Genesis 15:1-21
15 Mah hnuah Abram nih langhnak a hmuh i Jehovah nih “Abram, na thinphang hlah. Keimah cu na caah phaw ka si. Na laksawng cu a ngan tuk lai” tiah a ti.
2 Abram nih “Lianngan Bik Bawipa Jehovah, zeidah na ka pek lai? Atu tiang fa ka ngeih rih lo caah Damaskas mipa Eliezer hi maw ka ro cotu cu a si ko lai?
3 Fa na ka pek lo caah ka innchung i sal pakhat cu ka ro cotu a si cang lai” tiah a ti.
4 Jehovah nih “Hi pa cu na ro cotu a si lai lo. Na ro cotu cu nangmah na fapa hrimhrim kha a si lai” tiah a ti.
5 Cun Pathian nih Abram cu leng ah a chuahpi i “Zaangfahnak in van khi zoh law na rel khawh ahcun arfi khi rel tuah hna. Na tefa cu mah arfi zat khi an si lai” tiah a ti.
6 Abram nih Jehovah kha a zumh. Cucaah Pathian nih miding in a hmuh.
7 Cun Pathian nih “Hi ram hi nangmah pek awkah Khaldia ram, Ur khua in nangmah aan chuahpitu Jehovah kha ka si” tiah a ti.
8 Abram nih “Lianngan Bik Bawipa Jehovah, hi ram cu keimah ta a si ti kha zeitindah ka hngalh khawh lai?” tiah a ti.
9 Pathian nih “Kum thum a simi cawla pakhat, kum thum a simi mehehpi pakhat, kum thum a simi tuukawng pakhat, ṭhuro pakhat le laileng no pakhat in rak ka pe” tiah a ti.
10 Cucaah Abram nih mah saram vialte cu a rak put hna i a lai in cheu hnih ah a cheu hna, cun khatlei khatlei ah a chiah hna. Va kha cu a cheu lo.
11 Va nganpipi nih saruak cu an zuan hnawh caah Abram nih a ṭhawl hna.
12 Ni a tlak lai ah Abram cu thu hluahmah in aa hngilh i muihnak nganpi nih a khuh.
13 Cun Pathian nih Abram cu hitin a ti: “Na tefa cu ramdang ah ramdang mi in khua an sa lai. Cuka ah kum 400 chung sal an si lai i hrem an si lai ti kha i cinken.
14 Asinain sal in a hremtu hna cu bia ka ceih hna lai i annih cu thilri chawva tampi he cuka ram cun an chuak lai.
15 Nang cu chan tling in na nung lai i lungdai tein na thi lai. Pupa sinah vui na si lai.
16 Asinain na tefa hna cu chan li hnuah hika ah an rak kir ṭhan lai. Zeicahtiah Amor mi hna cu an sualnak caah dantat awkah a caan a phan rih lo.”
17 Ni a tlak i khua a hun muih tikah meikhu a chuakmi meiphu le a alhmi meitom pakhat cu an hun chuak i sa a chiahmi hna karlak ah an kal.
18 Mah ni ah Jehovah nih Abram he biakamnak a ser i “Na tefa cu hi ram hi ka pek hna lai. Izipt tiva in tiva ngan Zufrates tiva tiang a si lai.
19 Ken mi, Keniz mi, Kadmon mi,
20 Hit mi, Periz mi, Repha mi,
21 Amor mi, Kanaan mi, Girgash mi le Jebus mi hna ram kha ka pek hna lai” tiah a ti.
