Genesis 13:1-18
13 Abram le Sarai nih an ngeihmi vialte kha an lak i Izipt ram in Negeb ram ah an kal, Lot zong an sinah a kal ve.
2 Abram cu a rum ngaingaimi a si i saṭil, sui le ngun tampi a ngei.
3 Negeb in Bethel tiang hmun khat hnu hmun khat ah aa ṭhial i thlam in khua a sa. Bethel le Ai karlak ah thlam a rak saknak hmun,
4 biakṭheng a rak saknak hmun kha a phan ṭhan. Cuka ah Abram nih Jehovah min kha a thangṭhat.
5 Abram sinah a kal vemi Lot zong nih tuu, caw le thlam tampi a ngeih hna.
6 Cucaah hmunkhat ah khuasakṭi ding in hmunhma nih a zat hna lo; an ngeihmi thilri a tam chin lengmang caah hmunkhat ah an umṭi kho ti lo.
7 Mah ruang ah Abram saṭil cawngtu le Lot saṭil cawngtu karlak ah i siknak a hung chuak. (Mah lio caan ah Kanaan mi le Periz mi cu cuka ram ah khua an sa.)
8 Cucaah Abram nih Lot kha “Kannih cu rualchan kan si caah keimah le nangmah karah siseh, ka saṭil cawngtu le na saṭil cawngtu karah siseh i siknak a um awk a si lo.
9 Cucaah hi ram ah hin na duhnak zawn kha i thim law i ṭhen u sih. Nang kehlei ah na kal ahcun kei orhlei ah ka kal lai; nang orhlei ah na kal ahcun kei kehlei ah ka kal lai” tiah a ti.
10 Cucaah Lot cu khua a cuan i Zoar khua tiang Jordan Nelrawn cu a ningpi in Jehovah dum bantuk, Izipt ram bantuk in ti tampi a ummi kha a hmuh. (Jehovah nih Sodom le Gomorrah khua a hrawh hlanah a si.)
11 Lot nih cun Jordan Nelrawn kha a ningpi in aa thim i nichuahlei ah aa ṭhial. Cuticun an i ṭhen.
12 Abram cu Kanaan ram ah khua a sa i Lot tu cu Nelrawn i a ummi khuapi hna lakah a um. A donghnak ah Sodom khua pawng ah a thlam kha a sak.
13 Sodom mi hna cu miṭhalo le Jehovah hmaiah sualnak ngan a tuahmi an si.
14 Lot aa ṭhial hnuah Jehovah nih Abram kha “Atu na umnak hmun khan nichuahlei, nitlaklei, chaklei le thlanglei kha zoh hna hmanh.
15 Na hmuhmi ram vialte kha nangmah le na tefa cu kaan pek hna lai i a zungzal in nanmah ta a si lai.
16 Na tefa cu leidip bantuk in ka tamter hna lai, leidip rel khawh a si lawng ah na tefa zong rel khawh an si lai.
17 Tho law ram hi a ningpi in cul tuah, a dihlak in nangmah kaan pek lai” tiah a ti.
18 Cuticun Abram cu thlam ah khua a sa peng rih ko. A hnuah Hebron khua, thingkung nganpipi an umnak Mamre pawng ah a phan i khua a sa. Cuka ah Jehovah caah biakṭheng pakhat a sak.
