u sih” tiah a ti.
33 Cu zan ah cun an pa cu mitsur zu kha tampi in an dinh. Cun upa deuh nih a pa cu a ihpi. Asinain zeitik ah dah a rak ih i zeitik ah dah a thawh ti kha a pa nih a hngal lo.
34 A thaizing ah upa deuh nih a nau kha “Zahan ah ka pa cu ka ihpi cang. Tuzan zong mitsur zu dinh ṭhan u sih. Kan pa ciruang a tlau nakhnga lo a sinah va kal law va ihpi” tiah a ti.
35 Cu zan zong ah cun an pa cu mitsur zu kha tampi in an dinh. Cun ngakchia deuh nih a pa cu a ihpi. Asinain zeitik ah dah a rak ih i zeitik ah dah a thawh ti kha a pa nih a hngal lo.
36 Cuticun Lot fanu pahnih cu an pa thawng in fa an pawi.
37 Upa deuh nih fapa a hrin i Moab tiah min a sak. Anih cu atu i Moab mi hna a hringsortu a si.
38 Ngakchia deuh zong nih fapa a hrin i Benammi tiah min a sak. Anih cu atu i Ammon mi hna a hringsortu a si.
Footnotes
^ A sullam “Khua Hmete.”
